Read dhopadhola Amos 4 Bible Online

Amos 4 - dhopadhola bible

Amos 4

¹Winji win gime, mon ma Samaria. Win ma wipoŋ pa dhok ma wi got Basan, m'ipidho maber, ma jodiyo jocandi, aka wiŋinyo joma cando gimoro. Wiwaco ri cwogi win, jowokeli riwin vini wimadhi.

²Rwoth Were leŋ, aka waco ama: Ndelo bino m'ibino ywayo win gi siragetere; kisi nyatoro kwoŋ win bino cale rec i siraget.

³Ibino ywayo win kiri cegin gi kombe ma kor ot, t'ibolo win woko, ilabolo win woko i Harmon.

⁴Me apaka Rwoth Were waco: Ji ma Isiraili, kadhi win i Kabedo Maleŋ Bethel witim reco, kadhi win Gilgal aka witim reco gi meni mewin je! Medere win aka wikel ogwaŋe mewin, paka cowirok kisi odikin, kodi acel wiy apar mewin kisi ndelo adek.

⁵Medere win wimiy mugat mewin paka foyo ri Were, aka wikwot gi mic mewin ma wiwegi wimiyo, langa win jo rupiri a gima wimaro, Joisiraili!

⁶Akelo kec i tindin mewin madongo, to kucel wikidwoko bongan.

⁷Oyido amako koth kwoŋ win, munyo oyido odoŋ dwe adek to keco tundo. Oyido adhiro koth i tindi madwoŋ acel, t'akwero dhiro i tindi madwoŋ man. Koth oyido cwe i ndelo acel, aka ma koth k'ocw'iye othwo woko.

⁸Tindin madongo ario kosa adek, jokidho i tindi madwoŋ acel madho pi, aka jok'oyeŋ, kucel wikidwoko bongan.

⁹Adhiro koyo malieth thwo cemo mewin. Bonyo ocamo ndelin mewin gi ndelin vini mewin, makuyu gi nanzi mewin, to je wikidwoko bongan.

¹⁰“Adhiro kwoŋ win two nundu, paka ma cango adhiro ri Misir. Aneko yac mewin gi toŋ, atiŋo woko kayina mewin, t'amiyo ŋwece ma kambi mewin donjo i ywor um win, kucel wikidwoko bongan.

¹¹Asika woko wi jomegi, paka asika Sodom gi Gomora. Wi ji ma wiboth wicale, kasik mac m'oneki wok i mac, kucel wikidwoko bongan, Rwoth waco.

¹²Riameno Joisiraili, akidho miyo win gir'acula. Aka rupiri abino timo gime riwin, yikere win romo gi Were mewin, a Isiraili!”

¹³Kole neni, ŋat'ocweyo gote, to cweyo koyo, aka kedho ri nyatoro gima nitie i paro pere, ŋata loko odieceŋ wor, aka wotho i boro ma piny Rwoth, Were pa lwak jolweny, meno nyingi go!