Read dhopadhola Zekaria 3 Bible Online

Zekaria 3 - dhopadhola bible

Zekaria 3

¹Rwoth onyuthan Yesuwa jadwoŋ pa jocway ri Were i wi migam munyo ocungo ruwaŋ malaika pa Rwoth, aka Sitan oyido ocungo yuracuc pa Yesuwa kisegeya go.

²Rwoth owaco ri Sitan ni, “Abwokin, Awi Sitan! Rwoth m'oyero Yerusalem bwokin! Jacwo me k'obedo kasik mac m'ofudhi wok i mac?”

³Yesuwa oyido oruko nangin m'ocido, aka ocungo ruwaŋ malaika.

⁴Malaika owaco ri jom'oyido jocungo ruwaŋ go ni, “Luny woko nangin m'ocido kwoŋ go.” Aka go owaco ri Yesuwa ni, “Neni, atieko miyo cilo perin oware kwoŋin, aka alarukin gi law ma welo.”

⁵Kenyo awaco ni, “Weyi wokethi junga m'olony i wiye.” Ameno okethi junga m'olony i wiye t'iruko go gi nangin, aka malaika pa Rwoth oyido ocungo cegin.

⁶Malaika pa Rwoth opiro Yesuwa ka waco ni,

⁷“Rwoth pa lwak jolweny waco ama: K'inowothi i yo paran, aka inokur fonji paran, kenyo iladhumo ot paran, aka alamiyin kapido paran bende, aka alamiyin thwolo ma donjo i dier jome ma jocungo ka.

⁸Mondo winji, Awi Yesuwa, in kodi wadin ma jobedo ruwaŋin, jobedo cwo ma gir'aura; kole neni, acegin kelo ri ŋeca paran jange.

⁹Kole neni, tele m'atieko jengo ruwaŋ Yesuwa, wi tele acel labedo waŋ jo abirio, aka neni, acegin goro ndiko mere i iye, Rwoth pa lwak jolweny waco, aka alacwako reco ma lowo no nyaka i ndelo.

¹⁰I ndelo no, Rwoth pa lwak jolweny waco, kisi dhano lalwoŋo jager pere i tiendi yath vini kodi i tiendi makuyu.”