Read dhopadhola Kwan 28 Bible Online

Kwan 28 - dhopadhola bible

Kwan 28

¹Rwoth oluwo gi Musa ka waco ni,

²“Wodhi or ri Joisiraili, aka iwaci rijo ni joripo miyan mic paran ma cemo m'owaŋ gi mac, ma ŋwece kur mere mit i hongo ma ripo.”

³Waci rijo ni me mic ma cemo m'owaŋ gi mac ma joripo miyo Rwoth. Wot rombo ario ma jo oro acel ma jongoye gi ŋolo paka mic ma kisi ndelo.

⁴Wod rombo acel wilamiyo odikin, aka man mere wilamiyo othieno.

⁵Wiripo bende miyo kilo acel ma moko, m'onywow gi lita acel ma mo oliv.

⁶Me mic awaŋa ma kisi ndelo, m'iwaŋo gikululu, m'ocaki miyo gi got Sinai paka mic ma cemo, ma ŋwece kur mere sangala Rwoth.

⁷Mic ma vini m'iripo miyo gi wod rombo marapena ripo bedo lita acel, m'iripo konjo i Kabedo Maleŋ ri Rwoth.

⁸Wod rombo man iripo miyo othieno gi mic ma cemo kodi mic ma vini paka m'odikin. Wiripo miyo paka mic awaŋa, ma ŋwece kur mere sangala Rwoth.

⁹I ndelo ma sabato wiripo miyo wot rombo ario ma jo oro acel ma jongoye gi ŋolo, kilo ario ma moko m'onywow gi mo oliv paka mic ma cemo kodi mic ma vini.

¹⁰Me mic awaŋa ri kisi ndelo ma sabato, medo i wi mic awaŋa ma kisi ndelo kanyacel gi mic ma vini mere.

¹¹Kisi ka dwe manyen cako, wiripo miyo Rwoth mic awaŋa ma rwath ario, wod rombo acel, kodi wot rombo abirio ma jo oro acel ma jongoye gi ŋolo.

¹²Wiripo bende miyo paka mic ma cemo moko m'onywow gi mo oliv ri kisi rwath, kilo adek ma moko, ri wod rombo kilo ario ma moko,

¹³aka ri kisi nyathi rombo ma jaoro acel, kilo acel ma moko. Mic awaŋa me obedo mic ma cemo, ma ŋwece kur mere sangala Rwoth.

¹⁴Mic ma vini labedo lita ario ri kisi rwath, lita acel g'adec ri wod rombo, kodi lita acel ri kisi wod rombo ma jaoro acel. Me cik ri mic awaŋa ri kisi ndelo marapena ma dwe ma oro gipi.

¹⁵Wiripo bende miyo wod diel ri Rwoth paka mic ma cwako reco medo i wi mic awaŋa ma kisi ndelo kodi mic ma vini mere.

¹⁶K'apar g'aŋwen ma ndelo marapena wiripo miyo Rwoth mic ma Kalima ma Kadho.

¹⁷K'apar g'abic ma dwe ripo bedo kalima ma tero ndelo abirio ma wiripo camo mugat ma buthow.

¹⁸I ndelo marapena ma kalima wiripo cokere kanyacel lamo, aka wikiripi timo tic.

¹⁹Wiripo miyo mic awaŋa paka mic ma cemo ri Rwoth. Rwath ario, wod rombo kodi wot rombo abirio ma jo oro acel. Neni win nike jongoye gi ŋolo.

²⁰Mic ma cemo labedo moko m'onywow gi mo oliv. Kilo adek ri kisi rwath, kilo ario ri wod rombo,

²¹kodi kilo acel ri kisi wod rombo ma jaoro acel.

²²Wiripo bende miyo wod diel acel paka mic ma cwako reco, ma cwako reco pa ji.

²³Wiripo miyo gigipiny me medo i wi mic awaŋa ma kisi ndelo odikin

²⁴I nger acel wiripo miyo Rwoth mic ma cemo kisi ndelo, ma ndelo abirio, ma ŋwece kur mere sangala go. Wimiy gime medo kwoŋ mic awaŋa ma kisi ndelo kodi mic ma vini.

²⁵I ndelo mar'abirio, wiripo cokere kanyacel lamo, aka wikiripi timo tic.

²⁶I ndelo marapena ma keco, ka wimiyo Rwoth mic ma cemo manyen i Kalima ma Keco, wiripo cokere kanyacel lamo, aka wikiripi timo tic.

²⁷Wiripo miyo Rwoth mic awaŋa, ma ŋwece kur mere sangala go. Rwath ario, wod rombo kodi wot rombo abirio ma jo oro acel.

²⁸Mic ma cemo mere ripo bedo moko m'onywow gi mo oliv, kilo adek ri kisi rwath, kilo ario ri wod rombo,

²⁹kodi kilo acel ri kisi wod rombo ma jaoro acel.

³⁰Wiripo bende miyo wod diel paka mic ma cwako reco, ma cwako reco pa ji.

³¹Wiripo miyo gigipiny me kodi mic ma vini medo i wi mic awaŋa ma kisi ndelo kodi mic ma cemo. Joripo bedo ma jongoye gi ŋolo.