Read dhopadhola Yona 4 Bible Online

Yona 4 - dhopadhola bible

Yona 4

¹Yona owinjo marac swa munyo Were k'okelo gir'acula kwoŋ Ninivi to mako nge.

²Go owaco ri Rwoth ni, “A Rwoth, me a gim'awaco mafodi akiay peco nike ibino timo. Am'omiyo atemo kiri ŋwec kadho i tindi Tarsis. Oyido aŋeyo paka in Were m'omaro ji aka ipoŋ gi wor. In Were ma kimaki nge piyo rupiri ipoŋ gi mar m'oasere. Inyalo wiro paro perin, t'iweyo m'ikimiyo gir'acula.

³Riameno Rwoth, akwayin ikwany woko kwo paran; ber atho loyo bedo makwo.”

⁴Rwoth openjo Yona ni, “Dwoŋ aŋo m'initie gine mako nge?”

⁵Yona oyido owok Ninivi to kidho bedo yuthenge ma yuwok ceŋ ma tindi madwoŋ. Go ogeto tipo to bedo piny kareno kuro neno gim'otimere ri Ninivi.

⁶Rwoth Were omiyo yath mogo otwi to dongo ma timo ri Yona tipo ŋey Yona wowinji m'ogonyere. Yona owinjo maber swa gi yath no.

⁷Munyo piny yawere i ndelo m'oluwo, Were odhiro kudin mogo m'ocamo tiendi yath no to thwo.

⁸To munyo ceŋ owok, Were odhiro koyo malieth swa wok yuthenge ma wok ceŋ. Lietho ma ceŋ owaŋo tipin wi Yona aka oloco go. Yona openjo ni, “Raŋo akitho! Ber atho woko loyo bedo makwo.”

⁹Were openjo Yona ni, “Dwoŋ aŋo m'initie gine mako nge?” Yona odwoko ni, “Amako nge rupiri ber atho loyo bedo makwo.”

¹⁰Rwoth owaco ri Yona ni, “Yath me odongo i wor acel to won rere; ongoye gim'itimo rigo, aka iŋat'ikimiyo odongo t'irem gine.

¹¹To raŋo akimaki wor gi tindi madwoŋ no Ninivi; kama nitie nyithindho ma kalo 120,000 m'ongoye gima joŋeyo, kiri g'ogwaŋe?”