Read dhopadhola Habakuk 1 Bible Online

Habakuk 1 - dhopadhola bible

Habakuk 1

¹Me menyirok ma Habakuk jatuci wac Were oneno.

²Awi Rwoth, Anoywak kiri keraŋo ri kony, t'ibedo m'ikiwinjo? Aywak rin ni, “Akaka!” T'ikibothi!

³Raŋo imiyan aneno kidakana kodi teko? Rerok kodi akaka nitie ruwaŋan; kisi dhano ciro gorok kodi dhawirok.

⁴Riameno cik lokere gim'ongoye kony, aka tiro kibedi. Jokidakana jothoko joma timo gim'otire, riameno iwiro tiro.

⁵Ŋiy win nonin, aka winen, wilauro to widhier, kole gim'acegin timo i hongo mewin, wikilayeyo kabedi nende oyido wac rin.

⁶Kole ee acegin tiŋo malo Jokaldin, nono mager aka jodwir, jo ma joŋanjo kisi kamoro i piny, mako kabedo ma k'obedo apajo.

⁷Jobedo joma kelo litho gi lworo; tiro kodi dwoŋ pajo wok bongi jo wegi.

⁸Kayinin pajo jodwire loyo kwace, joyil loyo arare m'othieno; cwo ma jogwey kayinin pajo jogolo piny, aka jobino wok bor swa; joay paka ango ma kwakere cuto gimoro.

⁹Joje jobino ri gwayo, gi waŋ jo ma ŋiyo yuwiy jo; jocoko jotwec paka kwoyo.

¹⁰Jocayo kerin, aka jodhum jolokere ginyero pajo. Jonyero kamoro je m'ogoy'iye cel, jodhuro nono to jomako.

¹¹Kenyo joyweyo paka koyo; joturo cik to jolokere jobanja; meni pajo won obedo were pajo!

¹²Ikibedo wok cene, awi Rwoth Were paran, Ŋataleŋ paran? Wakilatho. Awi Rwoth, itieko ketho kwoŋ jo ranyuth ri thumo banja; aka in, awi Tele, itieko ketho jo ri gir'acula.

¹³Waŋin cil swa ma neno gimarac, aka ikinyal neno teko, raŋo to, iŋiyo jor'akor, aka iliŋ ka jokidakana joreyo woko joma timo gim'otire loyo jo?

¹⁴Itimo dhano paka rec ma nam, paka gigipiny ma jomol ma jongoye gi jadhum.

¹⁵Joje go ywayo malo gi siraget; go toga jo gi katimba, go coko jo i bwo pere; riameno go fore to sangala.

¹⁶Riameno go miyo cowirok ri katimba pere, to waŋo buban ri katimba pere; rupiri gi gigipiny me jolimo cemo, kodi camo cwe.

¹⁷Riameno go omedi celo abor pere, gi reyo woko nonin m'ongoye wor?