Read dhopadhola Yona 2 Bible Online

Yona 2 - dhopadhola bible

Yona 2

¹Munyo go fodi nitie i iy rec, Yona okwayo Rwoth Were pere ama,

²“Alwoŋin i teko paran Rwoth, t'idwokan. Aywak rin wok i milelo, i piny pa jom'otho, t'iwinjo dwondan.

³Ibolan i milelo, i cuny nam, kama pi othokan'iye, aka asur perin ma nigi derino ouman.

⁴Oyido aparo nike ibolan woko angoye ruwaŋin, aka doko ak'oneni ot perin maleŋ.

⁵Pi omwonyan to deyan, nam omwonyan gikululu, aka tworo ma pi otudere i ŋutan.

⁶Aluthere piny i tiendi Got. Akidho i piny kama waŋkac mere kiyawere.[1] To kucel in Rwoth Were paran, iŋat'idwokan makwo wok i bur.

⁷Munyo adundo paran opodho, apoyo Rwoth, aka kwayo paran otundo bongin i ot perin maleŋ.

⁸Joma jolamo cal ma bukony, jowiro ŋey jo rin.

⁹T'abino wero ma pakin, abino miyin cowirok. Gim'aciko, abino culo. Both wok bongi Rwoth.”

¹⁰Kenyo Rwoth doko owodho or ri rec cik, aka rec oŋulo Yona i lowo m'othwo.