Read dhopadhola Yowel 1 Bible Online

Yowel 1 - dhopadhola bible

Yowel 1

¹Me wac pa Rwoth m'obino ri Yowel wod pa Pethuel.

²Winji win gime, awi jom'otegino, ciki ithi win, awi joma bedo i piny Yuda! Nger gino oyido otieko timere i hongo mewin, kosa i hongo pa kwarere mewin?

³Waci win ri nyithindho mewin kwoŋe, aka nyithindho mewin jowowaci ri nyithindho pajo, aka nyithindho pajo ri luse man.

⁴Gima bonyo jonyaro joweyo, bonyo ma jobino i tome jotieko camo. Gima bonyo ma jobino i tome joweyo, bonyo ma jopor jocamo, gima bonyo ma jopor joweyo, bonyo ma jorey jotieko camo.

⁵Cew win, awi jomero, aka wibiy pigi waŋ win; aka goy win ndur, win je ma wimadho vini, ro vini mamit, kole otiek kwanyo woko i dhok win.

⁶Kole tome bonyo jotieko monjo piny paran, jomeni aka jokikwanere; lak jo cal paka lak simbwor, aka nitie gi ywothe ma cale simbwor madhako.

⁷Jotieko loko yen vini paran gim'ongoye kony, jotoŋo makuyu paran to loko kasik; opoko to bolo woko apoka mere; jangi jo olokere matar.

⁸Goy win lelo paka nyako mambula m'oruko kutiya, ri cwore ma soye pere.

⁹Otiek kwanyo woko mic ma cemo kodi mic ma medho, wok i Ot pa Rwoth. Jocway ri Were i wi migam joywak, jotic pa Rwoth.

¹⁰Omien woko kisawere, piny ywak; rupiri onyeki woko cemo manyinge, vini othwo woko, mo manyen othwo woko.

¹¹Bedi win giwickwot, win jofur, goy win lelo, win jolwer yen vini, kwoŋ ŋano kodi bale; rupiri ranyak ma ndelo osika woko.

¹²Yath vini, kodi yath makuyu jothwo woko, pomo kodi thith kodi olemo madongo, yen je ma ndelin jothwo woko; adieri, kisangala othwo woko i dier ji.

¹³Twere win wiywak, awi jocway ri Were i wi migam; goy win lelo, win jotic ma migam. Biye win, winindi i kutiya, awi jotic pa Were paran! Mic ma cemo manyinge kodi mic ma medho, kikel i Ot pa Were perin.

¹⁴Loki win maleŋ riyo kec, lwoŋ win cokirok maleŋ, Coki win jom'otegino je, kodi ji je ma jobedo i Yuda, i Ot pa Rwoth Were mewin, aka wiywak ri Rwoth.

¹⁵Kidamba ri ndelo no! Kole ndelo pa Rwoth orikere, aka bino paka rerok ma wok bongi Jameni Je.

¹⁶K'obedo cemo m'orey woko ruwaŋ wan, kisangala kodi forok ongoye i Ot pa Were mawan?

¹⁷Kodhi otop woko i pendi lowo, udi makan jodoŋ nono; okedhi woko dere, kwoŋbedo ŋano othwo woko.

¹⁸Dhok joywak nedi! Sidwol dhok josala i nywowirok, kwoŋbedo lum ongoye rijo; kiri sidwol rombo je jotieko candere.

¹⁹Ri in, awi Rwoth, alwoŋo. Kole mac otieko cuto woko, lum ma thim, aka mac otieko waŋo woko, yen ma samba je.

²⁰Kiri ogwaŋe madudi je joywak rin, rupiri waŋ pi ma jwombe jocwiyo woko, aka mac oreyo woko lum ma thim.