Read dhopadhola Kwan 34 Bible Online

Kwan 34 - dhopadhola bible

Kwan 34

¹Rwoth oluwo gi Musa ka waco ama:

²Wodhi or ri Joisiraili, iwaci rijo nike ka widonjo i lowo ma Kanan, lowo ma labedo alunja mewin, me labedo kew mere.

³Kew ma yupiny lawok i thim ma Zin i thengi Edom. Kew ma yupiny lacako i gike ma Nam M'otho, yuwok ceŋ.

⁴Wok kenyo lawire yupiny ma milelo ma Akarabim, luwo i Zin, tundo kiri Kades Barineya. Kenyo lamedere yupiny ma yupodho ceŋ kiri Hazar Adar tundo kiri Azimon.

⁵Kew lawire wok i Azimon tundo kiri i milelo ma Misir, aka lagik i Nam Madwoŋ.

⁶Kew ma yupodho ceŋ labedo Nam Madwoŋ kodi thenge mere.

⁷Kew ma yumalo lawok i Nam Madwoŋ, wilacero bol kiri i Got Hor.

⁸Wok i Got Hor bol lamedere kiri Lebohamath to medere kiri i Zedad.

⁹Kew lamedere kiri Zifron, aka gike mere labedo Hazar Enan.

¹⁰Kew mewin ma yuwok ceŋ lawok Hazar Enan tundo kiri Sefam.

¹¹Kew lamedere piny wok i Sefam tundo kiri Ribila i thenge ma yuwok ceŋ ma Ayin, aka kew laloro piny, to tundo i thenge ma yumalo ma nam ma Kinereth.

¹²Kew laloro piny kiri i Yordan aka gike mere labedo Nam M'otho. Me labedo kew ma lowo mewin thoko.

¹³Musa owodho or ri Joisiraili ka waco ni: Me lowo ma wilalunjo gi bolo kwir, ma Rwoth otieko wodho or miyo ri nonin abuŋwen kodi nono adec.

¹⁴Nono pa Ruben gi pecin pajo kodi nono pa Gad gi pecin pajo jotieko tero lim pajo kodi adec nono pa Manase.

¹⁵Nonin ario no kodi adec nono no jotieko tero lim pajo kalo Yordan i Yeriko yuwok ceŋ.

¹⁶Rwoth oluwo gi Musa ka waco ni:

¹⁷Me a nyingi cwo ma jolapoko win lowo alunja; Eliazar kodi Yosuwa wod pa Nun.

¹⁸Ilakwanyo jatel acel wok i kisi nono poko lowo m'ilalunjo.

¹⁹Wok i nono pa Yuda, Kaleb wod pa Yefune.

²⁰Wok i nono pa Simeo, Semuel wod pa Amihud.

²¹Wok i nono pa Benyamin, Elidad wod pa Kislon.

²²Wok i nono pa Dan, Buki wod pa Jogili.

²³Wok i nono pa nyikway Yozefu, nono pa Manase, Haniel wod pa Efod.

²⁴Wok i nono pa Efrayim, Kemuel wod pa Sifitan.

²⁵Wok i nono pa Zebulun, Elizafan wod pa Parnak.

²⁶Wok i nono pa Isakar Paltiel wod pa Azan.

²⁷Wok i nono pa Aser, Amihud wod pa Selmon.

²⁸Wok i nono pa Nafital, Pedahel wod pa Amihud.

²⁹Jome ama Rwoth owodho or poko lim ri Joisiraili i lowo ma Kanan.