Read dhopadhola Zekaria 14 Bible Online

Zekaria 14 - dhopadhola bible

Zekaria 14

¹Neni, ndelo pa Rwoth bino, ma gim'onyaga wok bongin ilapoko i dier win.

²Alacoko nonin je i Yerusalem ri lweny, ilamako tindi madwoŋ, ilakinyaga udi, cwo jolapodho kwoŋ mon to jonindo gi jo akar, aka adec ma tindi madwoŋ lakadho i piny man; aka ji ma jodoŋ k'oŋadi jo woko wok kwoŋ tindi madwoŋ.

³Rwoth lakidho lweny gi nonin no, paka go lwenyo i ndelo ma lweny.

⁴I ndelo no par tiende lacungo wi Got Oliv manitie ruwaŋ Yerusalem yuwok ceŋ, aka Got Oliv labare i diere to pokere dirio wok yuwok ceŋ kodi yupodho ceŋ to weyo milelo madwoŋ swa. Adec ma Got acel lapokere yumalo, aka adec man yupiny.

⁵Wiladwire gi milelo ma gote; kole milelo ma gote latundo kiri Azel, aka wilaringo paka wiringo woko kwoŋ yengirok pa piny i hongo pa Uziya kere ma Yuda; aka Rwoth Were paran labino, kanyacel gi jomaleŋ je.

⁶I ndelo no lero kosa ŋico k'obedi.

⁷To labedo ndelo acel m'oŋeyere ri Rwoth, k'obedi odieceŋ kosa wor, kole i hongo m'othieno lero labedo.

⁸I ndelo no pi ma kwo lamol wok i Yerusalem, adec mere lamol kadho i nam yuwok ceŋ aka adec lamol kadho i nam yupodho ceŋ; lamedere i milengela kodi i cwir.

⁹Rwoth labedo kere ma piny gibe; i ndelo no Rwoth labedo acel aka nyingi go acel.

¹⁰Piny gibe lawire, paka Araba wok i Geba tundo i Rimon yupiny ma Yerusalem. To Yerusalem ladoŋ ay malo i kabedo pere wok i Waŋkac pa Benyamin tundo i waŋkac marapena, kiri i Waŋkac ma Sonda, kodi wok iy'acurcur ma Hananel tundo i kadhiŋo vini pa kere.

¹¹Ji jolabed'iye, aka langoye rerok man kendo; aka Yerusalem labedo i siem.

¹²Me labedo two nundu ma Rwoth lagoyo gine ji ma jolwenyo gi Yerusalem; delkwoŋ jo latop kareno jocungo gi tiendi jo, waŋ jo latop i kombe waŋ jo, aka lew jo latop i dhok jo.

¹³I ndelo no, Rwoth labolo nywowirok madwoŋ i dier jo, aka kisi dhano laketho cinge kwoŋ nyawote, kisi dhano latiŋo cinge kwoŋ nyawote.

¹⁴Yuda bende lalweny i Yerusalem; aka lim pa nonin je thoko ilacoko kanyacel, zahabu, feza, kodi nangin, i thotho swa.

¹⁵Thoyamo ma cale gi me bende lamako kayinin, ŋamia, kodi punde, kodi ogwaŋe je ma jobedi i wemin.

¹⁶Bino bedo, ma kisi dhano m'obothi wok i nonin je m'olweny gi Yerusalem, labino kisi oro lamo Kere, Rwoth pa lwak jolweny, kodi timo kalima ma Kayindi.

¹⁷Bino bedo ka pecin moro je ma i piny k'okidhi malo i Yerusalem lamo Kere, Rwoth pa lwak jolweny, jok'olim koth moro je kwoŋ jo.

¹⁸Aka ka peco ma Misir k'okadho malo to jonyuthere, kenyo labino two nundu ma Rwoth goyo gine nonin ma jokidhi malo timo kalima ma kayindi.

¹⁹Me labedo gir'acula ri reco pa Misir kodi gir'acula ri reco pa nonin je ma jok'okidhi malo timo kalima ma kayindi.

²⁰I ndelo no ilandiko iy'olaŋere ma kayinin ni, “Leŋo ri Rwoth.” Degi ma Ot pa Rwoth lacale paka acerin ma ruwaŋ migam.

²¹Degi je i Yerusalem kodi i Yuda labedo maleŋ ri Rwoth pa lwak jolweny, aka jono je ma jolabino miyo cowirok jolatero to joted'iye. I ndelo no, jamitan kilabedo i Ot pa Rwoth pa lwak jolweny.