Read dhopadhola Kwan 24 Bible Online

Kwan 24 - dhopadhola bible

Kwan 24

¹Balam oŋico nike oyido ber ruwaŋ Rwoth miyo Isiraili silwany. Riameno rume go k'okidho romo gi Rwoth, to owiro waŋe to ŋiyo yuthim.

²Balam oŋiyo malo to neno Isiraili joketho kambi pajo, nono gi nono. Kenyo cuny pa Were obino kwoŋ Balam,

³aka otuco wac Were me: Me wac pa Balam wod pa Bewor, wac Were pa jacwo ma waŋe neno maber swa.

⁴Me wac pa ŋata winjo wac pa Were, ŋata neno menyirok pa Jameni je, ma podho piny, to kareno waŋe oyawere.

⁵Wemin pa Isiraili ber ba, kabedo mewin, Awi Isiraili!

⁶Joyare paka jangi thith, paka ndelin i thengi malawa, paka alovera ma Rwoth opidho, kosa yen sida i thengi pi.

⁷Pi lamol wok iy'agwatin pere, kere pere labedo madwoŋ loyo Agag, aka ker pere latiŋere malo.

⁸Were m'owodho go wok i Misir, cale tungi merikwa mager rigo; go lareyo woko nonin ma jobedo jokwor pajo aka go laturo woko cokin pajo. Go lacelo jo g'aserin pere.

⁹Ka go oriere to nindo paka simbwor, kosa paka simbwor madhako, ŋa manyalo cewo go? Silwany ri jono ma jomiyin silwany, aka kwoŋ ri jono ma jokwoŋin.

¹⁰Kenyo nge pa Balak oliel kwoŋ Balam aka omino adol cinge. Balak owaco ri Balam ni, “Alwoŋin ka lamo jokwor paran, t'itieko miyo jo silwany adieri didek me je.

¹¹Riameno kadhi, dok peco! Oyido awaco miyin kemba madwoŋ, to Rwoth ogeŋin limo.”

¹²Balam odwoko Balak ni, “Akiwaco ri jomikwenda perin m'ioro bongan ni,

¹³‘Makada nende Balak omiyan ot pere m'opoŋ feza gi zahabu, oyido akinyali foco dhok Rwoth, timo bero kosa raco i mito paran won. Gima Rwoth owaci, meno am'alawaco.

¹⁴Onyo pama an adoki bongi ji paran. To weyi kutho amiyin rieko gima ji me jolatimo ri ji perin i hongo ma bino.’ ”

¹⁵Balam otuco wac Were me: Me mikwenda pa Balam wod pa Bewor, menyirok pa jacwo ma waŋe neno maber swa.

¹⁶Me menyirok pa ŋata winjo wac pa Were, aka oŋeyo rieko pa Jamalo Swa. Ŋata neno menyirok pa Jameni je, aka podho piny gi waŋe m'oyawere.

¹⁷Aneno go, to ki pama, aŋiyo go, to kinitie cegin, micala lawok kwoŋ Yakobo, kere lawok i Isiraili, go lareyo woko sondin ma Mowab, kodi adec pajo Seth.

¹⁸Edom lalokere lim pajo, Edom lalokere lim pa jokwor pere, kareno Isiraili medere lokirok matek.

¹⁹Nyatoro wok kwoŋ Yakobo ladhumo, aka lareyo woko ji m'oyido joboth i tindi madwoŋ.

²⁰Balam oŋiyo Joamalek, aka otuco wac Were ka waco ni: Amalek oyido obedo marapena kwoŋ nonin, to gike pere obedo rerok.

²¹Go oŋiyo Joken, aka otuco wac Were ka waco ni: Kabedo perin okwe, aka odin nitie i tele.

²²Kucel ilareyo woko Joken, ka Asiria oter jo paka jotwec.

²³Balam otuco wac Were me kendo ka waco ni: Kidamba, ŋa ma lakwo ka Were otim gime?

²⁴Jomonji jolacewere wok i Sipro, jolamako Asiria kodi Eber, to jo bende, jolarere kicutho.

²⁵Kenyo Balam oyikere to dok peco, aka Balak bende okadho i yo pere.