Read dhopadhola Kwan 14 Bible Online

Kwan 14 - dhopadhola bible

Kwan 14

¹Kweth je jobaro dwondi gin gi ywak, to ji je jobiyo pigi waŋ gin wor no.

²Joisiraili je jogeŋisa gi Musa kodi Aron; kweth gibe jowaco rijo ni, “Bedi ndir no watho i piny ma Misir! Kosa bedi timere ni watho i thim me!

³Raŋo Rwoth okelo wan i piny me ma podho g'abor? Mon mawan gi nyithindho mawan jolalokere gikinyaga; di k'ober loyo riwan gik Misir?”

⁴To wegi jowaco ni, “Weyi wayer jatel, to wagiki Misir.”

⁵Kenyo to Musa kodi Aron jogore piny gi nyim jo ruwaŋ cokirok ma kweth pa Joisiraili.

⁶Yosuwa wod pa Nun kodi Kaleb wod pa Yefune, ario kwoŋ cwo m'oyido jobedo jopendo joyeco nangin pajo i rem,

⁷to jowaco ri kweth pa Joisiraili ni, “Lowo ma wawoth'iye thoko paka jopendo obedo lowo maber ma kiwacere.

⁸Ka Rwoth sangala gi wan, go lakelo wan i lowo me to miyo wan, lowo ma mol gi cak kodi mo kic.

⁹Kende ni, wikiri wigwenyere kwoŋ Rwoth; aka wikiri wilwor ji ma lowo, kole jokithoth loyo mugat riwan; ongoye ŋat'okwonga jo, aka Rwoth nitie gi wan; wikiri wilwor jo.”

¹⁰To kweth gibe jotisa goyo jo gi telin. Kenyo to dwoŋ pa Rwoth menyere i Wema ma romo ri Joisiraili je.

¹¹To Rwoth penjo Musa ni, “Ji me jolacayan kiri keraŋo? Aka jok'oyeyan kiri keraŋo, kada bedi ni atieko timo ranyuth je i dier jo?

¹²Alagoyo jo gi two nundu aka ak'olunji jo, aka alalokin nono madwoŋ aka matek loyo jo.”

¹³To Musa waco ri Rwoth ama: Jomisir jolawinjo kwoŋe, rupiri i meni perin iwodho woko ji me i dier jo,

¹⁴aka jolawaco ri joma bedo i lowo me. Jotieko winjo ni in, awi Rwoth, initie i dier ji me; kole in, Awi Rwoth, ineno awaŋ g'awaŋ, aka pondeponde perin cungo i wi jo t'itelo jo, i siro ma pondeponde odieceŋ kodi siro ma mac wor.

¹⁵Onyo k'inoneki ji me je dicel, kenyo nonin ma jotieko winjo kwoŋin jolawaco ni,

¹⁶“Kwoŋbedo Rwoth k'onyalo kelo ji me i lowo ma go okwoŋere miyo jo am'omiyo oneko jo i thim.”

¹⁷Aka onyo, riameno, weyi meni pa Rwoth wobedi madwoŋ i nger ma cango iciko munyo iluwo, k'iwaco ni,

¹⁸ “Rwoth kimaki nge piyo, aka opoŋ gi mar makiwire, cwako reco kodi kibenga, aka i nger moro je cwako reco, aka go k'owey ma k'omiyo nyithindho gi nyikway jo, gir'acula kiri i luse mar'adek kodi mar'aŋwen ri reco pa jonywol pajo.”

¹⁹“Cwaki reco pa ji me cungo kwoŋ dwoŋ ma mar perin makiwire, paka itieko cwako ji me, wok Misir tundo kiri pama.”

²⁰Kenyo Rwoth owaco ri Musa ni, “Acwako, paka itieko kwayo;

²¹to kad'ameno paka akwo, kendo paka piny gipi bino poŋ kodi dwoŋ pa Rwoth,

²²ongoye ji ma jotieko neno dwoŋ paran kodi ranyuth m'atieko timo i Misir kodi i thim, aka kucel jotieko teman mirundi apar me aka fodi jok'oworan,

²³ma laneno piny m'akwoŋere miyo kwarere pajo; ongoye kad'acel kwoŋ joma jocayin m'onen.

²⁴To ŋeca paran Kaleb, kwoŋbedo go nitie kodi cuny m'opokere aka otieko timo gim'ayenyo, alakelo i lowo ma go oyido otieko kidh'iye, aka nyikwaye jobino loko apajo.

²⁵Onyo, paka Joamalek kodi Jokanan jobedo i milelo, wire win wikidhi i thim gi royo ma Nam M'obokere.”

²⁶Rwoth oluwo gi Musa kodi Aron ka waco ni:

²⁷“Kweth pa jokidakana me jolakigeŋisa kodan kiri keraŋo? Atieko winjo kiŋunyaŋunya pa Joisiraili, ma jogeŋisa iye kwoŋan.

²⁸Waci rijo ni, ‘Paka akwo, Rwoth waco, alatimo riwin gimoro acel won m'awinjo wiwaco:

²⁹Delkwoŋ win m'otho bino podho i thim acel me won; aka kwoŋ wijoje, manitie i welo ma ji m'okwan, cako i oro piero ario kadho malo, ma jotieko kiŋunyaŋunya kodan,

³⁰ongoye kad'acel kwoŋ win m'odonji i piny m'akwoŋere keth'iye win, kwanyowoko Kaleb wod pa Yefune, kodi Yosuwa wod pa Nun.

³¹To jomathindho mewin, ma wiwaco ni oyido jolalokere gikinyaga, alarwako jo i iye, aka jolaŋeyo piny ma witieko cayo.

³²To paka riwin, delkwoŋ win m'otho bino podho i thim me.

³³Nyithindho mewin jolabedo jokwath i thim ma oro piero aŋwen, aka jolacandere rupiri wikiwinjan, cuka delkwoŋ win m'otho macowe oŋare i thim.

³⁴Cungo kwoŋ hongo ma wicowo ma timo nyaliŋliŋ ma piny, oro piero aŋwen, ri kisi ndelo i oro, wibino bielo reco mewin, oro piero aŋwen, aka wilaŋeyo gut paran.’

³⁵An Rwoth atieko luwo; adieri abino timo ameno ri kweth m'odakana me je ma jocokere kanyacel lweny kodan i thim me, gike pajo latundo, aka jolatho.”

³⁶Cwo ma Musa odhiro timo nyaliŋliŋ ma lowo ma jogik to jomiyo kweth je kigeŋisa gine gi kelo radwok marac ma mako lowo.

³⁷Cwo ma jokelo radwok ma ŋedho cuny ma mako lowo thoyamo oneko jo ruwaŋ Rwoth.

³⁸To Yosuwa wod pa Nun kodi Kaleb wod pa Yefune kende ama jodoŋ ma jokwo, kwoŋ cwo ma jokidho bedo jopendo ma lowo.

³⁹Munyo Musa otieko waco wac me ri Joisiraili je, ji joywak tektek.

⁴⁰Joay odikin maŋic to jokidho i wi acurcur ma piny matendere, ka jowaco ni, “Ee wan. Walakidho malo i kabedo ma Rwoth otieko ciko, rupiri watieko timo reco.”

⁴¹To Musa penjo ni, “Raŋo wimedere timo kibenga kwoŋ or pa Rwoth? Wikilanyalo.

⁴²Wikiri wikidhi malo, rupiri Rwoth kinitie gi win; wikiri wimiy worwadhi win piny ruwaŋ jokwor mewin.

⁴³Kole Joamalek kodi Jokanan jonitie ruwaŋ win aka wilatho; rupiri witieko kwero luwo Rwoth, Rwoth k'obedi gi win.”

⁴⁴To jokethere idho iy'acurcur ma piny matendere, kad'oyido Kakan ma Cikirok pa Rwoth, kodi Musa onwaŋo fodi jok'oweyo kambi.

⁴⁵Kenyo Joamalek kodi Jokanan m'oyido jobedo i piny matendere joloro piny to jokengila jo, to joriemo jo tundo Horima.