Read dhopadhola Matayo 19 Bible Online

Matayo 19 - dhopadhola bible

Matayo 19

¹Munyo Yesu ocowo waco gigipiny me, oweyo Galili to kidho iy'adec ma Yuda, loka man ma jwom Yordan.

²Lwak ji joluwo go kenyo, to botho jo.

³Jofarisayo megi jobino bonge to jotemo ciko go munyo jopenjo go ni, “Cik mawan yeyo dhano riemo cege ro wac moro je?”

⁴Yesu odwoko ni, “fodi wikisoma ndiko ma waco ni ŋat'ocweyo jo wok i cakirok ocweyo jacwo gi dhako,

⁵to waco ni, ‘R'atoŋa me jacwo bino weyo bamere gi yokimere to cwire kwoŋ cege, aka jario jobino lokere del acel.

⁶Am'omiyo onyo jokibedi j'ario, to del acel.’ Riameno gima Were otieko riwo kanyacel, moro wokiri wopok.”

⁷Jofarisayo jopenjo go ni, “Raŋo to ma Musa omiyo or ni jacwo womiy cege balwa ma ridho ni jopokere ka riemo go?”

⁸Yesu odwoko ni, “Musa oyeyo win riemo mon mewin rupiri cuny win nwaŋ. To oyido k'obedo ameno wok i ndelo ma cwec.

⁹Awaco riwin, ŋata riemo cege ma k'obedo rupiri otimo cot, to nywomo dhako man, meno otimo cot. [Kendo ŋat'onywomo dhako m'oriem bende meno otimo cot”].

¹⁰Jofonjirok pere jowaco ni, “Ka meno a gima nitie i dier jacwo gi dhako, kere ber loyo ka dhano k'onywomo.”

¹¹Yesu odwoko ni, “Ongoye ŋata nyalo yeyo fonji me, kwanyo woko joma Were omiyo jo kende.

¹²Kole nitie wac m'opokere opokere ma miyo ji weyo ma jok'onywomo: Jomegi rupiri onywol jo ameno, joman kwoŋbedo ji jokolo to loko jo ameno; aka joman jokinywom ro miyo kwo pajo ri tic ma Ker ma polo. Ŋata nyalo niaŋ wojol fonji me.”

¹³Jomogo jokelo nyithindho bongi Yesu nike wokethi cinge i wiy jo wokway rijo, to jofonjirok jobwoko jo.

¹⁴Yesu owaco ni, “Weyi win nyithindho jowobin bongan, aka wikiri wijuki jo, rupiri Ker ma polo obedo ri joma pameno.”

¹⁵Gikenyo go oketho cinge kwoŋ jo to kadho.

¹⁶Ndelo moro jayac moro obino bongi Yesu to penjo go ni, “Jafonji, bero aŋo m'aripo timo aka alimi kwo makirum?”

¹⁷Yesu odwoko ni, “Raŋo m'ipenjan kwoŋ gimaber. Nitie ŋat'acel kende maber. Maki or k'imito donjo i kwo.”

¹⁸Go openjo ni, “Or mene?” Yesu odwoko ni, “ikir'ineki, Ikir'itim cot, Ikir'ikwal, ikir'icway misegey ma twodo,

¹⁹lwor benin gi yokin; odoko mari nyawotin paka iwon imarere.”

²⁰Jayac no odwoko ni, “Atieko mako or no je. Aŋo m'odoko odoŋ ran atima?”

²¹Yesu owaco rigo ni, “K'iyenyo bedo ŋataber kicutho, kidhi itana gimoro je m'inigine aka pesa mere imiy jocandi, aka ibino bedo gi ŋaŋo i polo; ŋey nyaka ibin iluwan.”

²²Munyo jayac no owinjo wac no, okadho m'ogut kwoŋbedo go oyido nigi ŋaŋo madit swa.

²³Gikenyo Yesu owaco ri jofonjirok pere ni, “Adieri awaco riwin, bino bedo matek swa ri jaŋaŋo donjo i ker ma polo.

²⁴Odoko awaco riwin, yot ri ŋamia donjo i yore piso loyo ri jaŋaŋo donjo i Ker pa Were.”

²⁵Munyo jofonjirok jowinjo gime, jodhier tektek. Jopenjo ni, “K'ameno onyo ŋa won manyalo both?”

²⁶Yesu oŋiyo jo tirtir aka odwoko ni, “Gime kinyalere ri ji; to ri Were gimoro je nyalere.”

²⁷Gikenyo Petero oluwo malo ka waco ni, “Panen, watieko weyo gimoro je to waluwin. Wanolimi aŋo?”

²⁸Yesu owaco rijo ni, “Adieri awaco riwin, i ndir manyen, ma Wod Dhano bino bed'iye wi kom pere ma dhum ma didwoŋ, gikenyo wijapar g'ario ma wiluwan bende wibino bedo wi kombere ma dhum apar g'ario, kareno withumo banjin ri nonin apar g'ario ma Isiraili.

²⁹Aka nyatoro je m'oweyo udi, kosa wutmin, kosa nyimin go, kosa bamere, kosa min, kosa nyithindho, kosa ndelin ro an, bino limo kendo dimiya acel, kanyacel gi kwo makirum.

³⁰Aka ji mathoth ma pama jobedo marapena jobino bedo macowe, aka ma jobedo macowe ama jobino bedo marapena.”