Read dhopadhola Hagay 1 Bible Online

Hagay 1 - dhopadhola bible

Hagay 1

¹I oro mar'ario ma dhum pa Kere Dario, k'acel ma dwe mar'aucel, wac pa Rwoth obino luwo kwoŋ Hagay, jatuci wac Were, ri Zerubabel wod Salitiel gavana ma Yuda, kodi Yesuwa wod Yehozadak, jadwoŋ pa jocway ri Were i wi migam.

²Rwoth pa lwak jolweny waco ama: Ji me jowaco ni hongo ma geto kendo Ot pa Rwoth fodi k'otundo.

³Wac pa Rwoth obino luwo kwoŋ Hagay jatuci wac Were ka waco ama:

⁴Me obedo hongo riwin ma bedo i udi mewin m'ocule, kareno ot me ŋare i gunda?

⁵Onyo riameno Rwoth pa lwak jolweny waco ama: Kethi win cuny win kwoŋ yo mewin.

⁶Wicwoyo mathoth, to wikeco manok, wicemo, to wikiyeŋ, wimedho, to wikimer, wirukere, to wikiwinji lietho, ŋata limo cul pere donjo i mugowa m'otuci.

⁷Rwoth pa lwak jolweny waco. Kethi win cuny win kwoŋ yo mewin.

⁸Idhi win malo wi got aka wikel mbawo, wigeti ot, aka ŋey anyal kisangala, t'alimo dwoŋ, apaka Rwoth waco.

⁹Wirango kweth, to neni, olokere mathin, aka munyo wikelo peco, akwadho woko. Raŋo? Rwoth pa lwak jolweny penjo. Kwoŋbedo Ot paran oŋare i gunda, kucel win kisi dhano riwin i ot pere.

¹⁰Riameno polo malo otweyo koth, aka piny otweyo ranyak mere.

¹¹Atieko lwoŋo piny wothwo, kwoŋ gote, kwoŋ ŋano, kwoŋ vini manyen, kwoŋ mo, kwoŋ gima lowo nyak, kwoŋ ji, kwoŋ ogwaŋe, kodi kwoŋ tic ma cingi jo je.

¹²Zerubabel wod Salitiel, Yesuwa wod Yehozadak, gi ji je m'oyido joboth, jowinjo dwondi Rwoth Were pajo, kodi wac pa Hagay jatuci wac Were, paka Rwoth Were pajo ooro go; aka ji jobedo gi lworo ruwaŋ Rwoth.

¹³Kenyo Hagay jamikwenda pa Rwoth oluwo mikwenda pa Rwoth ri ji, ka waco ama: Anitie gi win, Rwoth waco.

¹⁴Aka Rwoth oguro cuny Zerubabel wod Salitiel gavana ma Yuda, kodi cuny Yesuwa wod Yehozadak, jadwoŋ pa jocway ri Were i wi migam, kodi cuny ji m'oyido joboth, aka jobino timo tic i Ot pa Rwoth pa lwak jolweny, Were pajo,

¹⁵ka piero ario g'aŋwen ma dwe mar'aucel i oro mar'ario ma dhum pa Kere Dario.