Read dhopadhola Kwan 25 Bible Online

Kwan 25 - dhopadhola bible

Kwan 25

¹Joisiraili joketho kambi i Sitim, aka cwo jocako timo cot gi mon ma Mowab.

²Mon me jolwoŋo jo i kalima ma cowirok pajo, aka Joisiraili jocamo to jolamo werin ma Mowab.

³Ameno Joisiraili joriwere gi Bal ma Pewor, aka nge pa Rwoth oliel kwoŋ jo.

⁴Rwoth owaco ri Musa ni, “Ter jotel pa Joisiraili je, aka ineki jo odieceŋ par, ŋey nge pa Rwoth wowire woko kwoŋ Isiraili.”

⁵Musa owaco ri jodhum ma Isiraili ni, “Kisi dhano kwoŋ win ripo neko ji mewin je ma jotieko lamo Bal ma Pewor.”

⁶Gikenyo won, Jaisiraili moro otero dhako Jamidian i wema pere munyo Musa kodi lwak pa Isiraili je joneno, kareno joywak ruwaŋ Wema ma Romo.

⁷Munyo Finehas wod pa Eliazar, nyakwar Aron, jacway ri Were i wi migam oneno, oay malo to weyo lwak, g'abor i cinge.

⁸Finehas oluwo Jaisiraili me kiri i wema pere, to ocwowo Jaisiraili kanyacel gi dhako Jamidian. I nger me thoyamo m'oyido reyo woko Joisiraili orumo.

⁹To makada nende, ji m'oyido jotieko tho oyido joromo 24,000.

¹⁰Rwoth oluwo gi Musa ka waco ni,

¹¹“Finehas wod pa Eliazar, nyakwar Aron, otieko wiro woko keme paran kwoŋ Joisiraili gi nyutho nger miyirok no i dier jo i ka waŋan ŋey akireyo woko Joisiraili je i nyeko paran.

¹²Riameno wac ni, ‘Atimo gi go cikirok ma siem.

¹³Go kodi nyikway go je jolatic paka jocway ri Were i wi migam cil gi cil; kwoŋbedo go onyutho miyirok ri Were pere, to kelo cwak ri reco pa Isiraili.’ ”

¹⁴Nyingi Jaisiraili m'oneki kanyacel gi dhako Jamidian, oyido ilwoŋo Zimiri wod pa Salu, jatel nono i nono pa Simeo.

¹⁵Nyingi dhako Jamidian m'oneki oyido ilwoŋo ni Kozibi, nyar Zur, m'oyido obedo jatel nono i Midian.

¹⁶Rwoth owaco ri Musa ama:

¹⁷Ter Jomidian paka jokwor, aka ikengila jo.

¹⁸Kole jotieko tero win paka jokwor gi twodo pajo ma jowondo gine win i gima mako kwoŋ Pewor kodi Kozibi, nyar jatel ma Midian, nyamin jo; m'oneki i ndelo ma thoyamo m'owok i Pewor.