Read dhopadhola Matayo 22 Bible Online

Matayo 22 - dhopadhola bible

Matayo 22

¹Yesu odoko ooro agecin munyo luwo gi jo ka waco ni,

²“Ker ma polo cale kere m'oyiko kalima ma nywomirok ri wode.

³Ooro jotic pere waco ri wendo m'olwoŋ ni jowobin i kalima; to jok'omito bino.

⁴Riameno go odoko ooro jotic man gi mikwenda me: ‘Waci win ri jom'olwoŋ ni atieko yiko kisi gimoro i kalima paran; megikwe paran kodi dhok ma cwe otiek neko, aka gimoro je onyo oyikere. Biye win i kalima ma nywomirok.’

⁵To jom'olwoŋ jo jok'odewo, jokadho i tic pajo ayino; acel okadho i ndelo pere, ŋatiman i mitan pere;

⁶aka joman jomako jotic no, jogoyo jo, to joneko jo.

⁷Nge omako kere no swa, to oro jolweny pere to joneko woko jonek no, kiri gi waŋo tindi pajo.

⁸Gikenyo go olwoŋo jotic pere to waco ni, ‘Kalima ma nywomirok onyo otieko yikere, to paka ji m'oyido alwoŋo jokiripi gine,

⁹ere onyo kidhi win i royo m'okare i tindi, wilwoŋ ji mathoth ma winonwaŋ je jowobin i kalima paran.’

¹⁰Gikenyo jotic no jokidho i royo m'okare i tindi to jocoko ji je ma jonyalo nwaŋo, mabeyo gi mareco parom; aka ot ma kalima opoŋ ji.”

¹¹“To munyo kere odonjo kikaŋasa wendo, oneno kenyo nyatoro ma k'oruko nanga ma kalima.

¹²To penjo go ni, ‘Nyawotan, idonjo ka nedi ma bu nanga ma kalima ma nywomirok?’ To ŋato ngoye gi gir'awaca.

¹³Gikenyo kere owaco ri jotic ni, ‘Tweyi win cinge gi tiende wiboli go i mudho kama nitie iye ywakirok gi kayo lak.’ ”

¹⁴Yesu ocowo ni, “Kole jom'ilwoŋo thoth to jom'iyero bedo manok.”

¹⁵Jofarisayo jokadho to jocano nger ma ciko Yesu i penji.

¹⁶Gikenyo jooro jofonjirok pajo mogo kodi jopa Herode moro bongi Yesu. Jowaco ni, “Jafonji, waŋeyo nike ibedo dhano m'otire: Ifonjo royo pa Were g'adieri, m'ikidew kwoŋ gima ji paro, rupiri ikidew kwoŋ dwoŋ pa dhano.

¹⁷Onyo waci riwan paro perin. Bedo gim'otire i Cik mawan culo misolo pa Kayisar, kosa be?”

¹⁸Yesu oŋeyo can pajo marac no to waco ni, “Jorendirok! Raŋo ma witemo ciko an?

¹⁹Nyuthan win pesa ma wiculo gine misolo!” Jokelo rigo pesa m'othedhi,

²⁰to penjo jo ni, “Cal pa ŋa kodi nyingi ŋa man kwoŋe me?”

²¹Jodwoko ni, “Apa Kayisar.” Gikenyo Yesu owaco rijo ni, “Am'omiyo, miy win Kayisar gipa Kayisar, aka Were bende miy win go gipa Were.”

²²Munyo jowinjo gime, jouro swa; to joweyo go to jokadho.

²³Ndelo no won Josadukayo ma jowaco ni ji jokicerino kwoŋ jom'otho jobino bothi Yesu,

²⁴to jopenjo go ni, “Jafonji, Musa ofonjo ni ka dhano m'ongoye gi nyithindho otho, omin ripo lunjo citho no wonywol gine nyithindho ri ŋat'otho no.

²⁵Onwaŋo nitie wutmere abirio ma yado jobedo i dier wan ka: Marapena onywomo, to tho ma k'olimo nyithindho, ameno go oweyo cege ri omin.

²⁶Gino odoko otimere ri omin mar'ario, gi mar'adek, tundo kwoŋ wutmere abirio je.

²⁷Rumacen, to dhako no won tho.

²⁸Onyo, i ndelo ma rumacen munyo jom'otho jocerino, dheno obedi cipa ŋa kwoŋ ji abirio no? Rupiri joje cango jobedo gine.”

²⁹Yesu odwoko jo ni, “Wipodho swa, rupiri wikuya Ndiko Maleŋ kosa meni pa Were,

³⁰rupiri i cerino pa ji k'obed'iye nywomirok kosa nywom, to jobino cale jomalaika pa Were i polo.

³¹Onyo ma mako kwoŋ cerino: Fodi wikisoma gima Were owaco riwin munyo waco ni,

³²‘Abedo Were pa Abraham, Were pa Isaka, kodi Were pa Yakobo.’ Dwoŋ mere ni go obedo Were pa jomakwo makiweno apa jom'otho.”

³³Munyo lwak ji jowinjo gime jodhier swa.

³⁴Munyo Jofarisayo jowinjo ni Yesu omiyo Josadukayo jorumo kodi gir'awaca, jocokere kanyacel.

³⁵Aka acel kwoŋ jo, m'obedo jafonji ma Cik, openjo go ma ciko go ni,

³⁶“Jafonji, or mene maloyo dwoŋ i Cik?”

³⁷Yesu odwoko ni, “ ‘Mari Rwoth Were perin g'adundo perin je, gi cunyin je, gi paro perin je.’

³⁸Me a Or maloyo je gi dwoŋ kendo ama telo.

³⁹Aka Or mar'ario ma cale gi meno ee: ‘Mari nyawotin paka iwon imarere.’

⁴⁰Cik pa Musa gibe kodi fonji pa jotuci wac Were je thenere kwoŋ or ario me.”

⁴¹Munyo Jofarisayo jocokere kanyacel, Yesu openjo jo ni,

⁴²“Wiparo aŋo kwoŋ Kristo? Go nyakwar ŋa?” Jodwoko ni, “Go nyakwar Daudi.”

⁴³Aka Yesu openjo ni, “To raŋo gi kony pa Cuny Maleŋ Daudi olwoŋo go ni Rwoth munyo waco ama.”

⁴⁴“Rwoth owaco ri Rwoth paran ni, Bedi yuracuc paran, cuka anoloki jokwor perin paka kor kasik, ma nyono gi tiendin.”

⁴⁵“Am'omiyo, ka Daudi olwoŋo go ni Rwoth, nyalere nedi Kristo odoko bedo nyakwar Daudi?”

⁴⁶Ongoye ŋat'onyalo dwoko Yesu kada wac acel, aka wok ndelo no ongoye moro m'obedo gi miseni ma penjo go wac moro kendo.