Read dhopadhola Hagay 2 Bible Online

Hagay 2 - dhopadhola bible

Hagay 2

¹Ka piero ario g'acel ma dwe mar'abirio, wac pa Rwoth obino luwo kwoŋ Hagay, jatuci wac Were ka waco ama:

²Mondo waci ri Zerubabel wod Salitiel gavana ma Yuda, Yesuwa wod Yehozadak jadwoŋ pa jocway ri Were i wi migam, kodi ji ma joboth, aka ipenji jo ni:

³Ŋa kwoŋ win ma fodi odoŋ ma cango oneno ot me i dwoŋ mere macon? Kical riwin i waŋ win paka gim'ongoye?

⁴Kucel pama, bedi m'icwiny Zerubabel, me wac pa Rwoth, bedi m'icwiny Yesuwa wod Yehozadak, jadwoŋ pa jocway ri Were i wi migam, bedi win ma wicwiny, ji je ma lowo, me wac pa Rwoth, tiyi win, kole anitie gi win. Rwoth pa lwak jolweny waco.

⁵Cungo kwoŋ cikirok m'atimo gi win munyo wiwok i Misir, cunyan nitie i dier win, wikiri wibwok.

⁶Kole Rwoth pa lwak jolweny waco ama: Dicel kendo, i hongo macek, alayengo polo kodi piny, nam kodi lowo m'othwo,

⁷aka alayengo nonin je, ŋey lim pa nonin je labino, aka alapoŋo ot me gi dwoŋ, Rwoth pa lwak jolweny waco.

⁸Feza obedo aparan, zahabu obedo aparan, me wac pa Rwoth pa lwak jolweny.

⁹Dwoŋ ma ot me labedo madwoŋ loyo ot macon, Rwoth pa lwak jolweny waco; aka siem labedo i kabedo me, Rwoth pa lwak jolweny waco.

¹⁰Ka piero ario g'aŋwen ma dwe mar'abuŋwen, i oro mar'ario ma dhum pa Dario, wac pa Rwoth obino luwo kwoŋ Hagay jatuci wac Were.

¹¹Rwoth pa lwak jolweny waco ama: Mondo penji jocway ri Were i wi migam, k'iwaco ni,

¹²Ka mogo otiŋo riŋo maleŋ to tiŋo i rinda ma law pere to rinda geyo mugat kosa cemo, kosa vini, kosa mo, kosa cemo mogo je, nyalo lokere maleŋ? Jocway ri Were i wi migam jodwoko aka jowaco ni be.

¹³Hagay openjo kendo ama: Ka ŋata koc ro geyo delkwoŋ gim'otho ogeyo kwoŋ gigipiny me, nyalo lokere makoc? Jocway ri Were i wi migam jodwoko ni ey, lokere makoc.

¹⁴Hagay odwoko ka waco ama: Ameno apaka nitie gi ji me, kodi nono me manitie ruwaŋan, ama apaka Rwoth waco; apaka tic je ma cingi jo nitie, aka gima jomiyo kenyo koc.

¹⁵To riameno, mondo, kethi win cuny win wok i ndelo me kadho yuwaŋe, wok i ndelo mafodi k'ojiengi tele wi tele i Ot pa Rwoth,

¹⁶wok munyo nyatoro obino i kidhur ma piero ario, to nwaŋo nyaka apar; munyo nyatoro obino i bur vini twomo atewe piero abic ma vini, to nwaŋo nyaka piero ario.

¹⁷Agoyo win kodi tic ma cingi win gi two ma nyeko cemo kodi pe; kucel wikidwoko bongan, Rwoth ama luwo.

¹⁸Mondo kethi win adundo mewin i ndelo me kadho yuwaŋe, wok ka piero ario g'aŋwen ma dwe mar'abuŋwen, wok i ndelo m'ocak'iye misingi ma Ot pa Rwoth; kethi win iy'adundo mewin.

¹⁹Nitie kodhi m'odoŋ i dero, vini, kosa yen makuyu, kosa pomo ma bende jonyak gimoro? Wok i ndelo me kadho yuwaŋe alamiyo win silwany.

²⁰Wac pa Rwoth obino kendo madirio ri Hagay ka piero ario g'aŋwen ma dwe.

²¹Luw gi Zerubabel, gavana ma Yuda, iwaci ni: Acegin yengo polo kodi piny,

²²aka alamako kombere ma dhum ma kerin, alareyo woko meni pa kerin pa nonin, alamako cawilin kodi jogwey mere, aka kayinin kodi jogwey jolatho, kisi dhano g'abor pa nyawote.

²³I ndelo no, Rwoth pa lwak jolweny waco, alaterin, Awi Zerubabel ŋeca paran, wod Salitiel, aka alalokin paka peta ma dhum; kole atieko yerin, apaka Rwoth pa lwak jolweny waco.