Read dhopadhola Matayo 28 Bible Online

Matayo 28 - dhopadhola bible

Matayo 28

¹Munyo Sabato orumo, kareno ceŋ nyaka gulo i ndelo marapena ma tic, Maria Magadalina kodi Maria man jokidho neno kaliel.

²Gikenyo yengirok pa piny madwoŋ obedo; aka malaika pa Rwoth oloro piny wok i polo, oŋilo woko kidi ma dhok kaliel, to bedo i wiye.

³Go oyido cale lithkoth aka nangin pere oyido tar pa pe.

⁴Lworo omako jokur swa m'omiyo jokirin, to jolokere pa jom'otho.

⁵To malaika no owaco ri mon no ni, “Wikiri wilwor. Aŋeyo ni wirango Yesu ma ceŋino ogur kwoŋ musalaba.

⁶Go ongoye ka, otieko cerino paka owaco won. Biye winen kam'oyido oketh'iye go.

⁷Onyo kidhi win mayot, wiwaci ri jofonjirok pere ni, ‘Go otieko cerino kwoŋ jom'otho aka onyo telo kidho riwin Galili; kenyo ama wibino nen'iye go. Eno atieko waco riwin.’ ”

⁸Gikenyo munyo fodi lworo opoŋ kwoŋ jo aka josangala, mon no joredo wok i kaliel to joringo kidho waco gino ri jofonjirok.

⁹Gikenyo jopoyo ka Yesu oromo gi jo to m'otho jo ni, “Siem wobedi gi win.” Jodhire bonge, jomako tiende, to jolamo go.

¹⁰Yesu owaco rijo ni, “Wikiri wilwor. Kidhi wiwaci ri jom'oyeyo jowokidhi Galili, aka jobino nenan yukoro.”

¹¹Munyo mon no fodi jowotho jokadho, jolweny megi kwoŋ jokur kaliel jogik i tindi to jowaco ri jotel pa jocway ri Were i wi migam gimoro je m'otimere.

¹²Jotel pa jocway ri Were i wi migam no joromo kodi jotel pa ji to jotimo can pajo. Jomiyo jolweny no pesa kweth,

¹³ka jowaco ni, “Wiripo waco ni jofonjirok pere jobino wor to jokwalo delkwoŋe munyo wagalo nindo.

¹⁴Aka ka Gavana owinji gime wabino ridho rigo ni wingoye gi raco, aka wikibino podho i teko moro je.”

¹⁵Jokur jokwanyo pesa no to jotimo paka owaci rijo. Aka meno wac m'ocwogi ma Joyuda jonyayo kiri konon me.

¹⁶Jofonjirok apar g'acel jokidho wi tendere i Galili kama Yesu ocano rom'iye gi jo.

¹⁷Munyo joneno go, jolamo go, kada nende joman kwoŋ jo oyido fodi joganagana.

¹⁸Yesu ocore cegin to waco rijo ni, “Otiek miyan meni i polo kodi i piny.

¹⁹Am'omiyo kidhi win wiloki nonin je jofonjirok paran; wibatisa jo i nyingi Baba gi Wode gi Cuny Maleŋ.

²⁰Aka wifonji jo mako or je m'amiyo win. Aka ŋey win nike abino bedo gi win ndir je, tundo i gik piny.”