Read dhopadhola Zefania 3 Bible Online

Zefania 3 - dhopadhola bible

Zefania 3

¹Kidamba ri Yerusalem, go makoc aka jagwenyirok, tindi madwoŋ m'opoŋ'iye adica.

²Go k'owinjo dwondi Rwoth, go k'oyeyo wotir go, go k'oketho geno pere i Rwoth, go k'ocore cegin gi Were pere.

³Jodhum ma jonitie i go, jobedo simbwore ma johola, jothum banja pere jobedo arara, ma kan odikin tundo ngoye gima joweyo.

⁴Jotuci wac Were pere jogayagaya, cwo ma jotimo akor, jocway ri Were i wi migam pere jokoco Kabedo Maleŋ, jotieko komo cik.

⁵Rwoth timo gim'otire, go kitim gima butiro. Kisi odikin go thumo banja pere, i lero m'ongoye keŋ, to ŋata butiro kuya wickwot.

⁶Atieko reyo woko nonin, kor udi kodi acurcur pajo odoŋ gunda, atieko kisika woko thoyo pajo, m'ongoye ŋata luw'iye, tindin madongo pajo aloko gunda, m'ongoye ji, m'ongoye gima bed'iye.

⁷Awaco ni, “Adieri tindi madwoŋ me lalworan, go layeyo atir go; wiy go k'owil, gi gir'acula m'akelo kwoŋe.” Kucel jo oyido jomito swa, loko tim pajo je marac.

⁸Riameno kuran win, Rwoth waco, ri ndelo m'abino ay paka jakony. Kole ayere coko nonin, ma coko kerin, konjo kwoŋ jo keme paran, lietho ma nge paran je, kole i mac ma nyeko paran, piny gibe larere.

⁹Kenyo alalonyo luwo pa nonin, ŋey jowolwoŋ nyingi Rwoth, aka jowotiy rigo iy'acel.

¹⁰Wok i malawin ma yombo Ethopiya, ji paran ma jokedhere, jono ma jolaman, nyar ji paran ma jokedhere, jolakelo ran mic.

¹¹I ndelo no, wik'obedi giwickwot, ro tim je m'omiyo win gwenyirok kwoŋan, kole alakwanyo woko i dier win, jonoro je, aka wik'odele kendo, wi got paran maleŋ.

¹²Kole alaweyo i dier win, ji ma jomwol aka jobwonere. Jolarango kapondo i nyingi Rwoth;

¹³Joisiraili ma jodoŋ, jokilatimo komo, jokilaluwo misegey, kosa jok'oluw twodo gi lew jo kodi dhok jo. Kenyo jolapidhere to ywomere, m'ongoye ŋata lacando jo.

¹⁴Koki ri kisangala, Awi nyar Zayon, koki malo, Awi Isiraili! Fore aka siemere gi cunyin je, Awi, Yerusalem.

¹⁵Rwoth otieko kwanyo woko thumo banja kwoŋ win, go otieko kwanyo woko jokwor mewin. Kere pa Isiraili, Rwoth, nitie i dier win, wik'olwor teko kendo.

¹⁶I ndelo no ilaluwo kwoŋ Yerusalem, Ikir'ilwor, Awi Zayon, ikir'iwey cingin wolwogere.

¹⁷Rwoth Were perin nitie i dier win, jalweny ma miyo loyo, go lafore kwoŋin gi kisangala, go ladwoŋin gi mar pere; go lasiemere kwoŋin gi wer ma malo.

¹⁸Paka ji ma josangala i kalima, Rwoth waco, atieko kelo i gike atise ma kidamba; t'akwanyo woko wickwot perin.

¹⁹Kole i hongo no alamiyo gir'acula, ri jono ma jodiyin, alabotho jom'oŋol, t'acoko jono ma jongoye gi peco, alaloko wickwot pajo bedo pak, aka jolaŋeyere i piny gibe.

²⁰I hongo no alakelo win peco, i hongo m'abino cok'iye win; kole alamiyo win nyingi win kodi pak, i dier nonin je ma piny, k'anodwoki riwin lim mewin macon, kareno wineno gi waŋ win, Rwoth waco.