Read dhopadhola Matayo 25 Bible Online

Matayo 25 - dhopadhola bible

Matayo 25

¹“Ker ma polo cale gi nyir apar ma jotiŋo talin pajo to jokidho romo kodi jamweha.

²Jabic oyido jomiŋ, jabic joriek.

³Nyir mamiŋ mere jotiŋo talin pajo, to jok'otiŋo mo;

⁴to nyir mariek mere jotiŋo cupa mo.

⁵Paka jamweha ogalo gi tundo, joje jonur to jonindo.

⁶To i dier wor denge aka okoki ni, ‘Neni, jamweha ee otundo, woki win wijoli go.’

⁷Gikenyo nyir no je joay to jocwinyo talin pajo.

⁸Aka nyir mamiŋ jowaco ri mariek ni, ‘Miy waye win mo kwoŋ mewin, kole talin mawan kidho tho.’

⁹To nyir mariek jodwoko ni, ‘Ipoyo miti mo ma wanigine k'onyal romo wan gi win; am'omiyo ber wikidhi bongi jomitan winyew mewin.’

¹⁰Aka munyo jotieko kadho nyewo mo, to jamweha tundo, kendo jom'onwaŋo jocowo yikirok ca ama jodonjo gi go i kalima ma nywomirok; t'icego dhiot.

¹¹Rumacen nyaka nyir ca jodwoko to jowaco ni, ‘Rwoth, yaw ri waye.’

¹²To go odwoko ni, ‘Adieri awaco riwin, akuya ran win.’

¹³Am'omiyo yikere win, rupiri wikuya ndelo kosa hongo.”

¹⁴“Ker ma polo bino cale kodi jadwoŋ moro m'okidho woth bor to lwoŋo jotic pere, to ketho lim pere i cingi jo;

¹⁵go omiyo ŋat'acel mugowe abic ma zahabu, ŋatiman ario, ŋatiman acel cungo kwoŋ nyalo pa kisi dhano, to go kadho woth.

¹⁶Ŋat'omiy mugowe abic okadho mayot wirok gine, to limo mugowe man abic.

¹⁷Ŋat'omiy mugowe ario, bende olimo mugowe man ario.

¹⁸To ŋat'omiy mugowa acel, okidho to kunyo piny to yiko pesa pa jadwoŋ pere.

¹⁹Rumacen munyo hongo okadho malac, rwoth pa jotic no odwoko to kaŋasa kwan ma gigipiny no gi jo.

²⁰Ŋat'omiy mugowe abic odonjo to wodho mugowe man abic to waco ni, ‘Jadwoŋ imiyan mugowe abic, to ee alimo abic man i wiy m'imiyan ca.’

²¹Rwoth pere owaco rigo ni, ‘Walwa gi tic, ijatic maber ma genere; ibedo gi genirok i gimathin, abino ketho i cingin madit; donji ibedi i kisangala pa rwoth perin.’

²²Ŋat'omiy mugowe ario bende odonjo to waco ni, ‘Rwoth, imiyan mugowe ario; ee alimo ario man.’

²³Rwoth pere owaco ni, ‘Walwa gi tic, ijatic maber odoko ma genere; ibedo gi genirok i gimathin, abino ketho i cingin madit; donji i kisangala pa rwoth perin.’

²⁴Ŋat'omiy mugowa acel to bende donjo ka waco ni, ‘Rwoth, aŋeyo ni i dhano ma kite tek, ikeco kam'iŋat'ikicwoy'iye gimoro, aka icoko kam'iŋat'ikikonj'iye gimoro;

²⁵am'omiyo lworo omakan, t'akidho to akano mugowa pesa perin i lowo; onyo maki giperin ee adwoko rin.’

²⁶To rwoth odwoko go ni, ‘Ijatic marac, odoko manyap. Kere ka nende iŋeyo nike akeco kam'aŋat'akicwoy'iye gimoro, aka ajowo kam'aŋat'akikonj'iye gimoro,

²⁷raŋo m'ikikano pesa paran i kakan pesa, aka d'onyo k'adwoko d'alimo giparan m'omedere ye?

²⁸K'ameno, onyo kwany win woko kwoŋe mugowa pesa no, wimiy jamugowe apar ayin.

²⁹Kole dhano je manitie gi gimoro ibino medo go man, aka go bino bedo kodi ma kalo gima go yenyo; to ŋata bu gimoro, kada gima go oyido nitie gine ibino kwanyo kwoŋe.

³⁰Aka bol win woko jatic m'ongoye kony no i mudho ma gicen, kama ji jobino ywak'iye gi litho madit.’ ”

³¹“Ka Wod Dhano dwoko gi dwoŋ pere, kodi jomalaika pere je, go bino bedo wi kom pere ma dhum.

³²Nonin je jobino cokere ruwaŋe, aka go bino poko jo kadirio paka jakwath poko rombo gi diegi,

³³Go bino ketho rombo yu cinge maracuc, to ketho diegi yuracam.

³⁴Gikenyo Kere bino waco ri joma ni cinge maracuc ni, ‘Biye win, josilwany pa Baba, lunji win Ker m'oyik riwin wok i cwec pa piny;

³⁵kole munyo kec onwaŋo nekan wimiyan cemo, munyo riyo nekan wimiyan gir'amadha, munyo abedo wendo wijolan,

³⁶munyo angoye gi ruk wirukan, munyo atwo wiliman, munyo an twec wiliman.’

³⁷Gikenyo jomabeyo no jobino dwoko go ni, ‘Rwoth, keraŋo ma waneno munyo kec oyido nekin to wamiyin cemo, kosa in gi riyo to wamiyin gir'amadha?

³⁸Odoko keraŋo ma wanenin munyo itwo kosa ingoye gi ruk aka warukin?

³⁹Odoko keraŋo ma wanenin munyo itwo kosa in twec aka walimin?’

⁴⁰Kere bino dwoko jo ni, ‘Adieri awaco riwin, munyo witimo gino kada ri acel m'oasa thin kwoŋ jowotan me, meno witimo ran.’

⁴¹Gikenyo go bino waco ri joma nitie yuracam pere ni, ‘Eye win bothan jom'olam, kendo donji win i mac makitho m'oyik, ri jwogi kodi jomalaika pere.

⁴²Kole munyo kec onwaŋo nekan wikimiyan cemo, munyo riyo nekan wikimiyan gir'amadha,

⁴³munyo abedo wendo wikijolan, munyo angoye gi ruk wikirukan, munyo atwo kendo munyo oyido an twec wikiliman.’

⁴⁴Gikenyo jo bende jobino dwoko ni, ‘Rwoth, keraŋo ma wanenin munyo kec kosa riyo oyido nekin, kosa ibedo jakicar, kosa ingoye gi ruk, kosa itwo kosa in twec aka wakikonyin?’

⁴⁵Gikenyo go bino dwoko jo ni, ‘Adieri awaco riwin, munyo wikitimo gino ri kad'acel m'oasa thin kwoŋ jowotan me, meno wikitimo ran.’

⁴⁶Gikenyo jobino eye bonge to jodonjo i gir'acula makirum, aka jomabeyo jobino donjo i kwo makirum.”