Read dhopadhola Zekaria 9 Bible Online

Zekaria 9 - dhopadhola bible

Zekaria 9

¹Me wac pa Rwoth ma mako kwoŋ lowo ma Hadrak, kodi Damasiko kabedo ma ywomirok. Kole waŋ ji kodi nonin je ma Isiraili, nitie kwoŋ Rwoth.

²Hamath bende, ma gerere gi Tire, kodi Sidon makada nende riek swa.

³Tire ogeto kapondo pere, odhuro feza paka fukefuke, kodi zahabu paka cwodho ma royin.

⁴To neni, Rwoth lakwedo woko go, to bolo woko lim pere i nam, aka mac lareyo woko go.

⁵Asikelon laneno, aka labwok, Gaza bende laneno, aka ladwanyere i litho. Ekiron bende, geno pere lalokere wickwot, Kere larere woko gi Gaza; aka Asikelon kiladoŋ.

⁶Ji m'oruwere jolabedo i Asdod, aka alakwanyo woko noro pa Filistia.

⁷Alakwanyo woko remo mere wok i dhoke, kodi amien mere wok i lake, aka labedo paka gim'oboth ri Were mawan; go labedo paka kwari nono i Yuda, aka Ekiron labedo paka Joyebus.

⁸Alathoko ot paran gi jokur, ŋey wongoye ŋata nyalo donjo kosa wok, ongoye jar'adica ma ladiyo jo kendo, kole pama atieko neno gi waŋan.

⁹Fore swa, Awi nyar Zayon! Koki ri kisangala, Awi nyar Yerusalem! Eno, kere perin labino bongin, gi tiro kodi loyo, gi mwolo ka gweyo punda madhako, i wi nyathi punda madhako.

¹⁰Alakwanyo woko cawilin wok i Efrayim, kodi kayinin ma lweny wok i Yerusalem, kodi aserin ma lweny. Aka go laluwo siem ri nonin, dhum pere labedo wok i nam tundo i nam, wok i jwom kiri i gike je ma piny.

¹¹Paka ri in, ro remo ma cikirok perin, alagonyo jotwec perin wok i bur m'ongoy'iye pi.

¹²Gik win i kapondo, Awi jotwec ma jogeno, konon awaco nike alaculo win dirio.

¹³Kole atieko gondo Yuda paka atum bor paran, atieko timo Efrayim paka aserin mere. Alacewo wotin, Awi Zayon, kwoŋ wotin, Awi Gris, aka alacweyin paka abor pa jameni.

¹⁴Rwoth laneno i wi jo, aka asere pere ladwire paka lithkoth, Rwoth Were lakudho gwara, aka laŋanjo iy'asur ma yupiny.

¹⁵Rwoth pa lwak jolweny lakikwonga jo, aka jolareyo to nyono piny telin ma asumulu, jolamadho remo paka jomadho vini, aka jolapoŋ paka acero, paka sondin ma migam.

¹⁶Rwoth Were pajo labotho jo i ndelo no, paka mwendi pa ji pere, kole jolabedo paka telin ma sangaria, jolaminyin i lowo pere.

¹⁷Bero mere ocale nedi! Ŋono mere ocale nedi! Ŋano kodi vini lamiyo yac kodi nyir dongo matek.