Read dhopadhola Matayo 11 Bible Online

Matayo 11 - dhopadhola bible

Matayo 11

¹Munyo Yesu ocowo fonjo jofonjirok pere apar g'ario, oeye kenyo to kidho fonji gi tito Wac Manyen Maber i tindin macegin gi kenyo.

²Aka munyo Yohana Jakibatisa owinjo gi i twec kwoŋ tic pa Kristo, ooro jofonjirok pere megi bonge.

³Jopenjo Yesu ni, “Waci riwan, in a ŋat'owaci nike labino kosa wakur ŋatiman?”

⁴Yesu odwoko ni, “Gik wiwaci ri Yohana gima pama wiwinjo kodi ma wineno.

⁵Joma waŋ gin otho joneno, jom'oŋol jowotho, jodhowo jolony, joma ithi gin otho jowinjo, aka jom'otho icerino jo, aka ifonjo jocandi Wac Manyen Maber.

⁶Jasilwany a ŋata kibedi gi kiganagana kwoŋan!”

⁷Munyo jofonjirok pa Yohana joay jodok, Yesu oluwo ri lwak ji kwoŋ Yohana ni, “Munyo wikidho both Yohana i thim, onwaŋo wigeno neno aŋo? Midole ma koyo yengo?

⁸To aŋo won ma wikidho yukoro neno? Neno dhano m'orukere i nangin mabeyo mayom? Kole joma ruko nangin mayom no jonwaŋere i udi pa kerin ayino.

⁹To yagi, aŋo won m'otero win korago? Neno jatuci wac Were? Adieri awaco riwin, go loyo kiri jatuci wac Were.

¹⁰Me a ŋat'ondiki kwoŋe ni, ‘Eno adhiro jamikwenda paran yuwiyin, ma bino yiko rin royo.’

¹¹Adieri awaco riwin, kwoŋ wot mon je, ongoye m'otieko yudhere malo i dwoŋ loyo Yohana Jakibatisa. Kucel, kada ŋat'oasa thin i Ker ma polo je loyo go gi dwoŋ.

¹²Wok i ndir pa Yohana Jakibatisa tundo konon, otiek monjo Ker ma polo gi maker, aka ji ma jomaker jodonj'iye gi mbaka.

¹³Ato jotuci wac Were je kodi Cik pa Musa, joluwo kwoŋ Ker pa Were tundo ndir pa Yohana;

¹⁴aka ka wiyeyo gim'awaco, go ama obino paka Elia m'onwaŋo ripo bino.”

¹⁵Ŋata nigi ithe wowinji!

¹⁶“To onyo anopima luse ji ma pama g'aŋo? Jocale nyithindho ma jo ni dier kisia. Bwora acel koko ri nyawote ni,

¹⁷‘Wakudho riwin madundo mamit, to wikwero miel! Wawero riwin wer tho, to wikwero ywak!’

¹⁸Neni Yohana obino ma riyo kec aka kimedhi, to jowaco ni, ‘Nigi jwogi kwoŋe.’

¹⁹Onyo wod Dhano obino ma cemo aka oro gir'amadha, to jowaco ni, ‘Panen jaworo ma jamadhi vini, jawodhi jocoki misolo kodi joreco!’ Kucel rieko pa Were ineno adieri mere cungo kwoŋ tim ma wok'iye.”

²⁰Gikenyo Yesu ocako kwoŋo tindin ma go oasa tim'iye gir'aura rupiri ji jok'oŋuto reco pajo.

²¹“Kidamba otundi riwin, Korazin! Kodi Bethsayida! Kole bedi gir'aura m'otimi i win tim i Tire kodi Sidon, di ji ma kenyo joruko kutiya, to jobukere gi buru ma nyutho ni joŋuto reco pajo.

²²To awaco riwin, ndelo ma thumo banja bino bedo ma dhe ye ri Tire kodi Sidon loyo riwin.

²³Aka in, Kapernaum, oyido imito wotiŋin malo kiri i polo? Ilabolin i piny pa jom'otho ayino. Ato bedi gir'aura m'otiek timo rin tim i Sodom ayin, kole di Sodom fodi nitie kiri konon.

²⁴To awaco rin, i ndelo ma thumo banja Sodom bino limo gir'acula ma dhe ye loyin.”

²⁵I hongo no Yesu owaco kamaler ni, “Afoyin Baba, Rwoth ma polo gi piny, rupiri ipano gigipiny me ri jomariek kodi jom'ofonjere t'iwodho kamaler ri nyithindho ayino.

²⁶Ey, Baba, kole ama apaka cunyin osangala ni wotimere.

²⁷Baba otieko miyan gimoro je, aka onyo ongoye ŋat'oŋeyo Wode kwanyo woko Bamere, kendo ongoye ŋat'oŋeyo Bamere kwanyo woko Wode kodi joma Wode odiero nyutho jo kamaler.

²⁸Biye win bongan wijoje ma wiol aka wilacere i tiŋo bieto mapek, labino miyo win ywomirok.

²⁹Biel win okol paran i ŋuti win aka wifonjere kwoŋan; kole abedo moth aka abwonere iy'adundo paran; aka wibino nwaŋo ywomirok i cuny win.

³⁰Kole okol paran yot aka bieto paran sew.”