Read dhopadhola Nahum 1 Bible Online

Nahum 1 - dhopadhola bible

Nahum 1

¹Me menyirok ma mako kwoŋ Ninivi. Ndiko ma menyirok ma Nahum ma wok Elikos oneno.

²Rwoth obedo Were ma janyeko, aka go culo kwor, Rwoth culo kwor aka mako keme. Rwoth culo kwor kwoŋ jokwor pere, aka mako keme kwoŋ jokwor pere.

³Rwoth kimaki nge piyo aka go dwoŋ i meni, i nger moro je Rwoth k'owey ma k'omiyo gir'acula ri jobanja. Yo pere nitie iy'asur kodi i koyo, aka pondeponde obedo fukefuke ma tiende.

⁴Go bwoko nam to loko m'othwo, aka go thwo woko malawin je; Basan kodi Kamel joner, aka kilikalika pa Lebanon ner.

⁵Gote joyengere ruwaŋe, aka tendere jokirin; piny oay malo ruwaŋe, piny gibe kodi jono je ma jobed'iye.

⁶Ŋa manyalo cungo ruwaŋ nge pere? Ŋa manyalo ciro lietho ma nge pere? Keme pere konjere woko paka mac, aka telin mukere piny ruwaŋe.

⁷Rwoth ber, go obedo kapondo i ndelo ma teko; go oŋeyo jono ma jorango kapondo i go.

⁸Gi mikula m'opoŋ de oy, Go lakelo gike makicutho ma kabedo mere, aka lariemo jokwor pere i colo.

⁹Aŋo m'icano kwoŋ Rwoth? Go lakelo i gike kicutho, ongoye teko ma bino ay madirio.

¹⁰Paka kudhin, jowiyere, paka jomero, jomer; ilareyo woko jo paka kanja m'othwo kicutho.

¹¹Wok bongin, owok ŋata cano raco kwoŋ Rwoth, ŋata miyo rieko ma kidakana.

¹²Me apaka Rwoth waco: Makada nende jocowere aka kendo jokweth, ilareyo jo woko to jorumo. Makada nende atieko miyo win litho, akilamiyo win litho kendo.

¹³Aka pama alaturo woko okol pa Asiria ma nyweny kwoŋin, t'aturo woko gima tweyin.

¹⁴Rwoth otieko wodho or kwoŋ Asiria: Nyingin k'onyay kendo; wok i ot pa werin perin alareyo woko, cal kodi nyweny m'ogor. Alayiko kaliel perin, kwoŋbedo isisiri.

¹⁵Neni, wi gote bino tiendi ŋata kelo mikwenda ma siem! Tim kalima perin, awi Yuda, kethi i kare kwoŋirok perin, kole jakidakana k'omonjin kendo; ilareyo go woko kicutho.