Read dhopadhola Hoseya 9 Bible Online

Hoseya 9 - dhopadhola bible

Hoseya 9

¹Ikir'ifore, Awi Isiraili! Ikir'ifore paka nonin man; kole itieko timo gikidakana, jwango Were perin. Imito rin doko cul paka malaya, kwoŋ kapiedhirok je!

²Kapiedhirok kodi kabiyo vini k'opidhi jo, aka vini manyen labudho jo.

³Aka jok'odoŋ i lowo pa Rwoth; to Efrayim lagik Misir, aka jolacamo cemo makoc i Asiria.

⁴Jok'okonji math ma vini ri Rwoth, aka cowirok pajo k'osangala go. Nger cowirok no lacale mugat ma ywak; ŋati mogo je m'ocami lanyekere; kole mugat pajo labedo ma kec pajo kende; k'obin i Ot pa Rwoth.

⁵Inotim aŋo ri ndelo m'oyik'iye kalima, kodi ri ndelo ma kalima pa Rwoth?

⁶Kole neni, kada joboth rerok, Misir lacoko jo, Mefis layiko jo. Doy lakisika woko feza pajo ma welo; kudhin labedo i wemin pajo.

⁷Ndelin ma gir'acula otieko bino, ndelin ma gir'acula ripo wotundi; Isiraili ywak ni, “Jatuci wac Were obedo ŋatamiŋ, jal ma cuny olokere janeko!” Ro reco mewin madwoŋ, dakirok mewin dwoŋ.

⁸Jatuci wac Were obedo jakur, gi Were paran kwoŋ Efrayim, kucel bwo pa jaciko nitie i royo pere, kodi dakirok i Ot pa Were pere.

⁹Jotieko mieno kwo pajo i thutho, paka i hongo pa Gibeya; go lapoyo reco pajo, go lamiyo reco pajo gir'acula.

¹⁰Paka olemo i thim, anwaŋo Isiraili. Paka ranyak marapena wi yath nyandere, i kacako mere, aneno kwarere mewin. To munyo jobino i Bal Pewor, to joloko kwo pajo maleŋ ri gimoro ma wickwot, to jolokere gim'ongoye cwe paka gima jomaro.

¹¹Dwoŋ pa Efrayim laay woko pa winyo, langoye nywol, langoye bedo gi ic, aka ongoye dhako ma lagamo ic!

¹²Kada jokel nyithindho pajo, alaneko woko nyithindho pajo m'ongoye kad'acel m'odoŋ. Kidamba rijo adieri, k'anojwangi jo!

¹³Efrayim paka aneno lum m'ipidho Tire kidho moko, aka Efrayim ripo woter nyithindho pere aneka.

¹⁴Miy jo, Awi Rwoth, inomiy jo aŋo? Miy jo ici apodha woko gi thundho m'othwo.

¹⁵Kidakana pajo je ocako i Gilgal; acako dak jo kenyo, kwoŋbedo kidakana ma tim pajo, alariemo jo woko i ot paran. Ak'omiti jo kendo, wot kerin pajo jobedo jodudi.

¹⁶Mbaka oloyo Efrayim, tiendi jo othwo woko, jokinyak olemo kad'acel. Kada jonywol, alaneko nyithindho pajo ma jomaro.

¹⁷Were paran lakwero jo woko, kwoŋbedo jokwero winjo go; jolabedo jokilera i dier nonin.