Read dhopadhola Matayo 2 Bible Online

Matayo 2 - dhopadhola bible

Matayo 2

¹Munyo otiek nywolo Yesu i tindi ma Bethelehem, i Yuda i ndir ma Herode oyido kere, jorieko moro ma jofonjere kwoŋ micalin jowok yuwok ceŋ to jobino Yerusalem;

²aka jopenjo ni, “Nikune nyathi m'onywol bedo kere pa Joyuda? Waneno micala pere munyo owok yuwok ceŋ am'omiyo onyo wabino lamo go.”

³Munyo Kere Herode owinjo gime, obwok, aka kiri gi ji man je i Yerusalem.

⁴Go olwoŋo jotel pa jocway ri Were i wi migam je kodi jondiko kanyacel to penjo jo ni, “Ibino nywolo Kristo kune?”

⁵Jodwoko ni, “I tindi ma Bethelehem, i Yuda.” Me a gima jatuci wac Were ondiko ni,

⁶“In Bethelehem, i piny pa Yuda, iŋat'ikithin loyo i dier jodhum ma Yuda; kole kwoŋin ama jatel bino wok'iye, ma bino bedo jakwath pa Joisiraili.”

⁷Gikenyo Herode olwoŋo wendo ma jowok yuwok ceŋ no i romo manyaliŋliŋ, aka oŋeyo kwoŋ jo ndir won ma micala no omenyer'iye rijo.

⁸Gikenyo ooro jo Bethelehem gi wac me: “Kidhi win wirangi kama di nyathi no maber aka ka winwaŋo go wimiyan ŋeyo, ŋey abende abin alam go.”

⁹Gi wac me joeye kenyo, aka munyo oyido jowotho i royo, joneno micala ma ndir ca joneno yuwok ceŋ, m'otelo jo cuka otundo to cungo kama nyathi no oyido niye.

¹⁰Josangala swa, kendo jowinjo maber m'oasere munyo joneno micala no!

¹¹Jodonjo i ot to joneno nyathi bongi Maria yokimere. Joguro congi gin piny jolamo go, to joyawo migowe pajo, to jocwayo mic: Zahabu, buban, kodi mo maŋwe kur.

¹²Were onyutho jo i lek nike jokiri jogik kendo pa Herode, riameno jodok yupiny pajo gi royo man.

¹³Munyo jotieko kadho, malaika pa Rwoth omenyere ri Yozefu i lek munyo waco ni, “Ay malo ikwany nyathi gi yokimere wiringi i piny Misir, aka wibedi koro cuka anowaci riwin ndir ma dwoko. Herode larango nyathi no munyo mito neko.”

¹⁴Am'omiyo Yozefu oay malo okwanyo nyathi gi yokimere, to joay wor kidho yu Misir,

¹⁵kama go obed'iye cuka Herode otho. Meno omiyo gima jatuci wac Were owaco con otundo i kare ni, “Alwoŋo wodan wok Misir.”

¹⁶Munyo Herode oneno ni jorieko ma jowok yuwok ceŋ jothumo rigo rieko, keme omako go to wodho or nike woneki woko nyithindho mayac je ma joromo oro ario gik cen, i Bethelehem kodi loka m'othenere gine. Otimo gino je cungo kwoŋ gima go oyido otieko ŋeyo kwoŋ ndir ma go openj'iye jorieko ca kwoŋ menyirok pa micala.

¹⁷Ameno gima Yeremia jatuci wac Were owaco otundo i kare ni,

¹⁸“Derino winjere yu Rama, derino ma ywak malith gi ndur. Laker ywako nyithindho pere. Kiyey wokwey cunye, rupiri ongoye m'odoŋ.”

¹⁹Munyo Herode otieko tho, malaika pa Rwoth omenyere ri Yozefu i lek yu Misir;

²⁰aka owaco ni, “Ay malo ikwany nyathi gi yokimere widoki i piny Isiraili rupiri jom'oyido jorango neko go jotieko tho.”

²¹Am'omiyo Yozefu oay malo, okwanyo nyathi gi yokimere to jodok Isiraili.

²²Munyo Yozefu owinjo ni Akelayo am'olunjo kom pa bamere Herode paka kere ma Yuda, lworo omako go dok kendo kenyo. Were omedo menyo rigo i lek, am'omiyo go okidho iy'adec ma Galili,

²³to gero peco pere i tindi ma Nazareth. Go otimo ameno ma miyo gima jatuci wac Were owaco wotundi ni, “Ibino lwoŋo go ni Janazareth.”