Read dhopadhola Yona 1 Bible Online

Yona 1 - dhopadhola bible

Yona 1

¹Me wac pa Rwoth m'obino ri Yona, wod pa Amitay ni,

²“Ay ikidhi i tindi madwoŋ no Ninivi, iwaci rijo kwoŋ reco pajo rupiri aŋeyo kidakana pajo.”

³Yona oringo to kidho i tindi Tarsis kamabor gi Rwoth. Go oloro to kidho i kabedo m'ilwoŋo ni Yopa dho thengi nam. Kenyo go onwaŋo mel m'oyido cegin kadho Tarsis. Yona oŋado tikiti to idho mel no wonyali cewirok gi jono Tarsis bor gi Rwoth.

⁴Munyo jocewere i nam, Rwoth odhiro asur manitie gi derino swa m'oyengo mel to both turo.

⁵Gime obwoko swa jom'oyido nitie i mel. Jocako lwoŋo kareno jorango kony; kisi nyatoro ocako kwayo were pere wonyali konyo go. Mito loko mel masew, jobolo gigipiny m'oyido nitie i mel i nam. I waŋceŋ ma gime oyido timer'iye, Yona oyido nindo i pendi mel kam'opondo.

⁶Jatel ma mel onwaŋo go kenyo aka owaco rigo ni, “Ay malo ikway were perin poyo nyalo mako gi wan wor to botho kwo mawan.”

⁷Munyo asur omedere, omiyo jo penjirok ni ŋa kwoŋ jo m'okelo teko me. Ameno jogoyo kwir to nwaŋere nike manago obedo Yona.

⁸To jocewirok jopenjo Yona ni, “Waci riwan, ŋa ma wapusa ro gime? Itimo tic aŋo? Iwok kune? Iwok i piny mene? Aka ijanono mene?”

⁹Yona odwoko jo ni, “Abedo Jayuda, aka alamo Rwoth, Were ma i polo. Go Were m'ocweyo lowo gi nam.”

¹⁰Yona omedere waco rijo nike go oyido ŋweco pondo ri Rwoth. Munyo jowinjo gima Yona owaco, jobwok swa; aka jopenjo go ni, “Aŋo m'itimo me?”

¹¹Derino mar'asur omedere aka jopenjo go ni, “Watim rin aŋo ŋey asur me wokwe?”

¹²Go odwoko jo ni, “Aŋeyo paka me obedo kibenga paran; aka ka witiŋan to wibolan i nam, asur bino kwe.”

¹³Kad'ameno jotemo gi meni pajo je dwoko mel i thengi nam, to derino mar'asur k'oyeyo jo dhirok

¹⁴Ameno joywak ri Rwoth ni, “Awi Rwoth, ikir'imiy wan gir'acula ma tho, ro tho pa Yona! In Rwoth iŋat'itimo gime je.”

¹⁵Kenyo jobolo Yona i nam; aka asur okwe dicel.

¹⁶Gime omiyo jome bedo gi dhier aka jobedo gi lworo swa ri Rwoth. Jocowere to jokwoŋere.

¹⁷Kenyo Rwoth owodho or ri rec madwoŋ swa m'omwonyo Yona. Yona obedo i iy rec no ndelo adek; wor g'odieceŋ.