Read dhopadhola Kwan 35 Bible Online

Kwan 35 - dhopadhola bible

Kwan 35

¹Rwoth oluwo gi Musa i kam'obipere ma Mowab i thengi malawa Yordan i Yeriko ka waco ni,

²Wodhi or ri Joisiraili miyo Jolevi tindin ma jolabed'iye wok i lim pajo. Iripo bende miyo jo lowo ma kwath m'othoko tindin.

³Tindin labedo apa joma jolabed'iye, aka lowo ma kwath labedo ri dhok pajo, ri mwendi pajo kodi ri ogwaŋe pajo.

⁴Lowo ma kwath, m'ilamiyo ri Jolevi, lawok yuwoko wok i kor tindi madwoŋ mita 450 i kisi thenge.

⁵Ilakipima woko ma tindi madwoŋ mita 900 i kisi thenge, gi tindi madwoŋ i diere. Me labedo kakwath ri tindi pajo.

⁶Ilamiyo Jolevi tindin aucel ma pondo kama dhano nyalo ring'iye ka oneko nyawote ma k'ogendera. Medo i wiye ilamiyo Jolevi tindin piero aŋwen g'ario.

⁷Tindin m'ilamiyo Jolevi je ripo bedo piero aŋwen g'aboro, kiri gi lowo ma kwath pajo je.

⁸K'imiyo Jolevi tindin wok i lim pa Joisiraili, wok i nonin madongo ilakwanyo mathoth, aka wok i nonin mathindho ilakwanyo manok, cungo kwoŋ dwoŋo ma adec mere rom.

⁹Rwoth oluwo gi Musa ka waco ni,

¹⁰Luw gi Joisiraili aka iwaci rijo ni, “Ka wiŋado malawa Yordan kadho i lowo ma Kanan,

¹¹wiripo yero tindin madongo paka kapondo mewin, ŋey ŋat'oneki nyawote ma k'oŋeyo nyalo ringo kenyo.

¹²Tindin madongo no labedo riwin kapondo kwoŋ ŋata mito culo kwor, ŋey nyatoro m'oneko dhano wokiri wotho cuka iwinjo banja ruwaŋ Lwak.

¹³Tindin madongo ma wilayero labedo aucel.

¹⁴Wilayero tindin madongo adek kalo Yordan, kodi tindin madongo adek i lowo ma Kanan paka tindin madongo ma pondo.

¹⁵Tindin madongo aucel me jolabedo paka kapondo ri Joisiraili kodi jopath je i dier win, ŋey nyatoro ma oneki dhano ma k'oŋeyo woringi kenyo.”

¹⁶“To nyatoro m'ogoy nyawote gi cuma, to wok'iye tho, obedo janek aka iripo neko go.

¹⁷Nyatoro m'ogoy nyawote gi tele i cinge manyalo kelo tho, aka owok'iye tho, obedo janek, aka iripo neko go.

¹⁸Nyatoro m'ogoy nyawote gi mbawo manyalo kelo tho, aka owok'iye tho, obedo janek, aka iripo neko go.

¹⁹Ŋata culo kwor ama ripo neko janek; ka joromo, to jaculi kwor neko janek.”

²⁰“I nger acel ka nyatoro odhiro nyawote ro dakirok, kosa okur nyawote to bolo kwoŋe gimoro. To wok'iye tho,

²¹kosa ro kwor nyatoro ogoy nyawote g'adol cinge, to wok'iye tho, ŋat'owito adol obedo janek. Jaculi kwor ripo neko go ka joromo.”

²²“To ka nyatoro odhiro nyawote abwap m'ongoye kwor, kosa obol gimoro kwoŋe ma k'okuro go,

²³kosa ka oyido omako tele manyalo neko dhano, to bolo kwoŋ nyawote to wok'iye tho, makada nende oyido jok'obedo jokwor, aka atoŋa moro je oyido ongoye,

²⁴kenyo lwak ripo thumo banja i dier jaculi kwor kodi janek, cungo kwoŋ cik me.

²⁵Lwak ripo botho janek wok i cingi jaculi kwor to dhiro janek gik i tindin madongo ma pondo. Janek ripo bedo kenyo cuka jadwoŋ pa jocway ri Were i wi migam m'owir gi mo maleŋ otho.

²⁶To ka janek i hongo moro je owok woko ma kew ma tindi madwoŋ ma pondo,

²⁷aka jaculi kwor orom gi go to neko go, jaculi kwor kilabedo gi banja ma nek.

²⁸Janek ripo doŋ i tindi madwoŋ ma pondo cuka jadwoŋ pa jocway ri Were i wi migam otho. Rumacen ma tho pa jadwoŋ pa jocway ri Were i wi migam, janek nyalo dok peco.

²⁹Me labedo cik riwin kodi nyikway win je i luse je kisi kama winobed'iye.”

³⁰ “Ka nyatoro oneko nyawote, iripo neko janek ka ji jotieko miyo jakony; to wongoye dhano ma woneki gi miyo kony pa dhano acel.

³¹Wikiripi jolo cul ri kwo pa janek m'iripo neko, janek iripo neko.

³²Wikiripi jolo cul ri ŋat'oringo i tindi madwoŋ ma pondo, yeyo janek dok peco mafodi jadwoŋ pa jocway ri Were i wi migam k'otho.

³³Wikiripi koco lowo ma wibed'iye, kole remo koco lowo, aka ongoye cul m'inyalo miyo ri lowo ri remo m'ooy'iye, kwanyowoko gi remo pa ŋat'oy'iye.

³⁴Wikiripi koco lowo ma wibed'iye, ma an bende abed'iye, kole an Rwoth abedo i dier Joisiraili.”