Read dhopadhola Matayo 17 Bible Online

Matayo 17 - dhopadhola bible

Matayo 17

¹Rumacen ma ndelo aucel, Yesu okwanyo Petero kodi wutmere Yakobo gi Yohana, to tero jo wi got mabor kakendi gin.

²To go lokere ruwaŋ jo kenyo: Waŋe olokere maliel pa waŋceŋ, aka nangin pere olokere matar pa lero.

³Gikenyo jofonjirok no joneno menyirok pa Musa kodi Elia munyo joluwo gi Yesu.

⁴Gino omiyo Petero oluwo ka waco ri Yesu ni, “Rwoth, ber wabedi ka; k'iyenyo, abino gero ka kayindere adek, acel aperin, man apa Musa, gi man apa Elia.”

⁵Munyo go oyido fodi luwo, pondeponde matar obino to thoko jo aka dwondi moro m'owok i pondeponde owaco ni, “Me Wodan m'amaro kendo asangala gine; winji win go!”

⁶Munyo jofonjirok jowinjo dwondi me, jogore piny ma jokulo wiy gin kareno lworo omako jo.

⁷Yesu obino bongi jo to geyo jo, to waco ni, “Ay win malo. Wikiri wibedi malwor!”

⁸Aka munyo joŋiyo malo jok'oneno dhano moro je kwanyo woko Yesu won kende.

⁹Munyo jotieko loro wok wi got, Yesu ociko jo teltel ni, “Wikiri wiwaci ri moro kwoŋ gim'onenere me cuka Wod Dhano otiek cerino kwoŋ jom'otho.”

¹⁰Gikenyo jofonjirok jopenjo Yesu ni, “Raŋo ma jondiko jowaco ni Elia kutho ripo pen bino?”

¹¹Yesu odwoko ni, “Elia ama kutho pen bino, aka go ripo yiko kisi gimoro wobedi i kare.

¹²To awaco riwin, Elia otieko kiri bino to ji jok'oŋeyo go, aka jotimo rigo paka joyenyo. I royo acel Wod Dhano bende bino candere i cingi jo.”

¹³Gikenyo jofonjirok joniaŋ nike go luwo rijo kwoŋ Yohana Jakibatisa.

¹⁴Munyo jotundo bongi lwak ji, jal moro obino bongi Yesu, ogoyo conge ruwaŋe,

¹⁵aka owaco ni, “Jadwoŋ, tim wor ri wodan! Go tho fum ma monjo go marac aka miyo go podho noknok i mac kosa i pi.

¹⁶Akelo go bongi jofonjirok perin to jok'onyalo botho go.”

¹⁷Yesu odwoko ni, “A ji ma buyeyo ma jok'otire! Anobedi gi win kiri keraŋo? Anodiy cunyan gi win kiri keraŋo? Keli jayac no bongan ka!”

¹⁸Yesu ooro jwogi no wok to wok, to jayac no both gi i hongo no won.

¹⁹Gikenyo jofonjirok jobino bongi Yesu nyaliŋliŋ to jopenjo go ni, “Raŋo ma wakinyalo riemo woko jwogi no?”

²⁰Yesu odwoko ni, “Ro yeyo mewin manok. Adieri awaco riwin, bedi winitie gi yeyo marom gi nyingi kalantus, diwinyalo waco ri got me ni, ‘Eye ka ikadhi yukoca.’ To bende timo ameno, aka ongoye gima dik'onyalere riwin.

²¹[To jwogi nger me, kiwoki kwanyo woko ka kwayo gi riyo obedo”].

²²Munyo jofonjirok je jobino kanyacel i Galili, Yesu owaco rijo ni, “Wod Dhano icegin kisita go t'iketho go i cingi ji,

²³aka jobino neko go; to ndelo mar'adek ibino cerino go kwoŋ jom'otho.” Jofonjirok cuny gin oramo jo swa.

²⁴Munyo Yesu kodi jofonjirok pere jobino Kapernaum, jocoki misolo ma Ot pa Were jobino bongi Petero to jopenjo go ni, “Jafonji mewin culo misolo ma Ot pa Were?”

²⁵Petero odwoko ni, “Go culo.” Munyo Petero odonjo i ot, Yesu ama open luwo malo ni, “Simon, iparo nedi? Kerin ma piny jocoko tonton kosa misolo kwoŋ jokune? Kwoŋ ji pajo wegi kosa kwoŋ jowiloka?”

²⁶Petero odwoko ni, “Kwoŋ jowiloka.” Ana Yesu, “Am'omiyo, dwoŋ mere ni ji ma piny no jonitie i siem, jokicul.

²⁷To wakimiti ramo cuny jome, am'omiyo kidhi i wakawaka ibol'iye siraget; kwany rec m'inoyway marapena, aka i dhoke ibino nwaŋ'iye pesa ma feza ma roman kodi win culo misolo ma Ot pa Were; kwany iculi jo misolo mawan.”