Read dhopadhola Matayo 14 Bible Online

Matayo 14 - dhopadhola bible

Matayo 14

¹I ndir ma Herode oyido obedo rwoth ma Galili, owinjo kwoŋ Yesu.

²Go waco ri jolweny pere ni, “Me Yohana Jakibatisa won ama ocerino, am'omiyo meni ma timo gir'aura me nitie i go.”

³Ato Herode ama ndir ca owodho or ni womaki Yohana wotwey, t'iketho go i katwec. Go otimo ameno ro wac pa Herodia, cipa omin go m'ilwoŋo ni Filipo,

⁴rupiri Yohana omena waco ri Herode ni, “K'obedo gim'otire bedo gi dhako no!”

⁵Herode oyenyo neko go to oyido lworo Joyuda, rupiri oyido jotero Yohana paka jatuci wac Were.

⁶I ndelo ma poyo nywolirok pa Herode, nyapa Herodia omielo i nyim wendo gibe. Herode osangala gine swa,

⁷m'omiyo ociko nyano ni, “Akwoŋere nike abino miyin gimoro je m'inokwayan!”

⁸Paka yokimere omiyo go rieko, go okwayo ni, “Miyan wic Yohana Jakibatisa i sen ka!”

⁹Kere ogut, to ro kwoŋirok pere ma go oyido otieko timo i nyim wendo pere gibe, go owodho or nike gima nyano oyenyo womiy go.

¹⁰Ameno go ooro ji kidho ŋondo wic Yohana i katwec.

¹¹Wic no okeli i ot i sen t'imiyo nyano to tero bothi yokimere.

¹²Jofonjirok pa Yohana jobino, jokwanyo delkwoŋe, to joyiko aka jokidho to jowaco ri Yesu.

¹³Munyo Yesu owinjo wac no, oeye kenyo gi ye to kidho kakende. Munyo ji jowinjo gino, joluwo go wok i tindin pajo.

¹⁴Yesu owok i ye, aka munyo oneno lwak ji, omako wor i cunye gi jo, to botho jotwo pajo.

¹⁵Othieno no, jofonjirok pere jokidho bonge to jowaco ni, “Kole piny otieko yutho, aka ka dier thim. Sewila ji jowokidhi loka jowonyew cemo.”

¹⁶Yesu odwoko ni, “Jokiripi eye ka. Wiwegi miy win jo cemo moro jowocami.”

¹⁷Jodwoko ni, “Gima wanitie gine k'obedo nyaka mugat abic kodi rec ario kende.”

¹⁸Yesu owaco ni, “Keli gino je bongan ka.”

¹⁹Gikenyo ooro ji bedo piny i lum, aka okwanyo mugat abic gi rec ario no, oŋiyo malo i polo, to foyo Were. Go oturo mugat no to miyo jofonjirok, aka jofonjirok jokwanyo to jopoko ji.

²⁰Dhano je ocemo to yeŋ. Rumacen jofonjirok jocoko ŋinjeŋinje m'odoŋ to poŋo aditin apar g'ario.

²¹Welo cwo ma jocemo onwaŋo romo cegin gana abic, ma k'okwan mon gi nyithindho.

²²Gikenyo Yesu omiyo jofonjirok pere donjo i ye jowotel kidho rigo yu loka ma koca ma wakawaka, kafodi go won oyido sewila ji.

²³Munyo otieko kisewila ji, go okutho oidho wi got kende kwayo. Munyo piny otundo othieno, Yesu oyido nikenyo kende,

²⁴kareno ye otundo bor i wakawaka lwenyo gi pi ma sira, aka asur oyido kudho wok yuwiye.

²⁵I dier sawa abuŋwen kodi apar g'ario m'odikin, Yesu obino bongi jo munyo wotho wi pi.

²⁶Munyo jofonjirok joneno go wotho wi pi, lworo omako jo. Jowaco ni, “Manago yamo!” To jokoko gi lworo.

²⁷Piyo piyo no to Yesu luwo gi jo munyo waco ni, “Wikiri wirembi, me an. Wikiri wilwor.”

²⁸Gikenyo Petero oluwo malo ni, “Rwoth, ka meno in adieri, oran awok abin bongin wi pi.”

²⁹Yesu owaco rigo ni, “Biye.” To Petero wok i ye to wotho wi pi munyo kidho bongi Yesu.

³⁰To tekin go neno asur, lworo omako go to cako munyirok i pi. Gikenyo go okoko ni, “Rwoth! Bothan!”

³¹Yesu ocwayo cinge mayot to mako go munyo waco ni, “Ijayeyo mathin. Raŋo ma iganagana?”

³²Aka munyo jotieko donjo i ye to asur kwe.

³³Jom'onwaŋo niye jolamo go ka jowaco ni, “Adieri, ibedo Wod Were.”

³⁴Jocewere aka jotundo loka ma Genesaret.

³⁵Munyo ji ma kenyo joŋeyo ni meno Yesu, jodhiro wac ri ji ma jonigi jotwo iy'adec ma piny no to jokelo jotwo bongi Yesu.

³⁶Jokwayo go nike woyeyi jotwo jowogey kada nyaka dhok nanga pere won; aka joma jogeyo go je jobedo maber.