Read dhopadhola Kwan 4 Bible Online

Kwan 4 - dhopadhola bible

Kwan 4

¹Rwoth oluwo gi Musa kodi Aron, ka waco ni:

²Kwan nyikway Kohath wok i dier nyikway Levi gi nonin pajo gi udi pa kwarere pajo,

³cako oro piero adek tundo i oro piero abic. Jono je ma jonyalo timo tic ma makere kodi Wema ma romo.

⁴Tic pa nyikway Kohath me i Wema ma romo mako kwoŋ gigipiny maleŋ loyo.

⁵Ka kambi oay, Aron gi wote jobino donjo to jolunyo nanga ma umo, to joumo Kakan ma Cikirok gine.

⁶Nyaka jobino jengo i wiye pien mafoth ma umo, to joyaro i wiye nanga manyabululu iye je, aka jobino ketho gute mere i kare.

⁷I wiy meza ma mugat maleŋ m'imiyo Rwoth jolayaro nanga manyabululu, t'ijengo i wiye sendere mere, bakulere ri buban, siniya, kodi jagi ma mic ma math; mugat ma kisi ndelo bende labedo i wiye.

⁸Kenyo jolayaro i wiy jo nanga m'obokere, to joumo gi pien mafoth, to joketho gute i kare.

⁹Jobino kwanyo nanga manyabululu, to joumo gine raŋaw tala ri lero, gi talin mere, kitambi mere, kabangala mere, kodi atewe ma mo mere ma jolaoro ma poko.

¹⁰Jobino ketho gi gigipiny mere je i giumo ma pien mafoth, to joketho i miango ma tiŋo.

¹¹I wiy migam ma zahabu jolayaro nanga manyabululu, to joumo gi pien mafoth, aka jobino ketho gute mere i kare.

¹²Jobino kwanyo gigipiny ma tic je m'ioro i Kabedo Maleŋ, to joketho i nanga manyabululu, to joumo gi pien mafoth, to joketho jo i wiy miango ma tiŋ.

¹³Jobino jowo woko buru wok i migam, to joyaro nanga ma rangi ariŋo i wiye.

¹⁴Jobino ketho i wiye gigipiny ma migam je, m'ioro ma timo tic kenyo, kabangala, uma, kitiyin, kodi kalayere, gigipiny je ma migam; aka jolayaro i wiye giumo ma pien mafoth, to joketho gute mere i kare.

¹⁵Ka Aron kodi wote jotieko umo Kabedo Maleŋ kodi kombere mere, kareno kambi ay, rumacen nyikway Kohath jolabino to jotiŋo, to jokiripi geyo gigipiny maleŋ, kosa jonyalo tho. Me gigipiny ma Wema ma romo ma nyikway Kohath joripo tiŋo.

¹⁶Eliazar wod pa Aron jacway ri Were i wi migam labedo jakur ma mo ma lero, buban maŋwe kur, mic ma kodhi ma kisi hongo, gi mo ma wir, kuro tabenakulo parom gi gimoro je manitie i iye, i Wema kodi gigipiny mere.

¹⁷Kenyo to Rwoth luwo gi Musa kodi Aron, ka waco ni:

¹⁸Wikiri wiŋadi woko nono madwoŋ ma nono pa Kohath wok i dier Jolevi.

¹⁹Me apaka wiripo tic gi jo ŋey jowokwo ma jok'otho ka jocore cegin gi gigipiny maleŋ loyo: Aron gi wote jobino donjo to jomiyo kisi ŋat'acel tic kosa bieto.

²⁰To Jolevi ma nono pa Kohath jokiripi donjo i iye ma mito neno gigipiny maleŋ kada nyak'adec; kosa jolatho.

²¹Kenyo Rwoth oluwo gi Musa, ka waco ama:

²²Kwan nyikway Gerison bende, gi udi pa kwarere pajo kodi nonin pajo.

²³Cako i oro piero adek tundo oro piero abic ilakwano jo, joje ma jonyalo timo tic i Wema ma romo.

²⁴Me a tic pa Jolevi ma Gerison, i timo tic kodi tiŋo gigipiny me.

²⁵Jolatiŋo nanga ma umo tabenakulo, kodi Wema ma romo gi giumo mere, gi giumo ma woko ma pien mafoth manitie i wiye, kodi ndewiro ri dhiot ma Wema ma romo.

²⁶Aka nanga ma umo kapido kodi ndewiro ma dhiot ma waŋkac ma kapido m'othoko tabenakulo kodi migam, gi thondhe kodi gigipiny ma tic pajo; aka jolatimo gimoro je ma ripo atima ma mako jo.

²⁷Tic je mapa nyikway Gerison bino bedo paka Aron gi wote jowaci rijo, i kisi gimoro je ma jotiŋ, kodi i kisi gimoro je ma jotim; aka ibino miyo jo gimoro je ma jotiŋ.

²⁸Me a tic pa nyikway Gerison ma mako kwoŋ Wema ma romo, aka Ithamar wod pa Aron ama laneno ni jotimo tic pajo.

²⁹Paka ri nyikway Merari, ikwani jo gi nonin pajo kodi udi pa kwarere pajo.

³⁰Cako i oro piero adek tundo i oro piero abic, joje ma jonyalo timo tic ma Wema ma romo.

³¹Me a tic pajo paka jotic i Wema ma romo: Joripo tiŋo miango ma tabenakulo, gi nywenye mere, sirin, kodi pende,

³²sirin ma kapido thoko iye je gi pendi jo, loce, thondhe, kodi gigipiny mere je gi tic ma makere gi jo je. Iripo cwoko nyingi kisi gimoro ma joripo tiŋo.

³³Me a tic pa nyikway Merari ma makere gi Wema ma romo, tic pajo je ma makere gi Wema ma romo, ma jadwoŋ mere obedo Ithamar wod pa Aron jacway ri Were i wi migam.

³⁴Ameno Musa kodi Aron kodi jotel ma kacokirok jokwano nyikway Kohath, gi nonin pajo gi udi pa kwarere pajo.

³⁵Cako i oro piero adek tundo oro piero abic, joje m'oyido jonyalo timo tic ma makere kodi Wema ma romo;

³⁶aka welo pajo cungo kwoŋ nonin obedo 2,750.

³⁷Me welo pa nyikway Kohath, jono je ma jotiyo i Wema ma romo, ma Musa kodi Aron jokwano luwo kwoŋ or pa Rwoth ri Musa.

³⁸Me welo pa nyikway Gerison, gi nonin pajo kodi udi pa kwarere pajo,

³⁹cako i oro piero adek tundo oro piero abic, joje ma jonyalo timo tic ma makere kodi Wema ma romo;

⁴⁰welo pajo gi nonin pajo gi udi pa kwarere pajo oyido obedo 2,630.

⁴¹Me welo pa nyikway Gerison, joje ma jotiyo i Wema ma romo, ma Musa kodi Aron jokwano luwo kwoŋ or pa Rwoth.

⁴²Me welo ji ma nonin pa nyikway Merari, gi nonin kodi udi pa kwarere pajo,

⁴³cako i oro piero adek tundo oro piero abic, joje ma jonyalo timo tic ma Wema ma romo.

⁴⁴Welo pajo gi nonin pajo oyido obedo 3,200.

⁴⁵Me welo pa nyikway Merari, ma Musa kodi Aron jokwano luwo kwoŋ or pa Rwoth.

⁴⁶Jono je m'okwan jo kwoŋ Jolevi, ma Musa kodi Aron gi jotel ma Isiraili jokwano, gi nonin pajo gi udi pa kwarere pajo,

⁴⁷cako i oro piero adek tundo oro piero abic, joje ma jonyalo timo tic kodi tic ma bielo bieto ma makere kodi Wema ma romo,

⁴⁸welo pajo je obedo 8,580.

⁴⁹Luwo kwoŋ or pa Rwoth m'omiyo Musa omiyo jo timo tic kweth ma timo gigipiny kosa tiŋo. Ameno apaka go okwano jo, paka Rwoth omiyo Musa or.