Read dhopadhola Kwan 21 Bible Online

Kwan 21 - dhopadhola bible

Kwan 21

¹Munyo Jakanan, kere ma Aradi, ma bedo yupiny ma Kanan, owinjo nike Joisiraili oyido jobino gi i royo ma Atharim, go olwenyo gi jo to tero megi paka jotwec.

²Joisiraili jokwoŋere ri Rwoth ka jowaco ni, “K'adieri inomiy ji me i cingi wan, walareyo woko jo kicutho kanyacel gi tindin pajo madongo.”

³Rwoth owinjo dwondi Joisiraili, to miyo Jokanan i cingi Joisiraili ma joreyo woko jo kicutho kanyacel gi tindin pajo madongo. Ameno olwoŋi kabedo no ni Horima.[4]

⁴Joisiraili joay wok i got Hor gi i royo ma kidho i Nam M'obokere, kadho thoko lowo ma Edom; to jok'onyalo bedo moth i yo.

⁵Joisiraili joluwere marac kwoŋ Were kodi Musa ka jopenjo ni, “Raŋo wiwodho wan wok i Misir, kelo wan tho ka i thim kama cemo kodi pi ongoy'iye, aka wadak cemo masisiri me.”

⁶Rwoth odhiro thwole ma jokwir i dier Joisiraili ma jokayo ji, ŋey Joisiraili kweth jotho.

⁷Joisiraili jobino bongi Musa to jowaco rigo ni, “Watieko timo reco gi luwirok kwoŋ Rwoth kodin. Onyo kway Rwoth wokwany woko thwole kwoŋ wan.” Ameno Musa okwayo ri ji.

⁸Kenyo Rwoth owaco ri Musa ni, “Tim thwol ma nyweny manitie gi kwir, t'iŋawo wi yath, aka kisi ŋata thwol okay to ŋiyo bino kwo.”

⁹Ameno Musa otimo thwol ma ywel, to ketho wi yath, aka kisi ka thwol okayo dhano, ŋato ŋiyo thwol ma ywel to kwo.

¹⁰Joisiraili joay kenyo, to joketho kambi i Oboth.

¹¹Jowok Obothi aka joketho kambi i Lye Abarim i thim mager gi Mowab yuwok ceŋ.

¹²Wok kenyo jokadho to joketho kambi i milelo ma Zered.

¹³Wok kenyo jokadho to joketho kambi i thenge ca ma Arinon manitie i thim ma wok i kew pa Joamor, kole Arinon obedo kew pa Mowab, i dier Jomowab kodi Joamor.

¹⁴Riameno ondikere i Kitawo ma Lweny pa Rwoth ni, “Tindi Waheb i Sufa kodi milelin, Malawa Arinon,

¹⁵kodi kamaloro ma milelin, ma core kiri i tindi Ar, tundo yu kew ma Mowab.”

¹⁶Wok kenyo jomedere kiri i Ber, i jwom ma Rwoth owaco ri Musa ni, “Coki ji kanyacel ŋey anyal miyo jo pi.”

¹⁷Kenyo Joisiraili jowero wer me: Waŋ pi nywol pi, aka walawero wer.

¹⁸Waŋ pi ma jotel ama jokunyo, waŋ pi ma jodhum pa ji ama jokunyo, gi ludhe ma dhum, kodi ludhe pajo. Jokowere wok i thim kidho Matana.

¹⁹Wok i Matana jokadho i Nahaliel, aka wok i Nahaliel jokadho i Bamoth.

²⁰Wok i Bamoth jokadho kiri i milelo manitie iy'adec ma Mowab wi got Pisiga ma ŋiyo abar.

²¹Kenyo Joisiraili jooro jomikwenda bongi Kere Sihon pa Joamor, ka jowaco ni

²²“Weyi waluw i piny perin, wakilarwayo i ndelin kosa i ndelin ma vini. Wakilamadho pi ma waŋ pi moro je, walaluwo i royo pa kere cuka wanotiek kalo adec perin.”

²³To Sihon k'onyalo yeyo Joisiraili luwo iy'adec pere. Sihon ocoko ji pere je kanyacel to kadho romo gi Joisiraili i thim. Sihon obino i Yahaz lweny gi Joisiraili.

²⁴Joisiraili joneko jo, aka jomayo Sihon lowo pere wok i Arinon tundo i Yabok, bor kiri Amon, kole kew pa Joamon oyido ikuro matek.

²⁵Joisiraili jotero tindin me je, aka jobedo i tindin pa Joamor, i Hesibon kodi i calin mere je.

²⁶Ato Hesibon oyido obedo tindi madwoŋ pa Kere Sihon pa Joamor, macon mere olwenyo gi kere ma Mowab to mako lowo pere je tundo kiri Arinon.

²⁷Riameno jonyangeda jowero ni, “Biye i Hesibon, tindi madwoŋ pa Sihon, weyi wogeti kendo,

²⁸Kole mac owok i Hesibon, wok i tindi madwoŋ pa Sihon. Oreyo woko Ar kodi Mowab, aka omwonyo woko ji ma jobedo kam'oŋawere pa Arinon.

²⁹Kidamba rin, Awi Mowab! Witieko rere woko, Awi ji ma Kemos! Go otieko loko wote jowiloka, kodi nyir pere jotwec ri Sihon, kere pa Joamor.

³⁰Watieko celo jo g'aserin, to jorere woko wok i Hesibon tundo kiri i Dibon, wok i Nofa tundo kiri i Medeba.”

³¹Ameno Joisiraili jobedo i lowo pa Joamor.

³²Musa ooro cwo neno nger maber ma monjo tindi madwoŋ Yazer. Joisiraili jomako calin mere, to joriemo woko Joamor m'oyido jobedo kenyo.

³³Joisiraili jowire to jokadho yu royo ma kadho Basan, aka Kere Og ma Basan kodi ji pere je jowok lweny gi Joisiraili i Edirey.

³⁴Rwoth owaco ri Musa ni, “Ikir'ilwor go; kole atieko miyo go i cingin kanyacel gi ji pere je. Tim rigo paka itimo Kere Sihon pa Joamor, m'oyido dhumo i Hesibon.”

³⁵Ameno Joisiraili joneko Kere Og, wote kanyacel gi ji pere je, cuka ongoye ŋat'oboth, aka jotero lowo pere.