Read dhopadhola Mika 3 Bible Online

Mika 3 - dhopadhola bible

Mika 3

¹Kole awaco: Winji win, win jotel pa Isiraili! Kodi jodhum ma ot pa Isiraili! Wiripo ŋeyo tiro.

²Win ma widak bero aka wimaro raco, wiyeco woko pien ma delkwoŋ ji paran, gi riŋo pajo wok kwoŋ cokin pajo.

³Wicamo delkwoŋ ji paran, to wiyeco woko pien ma delkwoŋ jo. Wituro woko cokin pajo mathindho thindho, to wiyaŋo jo pa riŋo m'ikidho bolo iy'ayiga.

⁴To nyaka wiywak ri Rwoth, to Rwoth kiladwoko win go bino kano waŋe kwoŋ win i hongo no, rupiri witimo reco.

⁵Me a gima Rwoth waco ri jotuci wac Were, ma jobano ji paran, aka jociko siem, ri jono ma joculo jo, to lweny ri jono ma jokicul jo.

⁶Riameno labedo wor riwin, m'ongoye lero, aka mudho riwin ma wik'onyal waco gima bino timirok.

⁷Joneno jobino limo wickwot, ibino sewo wi jothieth, jobino mwono dhok gin, rupiri Rwoth kiladwoko jo.

⁸To ri an, apoŋ gi meni, gi Cuny pa Rwoth, kodi tiro aka atek, ma waco ri Yakobo komo pere, kodi ri Isiraili reco pere.

⁹Winji win gime win jotel ma ot pa Yakobo, kodi jodhum ma ot pa Isiraili. Win ma widak tiro aka wiwiro gimo'tire gi gim'okom.

¹⁰Wigeto Zayon gi remo, aka Yerusalem gi komo.

¹¹Jotel mere jothumo banja ro nyewirok, jocway ri Were i wi migam jotiyo ma cul, jotuci wac Were ma pesa, kucel jogoŋere kwoŋ Were to jowaco ni, “Rwoth nitie gi wan, teko k'opodhi kwoŋ wan.”

¹²Riameno kwoŋbedo win ibino furo Zayon paka ndelo, Yerusalem bino cale kidhur gundin, aka tendere ma Ot pa Were bino lokere lul.