Read dhopadhola Matayo 3 Bible Online

Matayo 3 - dhopadhola bible

Matayo 3

¹I hongo no Yohana Jakibatisa obino to cako tito wac Were i thim ma Yuda munyo waco ni:

²“Ŋuti win, rupiri Ker ma polo nicegin!”

³Yohana oyido a ŋata Isaya jatuci wac Were cango oluwo kwoŋe con munyo waco ni: “Nyatoro koko i thim, yik win royo pa Rwoth, tir win rigo royo pere.”

⁴Ruk pa Yohana oyido otim ma yer ŋamia, aka go oyido tweyo piere gi del ma pien, aka cemo pere oyido obedo bonyo kodi mo kic.

⁵Ji jobino bonge wok Yerusalem, wok iy'adec ma Yuda, kodi wok iy'adec je m'othoko jwom Yordan.

⁶Jotuco reco pajo aka obatisa jo i Yordan.

⁷Munyo Yohana oneno kweth Jofarisayo kodi Josadukayo jobino bonge obatisa jo, owaco rijo ni, “Win sidwol malasang, ŋata onyutho win rieko ma both kwoŋ keme pa Were macegin bino?

⁸Tim win gima nyutho nike witieko ŋuto reco mewin kicutho.

⁹Aka wikiri wipar ni winyalo nwaŋo kagoŋirok munyo wiwaco ni, ‘Abraham obedo kwari wan.’ Awaco riwin ni Were nyalo kwanyo kada telin me to loko nyikway Abraham!

¹⁰Kada pama le otiek yiko ma toŋo yen gi tiendi gin! Yath je ma kinyak gimaber ibino toŋo woko t'ibolo i mac!

¹¹Abatisa win kodi pi ma nyutho nike witieko ŋuto; to ŋata bino luwan cen bino kibatisa win gi Cuny Maleŋ kodi mac. Go loyan gi dwoŋ tektek m'akiripi kada tiŋo war pere.

¹²Go nitie g'odher pere ma yeko nyingi kal je; go bino coko kal pere ma lilo to konjo i dero pere, to waŋo woko cuŋ i mac makitho.”

¹³I hongo no Yesu owok Galili to kidho Yordan to bino bongi Yohana ni obatisa go.

¹⁴To Yohana otemo juko go ka waco rigo ni, “Iŋat'iripo kibatisa an, odoko ibino bongan ayino!”

¹⁵To Yesu odwoko go ni, “Weyi watim ameno pama. Kole i tim me wabino tiro gimoro je ma Were yenyo.” To Yohana yeyo.

¹⁶Tekin otiek kibatisa Yesu, owok i pi, gikenyo polo oyawere rigo aka oneno Cuny Maleŋ loro piny i cal p'akuru to pie kwoŋe.

¹⁷Gikenyo dwondi nyatoro oluwo wok i polo ni, “Me a Wodan won m'amaro, aka asangala gine.”