Read dhopadhola Amos 3 Bible Online

Amos 3 - dhopadhola bible

Amos 3

¹Winji win gima Rwoth waco kwoŋ win Joisiraili, ji ma go owodho wok i piny Misir.

²Kwoŋ piny je, win kende am'atieko ŋeyo t'akwonga jo, riameno abino miyo win gir'acula, ro reco mewin je.

³J'ario jonyalo woth kanyacel, ma jok'ocikere ni joworomi?

⁴Simbwor nyalo kihola i dudi, ma k'oneno gimoro? Nyathi simbwor nyalo kihola i ode, ma k'omako gimoro?

⁵Winyo nyalo moko, ma k'ociki gi ligir? Mitego por malo wok piny, ma k'omako gimoro?

⁶Gwara bende ikutho i tindi madwoŋ, to ji joweyo ma jok'obwok? Teko nyalo podho i tindi madwoŋ, ma Rwoth k'odhiro.

⁷Adieri Rwoth kitim gimoro, ma k'onyutho nyaliŋliŋ pere, ri ŋecin pere jotuci wac Were.

⁸Ŋa ma lworo kimaki ka simbwor ohola? Ka Rwoth oluwo, ŋa manyalo kwero tuco mikwenda pere?

⁹Langa ri ji ma jobedo i ciel ma Misir gi Asdod ni, cokere win kanyacel wi gote m'othoko Samaria aka winen nyawin gi diyirok manitie kenyo.

¹⁰Rwoth waco. Jokuya timo tiro, aka jopoŋ gi neki kodi akaka i kapondo pajo.

¹¹Riameno me apaka Rwoth Were waco, jakwor bino thoko piny pajo, to reyo woko sigingi pajo, to jonyaga woko udi pajo.

¹²Me apaka Rwoth waco, paka jakwath rombo mayo simbwor tiendi rombo ario, kosa ithe, wok i dhoke, ameno apaka ji manok ma Samaria ibino bothio jo g'adec ma kitandin pajo ma kilaza.

¹³Winji pama aka i gwok nyikway Yakobo, Rwoth Were, pa Lwak Jolweny waco.

¹⁴I ndelo no abino miyo Isiraili gir'acula, ro reco pere. Abino reyo woko migam ma Bethel, aka kisi sonda ma migam bino tur to podho piny.

¹⁵Abino reyo woko udi ma ndir ma koth gi ma ceŋ. Udi m'olok maŋon gi lak liec bino podho to sika; aka ibino reyo woko udi madongo. Rwoth waco.