Read dhopadhola Matayo 13 Bible Online

Matayo 13 - dhopadhola bible

Matayo 13

¹I ndelo no won, Yesu owok i ot to kidho i thengi wakawaka kama go obed'iye piny wofonji ji.

²Paka lwak ji m'othoko go onwaŋo oasa dwoŋ, go odonjo i ye to bedo, kareno ji je jocungo i thengi pi.

³Go ooro agecin munyo luwo rijo kwoŋ gigipiny madit. “Onwaŋo nitie dhano m'okidho cwoyo.

⁴Munyo go bayo kodhi i ndelo, megi opodho i thengi yo to winyin jobino to jocamo woko.

⁵Megi opodho i lowo ma wi tele, kama lowo oyido rep'iye. Kodhi no okwako twi, rupiri lowo oyido rep.

⁶Aka munyo ceŋ oliel, gim'otwi no oner woko; odoko paka tiendi gim'otwi no onwaŋo fodi k'odonjo bor i lowo, gino je othwo woko mayot.

⁷Kodhi megi opodho i kudhin, to kudhin no dongo to diyo woko gim'otwi no.

⁸To kodhi megi podho i lowo ma diwa, to nyak: Megi nyinge miya acel, megi piero aucel, megi piero adek.”

⁹Gikenyo to Yesu waco ni, “Ŋata nigi ithe wowinji!”

¹⁰Gikenyo jofonjirok jobino bongi Yesu to jopenjo go ni, “Raŋo ma ioro agecin ma luwo gi jo?”

¹¹Yesu odwoko ni, “Rieko manyaliŋliŋ ma Ker ma polo omiy win, to k'omiy jo.

¹²Kole dhano manitie gi gimoro ibino medo go man to bedo kodi gima kalo ma go yenyo, to ŋat'ongoye gi gimoro ibino kwanyo woko kwoŋe kada nyaka mathin ma go oyido nitie gine.

¹³Me am'omiyo aoro agecin ka aluwo gi jo, rupiri joŋiyo to jokinen, jociko ithi gin to jokiwinji, odoko jokiniaŋ dwoŋ mere.

¹⁴Am'omiyo wac pa Isaya jatuci wac Were otundo i kare ni, ‘Adieri wibino ciko ithi win, to wik'oniaŋ; odoko wibino ŋiyo, to wik'oniaŋ dwoŋ gima wineno.’ ”

¹⁵“Rupiri cuny jome olokere manwaŋ, ithi gin onyo kiwinji, aka waŋ gin jomiyo woko. Kole waŋ gin d'onyalo neno, odoko ithi gin d'onyalo winjo, kendo paro pajo d'onyalo niaŋ dwoŋ wac, to jogik bongan, aka ameno d'abotho jo.”

¹⁶To win wijosilwany swa! Waŋ win neno aka ithi win winjo.

¹⁷Adieri awaco riwin! Jotuci wac Were mathoth kodi ji pa Were mathoth cango joyenyo swa neno gima wineno, to jok'onyalo neno, kodi winjo gima wiwinjo, to jok'onyalo winjo.

¹⁸“Onyo ciki win ithi win aka wifonjere dwoŋ ageca pa jacwoyo.

¹⁹Ka nyatoro winjo mikwenda kwoŋ Ker to kiniaŋ dwoŋ mere, jwogi bino to mayo go woko gim'onwaŋo ocwoy i adundo pere; me a kodhi m'opodho i thengi royo.

²⁰Kodhi m'opodho i lowo ma wi tele nyutho joma jolo mikwenda gi kisangala tekin jowinjo.

²¹To wac no kiroci i cuny jo. Am'omiyo ka teko kosa candirok moro obino ro wac no, jonyocere piyo.

²²Kodhi m'opodho i kudhin nyutho joma winjo mikwenda, to rembo ri kwo ma piny kodi maro ŋaŋo, diyo wac no piny to lokere gima kinyak.

²³Aka kodhi m'ocwoy i lowo ma diwa nyutho joma winjo mikwenda to joniaŋ dwoŋ mere; jonyak gima beyo, megi miya acel, megi piero aucel, megi piero adek.”

²⁴Yesu oluwo rijo iy'ageca man ama: “Ker ma polo cale dhano m'ocwoyo kodhi maber i ndelo pere.

²⁵Obedo wor acel, munyo dhano je oyido nindo, jakwor obino to cwoyo weeyo i dier ŋano no, to kadho.

²⁶Munyo gim'ocwoy odongo to cako ŋok, weeyo bende to nenere.

²⁷Jotic pere jobino bonge to jowaco ni, ‘Jadwoŋ, kole icwoyo kodhi maber i ndelo perin; to weeyo odoko owok yukune?’

²⁸Go odwoko ni, ‘Jakwor moro am'otimo ameno.’ To jopenjo go ni, ‘Iyenyo wakidhi wafudhi woko weeyo no?’

²⁹Go odwoko ni, ‘Be, rupiri ka wiero coko weeyo no winyalo fudho gi ŋano bende.

³⁰To weyi kutho joje jowodongi kanyacel cuka ndelo ma keco otundi, aka anowaci ri joma keco ni: Kutho fudhi win woko weeyo witwey kanyacel i wic ma bolere i mac, ŋey gikenyo nyaka wicoki ŋano to wiketho i dero paran.’ ”

³¹Yesu oluwo rijo iy'ageca man ama: “Ker ma polo cale kodhi m'odhilo, m'oasa thin kwoŋ kodhi man je;

³²dhano kwanyo to pidho i ndelo pere, aka ka otieko dongo loyo gima twi je gi dwoŋ. Go lokere yath ma winyin jobino to jogero od gin i jange.”

³³Yesu odoko oluwo rijo iy'ageca man ama: “Ker ma polo cale thow ma dhako nyalo kwanyo to ruwo gi moko i nywero cuka moko gipi yenyo.”

³⁴Yesu oluwo ri lwak ji i agecin i gigipiny m'owaci me je; go k'owaco gimoro ri ji ma k'ooro ageca.

³⁵Go otimo ameno ma miyo gima jatuci wac Were owaco wotundi i kare ni, “Abino oro agecin ka aluwo gi jo, abino waco rijo gim'oyido opanere wok i cwec pa piny.”

³⁶Gikenyo Yesu oeye bongi lwak ji to donjo i ot. Jofonjirok pere jobino bonge to jowaco ni, “Tuci riwan dwoŋ ageca ma weeyo man i ndelo.”

³⁷Yesu odwoko ni, “Ŋat'ocwoyo kodhi maber, meno Wod Dhano;

³⁸ndelo, meno piny me; kodhi maber meno nyithindho ma Ker pa Were; weeyo meno nyithindho pa jwogi;

³⁹aka jakwor m'ocwoyo weeyo meno jwogi won. Ndelo ma keco meno gik ndir, aka jokeco meno jomalaika.

⁴⁰Aka paka icoko weeyo t'iwaŋo i mac, apaka bende bino bedo i hongo ma gik ndir:

⁴¹Wod Dhano bino oro jomalaika bino coko wok i ker pere gimoro je ma miyo ji timo gimarac, kodi joreco je,

⁴²to jobolo jo i kendo madwoŋ ma mac, kama jobino ywak'iye kareno jokayo laki gin.

⁴³Aka joma jotire jobino liel pa mac i Ker pa Bajo. Am'omiyo winji win ka winitie gi ithi win!”

⁴⁴“Ker ma polo cale ŋaŋo m'opan i ndelo. Dhano moro ocombo kwoŋe, gikenyo to umo kendo. Go odok gi kisangala m'omiyo go okidho to tana woko gigipiny man je ma go oyido nitie gine, to gik nyewo ndelo no.”

⁴⁵“Ker ma polo bende cale janyew ma rango ge ma welo.

⁴⁶Ka go onwaŋo ma welo tektek, go kidho to tana woko gigipiny man je ma go oyido nitie gine, to gik nyewo ge no.”

⁴⁷“Ker ma polo bende cale bwo ma jokitoga jobolo i wakawaka, to jomako rec ma nger je.

⁴⁸K'otieko poŋ, jokitoga joywayo wi geŋin i thengi pi to jobedo piny poko rec: Mabeyo mere iketho iy'atewe, aka m'ongoye kony mere ibolo woko.

⁴⁹Meno apaka bende bino bedo i ndelo ma rumacen: Jomalaika jolabino to jokwanyo woko joreco bongi jom'otire,

⁵⁰to jobolo jo i kendo madwoŋ ma mac. Kenyo jobino ywak'iye kareno jokayo lak gin.”

⁵¹Yesu openjo jo ni, “Winiaŋ dwoŋ gigipiny me?” Jodwoko ni, “Ey.”

⁵²Gikenyo go odwoko ni, “Am'omiyo, kisi jandiko ma Cik m'otiek fonjo ri Ker ma polo, cale gi won peco ma wodho gigipiny macon kodi manyen je wok i dero pere.”

⁵³Munyo Yesu ocowo waco agecin me, oeye kenyo,

⁵⁴to gik i tindi pajo. Go ofonjo i kalamo ma Yuda, aka joma jowinjo fonji pere jodhier swa. Jopenjo ni, “Go onwaŋo kune rieko me kodi meni ma timo gir'aura?

⁵⁵Me won k'obedo wod pa japac? Yokimere ki Maria, aka Yakobo, Yozefu, Simon, kodi Yuda meno ki wutmin go?

⁵⁶Nyimin go je jokinitie ka gi wan? Go onwaŋo gime je kune?”

⁵⁷Gikenyo jokwero go. Yesu owaco rijo ni, “Jatuci wac Were imiyo dwoŋ iye je kwanyo woko i tindi pajo won kodi i peco pajo won.”

⁵⁸Go k'otimo gir'aura madit kenyo kwoŋbedo onwaŋo jongoye gi yeyo.