Read dhopadhola Matayo 1 Bible Online

Matayo 1 - dhopadhola bible

Matayo 1

¹Me a bol ma nywolirok pa Yesu Kristo, nyakwar Daudi aka nyakwar Abraham:

²Abraham onywolo Isaka, Isaka onywolo Yakobo, Yakobo onywolo Yuda gi wutmin go;

³Yuda to nywolo Perez gi Zera i yok jo Tamar, Perez onywolo Heziron, Heziron onywolo Ram;

⁴Ram onywolo Aminadab, Aminadab onywolo Nason, Nason onywolo Salimon;

⁵Salimon gi cege Rahab to jonywolo Bowaz, Bowaz gi cege Ruth to jonywolo Obed, Obed onywolo Yese;

⁶Yese onywolo Daudi Kere. Daudi onywolo Solomon ma min oyido obedo cipa Uriya;

⁷Solomon onywolo Rehobowam, Rehobowam onywolo Abija, Abija onywolo Asa;

⁸Asa onywolo Yehosafat, Yehosafat onywolo Yoram; Yoram onywolo Uziya;

⁹Uziya onywolo Yotham, Yotham onywolo Ahaz, Ahaz onywolo Hezekia;

¹⁰Hezekia onywolo Manase; Manase onywolo Amos, Amos onywolo Yosia;

¹¹Yosia to nywolo Yekonia gi wutmin go, gikenyo to itero jo paka ŋecin yu Babilon;

¹²Munyo otiek tero jo yu Babilon, Yekonia onywolo Salutiel, Salutiel to nywolo Zerubabel;

¹³Zerubabel to nywolo Abiud, Abiud to nywolo Eliakim, Eliakim to nywolo Azor;

¹⁴Azor to nywolo Zadok; Zadok to nywolo Akim, Akim to nywolo Eliyudi,

¹⁵Eliyudi to nywolo Eliazar; Eliazar to nywolo Mathan, Mathan to nywolo Yakobo;

¹⁶Yakobo onywolo Yozefu, m'obedo cwor Maria, m'onywolo Yesu m'ilwoŋo ni Kristo.

¹⁷Riameno, wok kwoŋ Abraham tundo kwoŋ Daudi, obedo luse ji apar g'aŋwen; odoko wok kwoŋ Daudi, tundo munyo oter jo yu Babilon, obedo luse ji apar g'aŋwen; kendo wok munyo oter jo yu Babilon tundo kwoŋ Kristo, bende obedo luse ji apar g'aŋwen.

¹⁸Me apaka nywolirok pa Yesu Kristo obedo: Munyo Yozefu fodi oyido nyaka jocikere nywomirok kodi Maria min Yesu, mafodi k'orwako go i ot, to nenere ni go oyido otieko gamo iye i meni pa Cuny Maleŋ.

¹⁹Gikenyo Yozefu cwore, rupiri oyido obedo dhano m'otire aka k'omito miyo go wickwot, oyido paro weyo go nyaliŋliŋ.

²⁰Neni, munyo fodi go paro ameno, malaika pa Rwoth to bino rigo i lek, to waco rigo ni, “Yozefu wod pa Daudi, Ikir'ilwor rwako Maria bedo dhako perin, rupiri go yac gi meni pa Cuny Maleŋ.

²¹Go bino nywolo nyathi majayac, aka ibino cwoko nyinge ni Yesu; rupiri go ama bino botho ji pere kwoŋ reco pajo.”

²²Gino je otimere, ŋey gima jatuci wac Were oluwo wotundi i kare ni,

²³“Nyako mambula bino gamo iye, to nywolo nyathi majayac, m'ibino cwoko nyinge ni Manwer.” Dwoŋ mere ni, “Were nigi wan.”

²⁴Yozefu munyo ocew, to timo paka malaika pa Were owaco rigo, to tero Maria bedo cege;

²⁵aka k'obedo gine tundo munyo ocowo nywolo nyathi no to cwoko nyinge ni Yesu.