Read dhopadhola Hoseya 8 Bible Online

Hoseya 8 - dhopadhola bible

Hoseya 8

¹Kudhi win gwara! Kole ŋata cale ango nitie i ot ma Isiraili, kwoŋbedo jotieko turo cikirok paran, to joweyo timo gima cik paran waco.

²Joywak ran ni, “Awi Were mawan, wa Joisiraili waŋeyin!”

³Isiraili otieko kwero bero; jakwor lariemo go.

⁴Jotieko ketho kerin pajo i kombere ma dhum, ma k'owoki bongan; jotieko ketho jotel i kombere ma dhum, m'akuya ran. Gi feza pajo kodi zahabu pajo jotimo cal, ma rerok pajo wegi.

⁵Atieko kwero nyathi dhiaŋ perin, Awi Samaria. Nge paran liel kwoŋ jo. Latero jo hongo aŋo bedo ma bu apuse?

⁶Kole wok i Isiraili, japac am'otimo; k'obedo Were. Nyathi dhiaŋ ma Samaria ilaturo mathindho thindho.

⁷Kole jocwoyo koyo aka jolakeco asur. Kodhi m'ocungo ongoye withe, k'onyak cemo; bedi nyak, jokicar am'oyido jolacuto.

⁸Ilamwonyo woko Isiraili; pama onyo jonitie i dier nonin, paka atawo m'ongoye kony.

⁹Kole jotieko kadho i Asiria, punda madhako mager lera kende; Efrayim jotieko kipangisa ombegin.

¹⁰Kada bende jopangisa ji i dier nonin, acegin coko jo kanyacel. Aka jolaweyo ma hongo manok kwoŋ bieto pa kerin kodi wot kerin.

¹¹Kwoŋbedo Efrayim nyayo migame ma cwako reco, jotieko lokere rigo migame ma timo reco.

¹²Bedi andiki rigo cik paran kweth, d'oter jo paka gimanyen.

¹³Cowirok ma jocowere gine; ma riŋo to jocamo; Rwoth kisangala gi jo. Onyo pama go lapoyo reco pajo, to miyo reco pajo gir'acula; jolagik Misir.

¹⁴Aka Isiraili wiye otieko wil gi Jacwec pere, aka go otieko geto cel pa kerin; aka Yuda otieko nyayo tindin madongo m'otinda; to aladhiro mac i tindin pere madongo no, to reyo woko kam'oridhere m'ocungo matek pere.