Read dhopadhola Mika 7 Bible Online

Mika 7 - dhopadhola bible

Mika 7

¹Kidamba ran! Kole onyo acalo, ŋata kec neko ma kinwaŋ olemo m'odoŋ wi yen, kosa nyingi vini i tiendi yath vini acama. Nyingi vini je gi nyandere je mamit otiek fono woko.

²Joma jolworo Were jorere woko wok i piny, aka ongoye ŋat'otire kwoŋ ji; joje jokuro nekirok, aka kisi nyatoro dwaro omin gi bwo.

³Cingi gin yot timo gimarac, aka jotimo gi kinen. Jodhum gi jothum banja, jokwayo nyew, aka jaŋaŋo waco mito marac mar'adundo pere, to joriwo kanyacel.

⁴Maber kwoŋ jo cale okure, m'otire loyo kwoŋ jo cale kudhin. Ndelo otundo ma Were bino miyo jo gir'acula, paka ogwoko jo luwo kwoŋ jokur pajo, onyo pama jonitie i nyawin.

⁵Ikir'igen jager, kosa mere. Gwokere i gim'iwaco, kada ri dhako perin.

⁶Nyathi ma nyiyac tero bamere gi cay, nyathi manyako kiyere gi min, ciwod dhako dhaw gi adhamere; jakwor pa nyatoro bedo jopeco pere won.

⁷To ri an, abino ŋiyo bongi Rwoth, abino kuro Were ma bino bothan; Were paran bino winjan.

⁸Ikir'isiemere kwoŋan, a jakwor paran; K'apodho, abino ay. K'abedo i mudho, Rwoth bino bedo lero ran.

⁹Abino ciro nge pa Rwoth, rupiri atimo reco kwoŋ go, cuka go ocwaki ran, to thumo ran banja. Go bino wodhan i lero, Abino neno gonyirok pere.

¹⁰Kenyo jakwor paran bino neno, aka wickwot bino umo ŋat'openjan ni, “Nikune Rwoth Were perin?” Waŋan bino neno jakwor paran, onyo ibino nyono go piny, pa cwodho ma ngudo.

¹¹Ndelo bino ma geto kor ot mewin kendo! I ndelo no kew mewin ibino yawo bor.

¹²I ndelo no ji mewin jobino dwoko bongi win, wok Asiria yuwok ceŋ, wok Misir yupiny, wok iy'adec ma malawa Yufrete, wok i nam tundo i nam, kodi wok i got tundo i got.

¹³To piny bino lokere abar, ro kidakana pa ji ma jobed'iye.

¹⁴Kway ji perin gi luth perin Rwoth, ji perin m'itieko yero ma jobedo i thim, nitie lowo maber thoko jo. Weyi doko jowopidhere i Basan kodi Giliad, paka oyido cango con.

¹⁵Paka i hongo ma wiwok i piny Misir, abino nyutho jo gir'aura.

¹⁶Nonin jobino neno gime aka wiy gin bino kwot, makada nende jonitie gi meni; jobino umo dhok gin to ithi gin tho.

¹⁷Jobino naŋo fukefuke pa thwol, pa gigipiny ma jomol piny. Jolabino ka jokirin wok i kapondo pajo, jobino gik bongi Rwoth, Were mawan gi lworo, aka jobino bedo gi lworo kwoŋbedo in.

¹⁸Ongoye were man ma cale in Rwoth, icwako reco pa ji perin ma joboth, ikimaki nge kicutho, t'iwinjo maber i nyutho wan mar perin makiwire.

¹⁹Go bino bedo riwan gi wor kendo, go bino nyono reco mawan gi tiende. Go bino bolo reco mawan je i lutho ma nam.

²⁰Ibino nyutho Yakobo adieri, kodi mar makiwire ri Abraham, paka inyutho kwarere mawan wok cango con.