Read dhopadhola Kwan 30 Bible Online

Kwan 30 - dhopadhola bible

Kwan 30

¹Musa owaco ri jotel nonin ma Isiraili ni: Me apaka Rwoth owodho or.

²Ka jacwo otimo cikirok ri Rwoth, kosa okwoŋere gi ciko gimoro, go kiripi turo wac pere. Go ripo timo gima go ociko gi dhoke je.

³Ka dhako otimo cikirok ri Rwoth, kosa okwoŋere gi timo cikirok kareno go nitie i ot pa bamere, i soye pere,

⁴ka bamere owinjo cikirok pere kosa kwoŋirok pere, to ngoye gima bamere owaco rigo, meno cikirok kodi kwoŋirok pere je cungo.

⁵To ka bamere okwero i hongo ma go owinj'iye, ongoye cikirok pere kosa kwoŋirok pere ma lacungo, aka Rwoth lacwako rigo kwoŋbedo bamere okwero rigo.

⁶To ka dhako onywomere munyo go otieko timo cikirok ma go oŋeyo kosa oluwere kicar gi dhoke,

⁷ka cwore owinji to ngoye gima go owaco i hongo ma go owinj'iye, meno cikirok kodi kwoŋirok no cungo.

⁸To ka cwore owinji to kwero rigo i hongo ma cwore owinj'iye, meno cikirok ma dhako no otimo kodi wac ma go oluwo kicar no kicungi, aka Rwoth lacwako rigo.

⁹To cikirok moro je ma citho kosa dhako m'oeye otimo lacungo.

¹⁰Ka go otimo cikirok no kosa okwoŋere i ot pa cwore,

¹¹aka cwore owinjo to ngoye gima go owaco rigo meno cikirok pere kodi kwoŋirok pere cungo.

¹²To ka cwore oyido okwero rigo i hongo ma go owinj'iye, meno kisi gima go owaco gi dhoke i cikirok kodi i kwoŋirok pere kicungi. Cwore otieko kwero rigo, aka Rwoth lacwako rigo.

¹³Cikirok moro je kosa kwoŋirok moro je ma dhako timo, cwore nyalo yeyo kosa nyalo kwero.

¹⁴To k'ongoye gima cwore owaco rigo i hongo ma go owinj'iye, meno dhako no ripo timo cikirok je kodi kwoŋirok je ma go otimo. Cwore otieko ridho cikirok no munyo go k'okwero.

¹⁵To ka cwore okwer rumacen ma hongo moro, meno cwore ama labedo gi banja ka dhako no owey ma k'otimo gima go ociko.

¹⁶Me cik ma Rwoth owodho or kwoŋe ri Musa ma mako kwoŋ jacwo kodi dhako pere, kodi nyako kodi bamere ka go fodi thin aka nitie i ot pa bamere.