Read dhopadhola Matayo 24 Bible Online

Matayo 24 - dhopadhola bible

Matayo 24

¹Yesu owok i Ot pa Were aka munyo onwaŋo kadho jofonjirok pere jobino nyutho go paka Ot no oger.

²To go odwoko jo ni, “Wineno gigipiny me je, k'ameno? Adieri awaco riwin, ongoye ka tele kad'acel m'ibino weyo wi nyawote ma k'okedhi woko.”

³Munyo go obedo wi got Oliv, jofonjirok jobino bonge nyaliŋliŋ to jokwayo go ni, “Waci riwan ndir ma gigipiny me bino timer'iye, aka ranyuth aŋo m'obedi kwoŋ bino perin, kodi apa gik piny?”

⁴Yesu odwoko jo ni, “Gwokere win, moro wokiri wowondi win,

⁵rupiri ji kweth jolabino gi nyingan, munyo jowaco ni, ‘An a Kristo.’ Jobino wondo ji mathoth.

⁶Aka wibino winjo kwoŋ lweny kama cegin kodi kamabor; to wikiri wibedi gi rembo rupiri gigipiny me ripo timere, to kareno gik piny fodi.

⁷Kole nono bino lwenyo gi nono man, to ker acel lwenyo gi ker man, aka kec bino bedo kodi yengirok pa piny i kabedo m'omore;

⁸me je cakirok pa candirok, paka ŋedi kafodi nyathi k'onywol.”

⁹“Gikenyo jobino ketho win i teko, to joneko win; aka nonin je bino dak win kwoŋbedo an.

¹⁰Gikenyo jomathoth jobino podho i yeyo pajo to josegeya jowoti gin, to jodakere.

¹¹Aka jotuci wac Were ma twodo mathoth jobino tundo to jowondo ji mathoth.

¹²Aka paka tim mareco medere, mar pa ji mathoth ri wadi jo bende bino rumo woko.

¹³To ŋat'ocir teko no kiri i gike ama bino both.

¹⁴Aka Wac Manyen Maber kwoŋ Ker pa Were me, ibino fonjo i piny gipi paka ranyuth ri nonin je, aka nyaka gik piny bino tundo.”

¹⁵Am'omiyo ka wineno gir'amien madwoŋ ma Daniel jatuci wac Were cango oluwo kwoŋe ojengi i Ot pa Were (ŋata soma wac me woŋey dwoŋ mere).

¹⁶Gikenyo joma nitie Yuda joworingi wi gote;

¹⁷aka ŋata ni wi ot wokiri wolori piny kwanyo gima ni ot pere;

¹⁸aka ŋata ni ndelo wokiri wogiki peco kwanyo ruk pere.

¹⁹Aka kidamba madwoŋ bino bedo ri mon ma yac, kodi mon ma jonigi nyithindho maŋic ma fodi jodhoth i ndir no!

²⁰Kway win ni ŋwec mewin wokiri wobedi i ndir ma cwir munyo pe oŋico piny, kosa i Sabato.

²¹Ato i hongo no candirok madwoŋ kidho bedo, ma fodi yado k'obedo ye wok i cakirok pa piny tundo pama, aka gima pameno odoko k'obedi kendo.

²²Aka bedi Were k'otieko kimoja ye woko ndelo no, onwaŋo ongoye dhano ma d'oboth; to ri bero pa jom'oyer, Were bino kimoja ye woko ndelo no.

²³I hongo no, ka moro owaci riwin ni, “Panen, Kristo ee!” Kosa ni “Go dica.” Wikiri wiyey.

²⁴Kole Kristo ma twodo kodi jotuci wac Were ma twodo jobino tundo to jotimo ranyuth madongo kodi gir'aura ma wondo ji, bedi nyalere di jowondo kiri jom'oyer.

²⁵Neni win, eno atieko waco riwin gime mafodi ndir no k'otundo.

²⁶Am'omiyo, ka jowaci riwin ni, “Panen, go nitie i thim.” Wikiri wikidhi yukorago; ka jowaco ni, “Panen go dica i kisika ma ot.” Wikiri wiyey.

²⁷Kole paka lithkoth wok yuwok ceŋ aka menyo piny kiri yupodho ceŋ, apaka bino pa Wod Dhano bende labedo.

²⁸Kama gimoro otho iye, ama acut jocoker'iye.

²⁹Aka ka tekin candirok ma ndir no rumo, waŋceŋ bino lokere macol aka dwe k'oliel. Mikalin jobino oy wok i polo, aka meni ma polo bino yengere.

³⁰I hongo no, nyaka ranyuth pa Wod Dhano bino nenere i polo, aka nonin je ma piny jobino ywak, aka jobino neno Wod Dhano ka dwoko i pondeponde ma polo gi meni kodi dwoŋ m'oasere;

³¹gikenyo go bino oro jomalaika pere kudho gwara ma ywak malo, aka jobino coko jom'oyer pere wok i tum aŋwen ma koyo, wok i tielo acel ma polo tundo i man.

³²Fonjere win kwoŋ makuyu, tekin jange lothi to wodho boke mayom, wiŋeyo ni ndir ma ceŋ onyo cegin tundo.

³³Am'omiyo bende ka wineno gigipiny me je, wibino ŋeyo nike go cegin tundo, ni dho waŋkac won.

³⁴Adieri awaco riwin, luse ji ma pama me k'orumi woko mafodi gigipiny me je k'otimere.

³⁵Polo gi piny bino rere woko, to wac paran k'orere woko.

³⁶To ndelo no kosa hongo mere ongoye ŋat'oŋeyo, kada jomalaika ma polo, kada Wod Were, kwanyo woko Bamere kende.

³⁷Paka cango obedo i ndir pa Nowa, apaka bende bino pa Wod Dhano bino bedo.

³⁸Ato i ndir mafodi mikula k'omadh'iye piny, ji oyido jocemo, jomedho, cwo jonywomo, nyir jonywomere, cuka ndelo ma Nowa odonj'iye i ye,

³⁹aka jok'oŋeyo cuka mikula obino to mol gi jo; apaka bende bino pa Wod Dhano bino bedo.

⁴⁰I hongo no cwo ario jobino bedo i ndelo; ibino kwanyo acel t'iweyo nyawote.

⁴¹Mon ario jobino rego wi kidi; ibino kwanyo acel t'iweyo nyawote.

⁴²Am'omiyo yikere win, rupiri wikuya ndelo ma Rwoth obin'iye.

⁴³To ŋey win gime, ni bedi won peco ŋey hongo ma jakwo bin'iye dier wor, d'oyikere aka di k'oyeyo jakwo turo ot.

⁴⁴Am'omiyo, wibende yikere win, rupiri Wod Dhano labino i hongo ma wikigen.

⁴⁵Ŋat'obedo jatic mariek ma genere ma rwoth pere nyalo ketho go kuro peco pere? Meno ŋata miyo jopeco cemo i hongo m'otire.

⁴⁶Jatic no jasilwany ma rwoth pere ka dwoko, bino nwaŋo go timo ameno.

⁴⁷Adieri awaco riwin, rwoth pere bino ketho go kuro lim pere je.

⁴⁸To ka jatic marac won owaci kende ni, “Rwoth paran ogalo.”

⁴⁹To won cako goyo jotic wadi, cemo to medho kodi jomero,

⁵⁰rwoth pere bino dwoko i ndelo ma go kigen, kodi i hongo ma go kuya;

⁵¹to miyo go gir'acula, to ketho go i candirok kanyacel gi jorendirok, kama ji jobino ywak'iye gi kay'iye lak.