Read dhopadhola Matayo 6 Bible Online

Matayo 6 - dhopadhola bible

Matayo 6

¹Gwokere win wikiri winyuthi tim mewin mabeyo i waŋ ji ni aka ji jowoneni to jofoyo win. Ka witimo ameno i dier ji wik'olim kemba bongi Bawin manitie i polo.

²Am'omiyo ka wimiyo jacandi gimoro, wikiri wiasa nyutho kamaler, paka joma rendere jotimo i kalamo pa Joyuda kodi i royo m'okare i tindi. Jotimo ameno nike ji jowopaki jo. Adieri awaco riwin, otiek miyo jo kemba pajo m'opoŋ.

³To k'icwayo ri jacandi gimoro, kony go makada mere perin ma kacunyin k'oŋeyo,

⁴ŋey wobedi gima nyaliŋliŋ, aka Benin, ma neno gim'imito nyaliŋliŋ, ama bino miyin kemba.

⁵K'ikwayo, ikir'ibedi paka joma rendere! Jomaro cungo ka jokwayo i kalamo pa Joyuda kodi i thengi royo m'okare ma tindi ŋey dhano je wonen jo. Adieri awaco riwin, ameno jotieko limo kemba pajo kicutho.

⁶To ka ikwayo, donji i ot perin icegi thigo, aka ikway Benin, ma kinenere kamaler. Aka Benin, ma neno gim'imito nyaliŋliŋ bino miyin kemba.

⁷I kwayo perin, ikir'ior wac kweth m'ongoye kony paka jokafir jotimo; ato joparo ni Were bino winjo jo ro kwayo pajo maboyo.

⁸Am'omiyo wikiri wicale gi jo; kole Bawin manitie i polo oŋeyo gima wicando kada mafodi wikikwayo go.

⁹Me apaka wiripo kwayo, Bawan ma i polo; Nyingin wolwor.

¹⁰Keri perin wobin; Gim'iyenyo wotimere i piny paka timere i polo.

¹¹Miy waye konon cemo mawan ma noknok;

¹²Cwaki riwan reco mawan; Paka wacwako ri joma timo riwan marac.

¹³Ikir'iter wan i karatem, to bothi wan ayino, kwoŋ gimarac, [rupiri ker obedo aperin, kodi meni, kodi dwoŋ, cil gi cil]. Ameno.

¹⁴Kole ka wicwako ri ji reco ma jotimo riwin, Bawin manitie i polo bende bino cwako win.

¹⁵To ka wikicwaki reco pa joman, ameno Bawin manitie i polo bende k'ocwaki riwin reco ma witieko timo.

¹⁶Aka ka wiriyo kec, wikiri winenere pa wigut paka joma rendere. Ato jonyeko waŋ gin ŋey ji je jowoŋey nike joriyo kec. Adieri awaco riwin, ameno jotieko limo kemba pajo m'opoŋ.

¹⁷To k'iriyo kec, lwoki waŋin kendo iyiki wiyin,

¹⁸aka joman jokiri jowoneni nike iriyo kec; Benin kende ma kinenere kamaler ama bino ŋeyo. Aka Benin, ma neno gim'imito nyaliŋliŋ, ama bino miyin kemba.

¹⁹Wikiri wikan ŋaŋo mewin i piny ka, kama masirigi kodi nyal jobino nyek'iye, aka jokwo jobino donj'iye to jokwalo woko;

²⁰to kucel, kani win ŋaŋo mewin i polo, kama masirigi kodi nyal jokibino nyek'iye, aka jokwo jokibino donj'iye kwalo.

²¹Kole kama diŋaŋo perin ama cunyin bed'iye ndir je.

²²Waŋ meno tala ma del; ka waŋin olama, delkwoŋin gipi lero bino poŋ'iye;

²³to ka waŋin k'olama, delkwoŋin bino bedo i mudho. Am'omiyo ka lero ma kwoŋin olokere mudho, mudho bino asere marom nedi?

²⁴Ongoye ŋata nyalo tiyo ri rwodhe ario; go bino maro acel to dak man, kosa nyalo tiyo ri acel to cayo man. Ikinyal tiyo ri Were kodi ri lim bende.

²⁵Am'omiyo awaco riwin gime: Wikiri wirembi kwoŋ gir'acama kodi gir'amadha ma wiyenyo ma kwo, kosa ruk ri delkwoŋ win. Adieri kwo pa dhano kiloy cemo, odoko delkwoŋe kiloy ruk?

²⁶Neni win winyin ma jouco malo, jokipidhi kodhi, jokicoki cemo jokethi i dere, to kole Bawin manitie i polo kuro jo! To kere win wikiloy winyin no bor?

²⁷Ŋa kwoŋ win manyalo medo kiyindira i kwo pere ro rembo ri gigipiny no?

²⁸To raŋo ma wirembo ri ruk? Neni win thiw dudi paka jodongo; jokicwer kwok i tic odoko wegi jokitim ruk pajo.

²⁹To awaco riwin kada Solomon, ma cango oŋaŋ m'oasere, k'obedo gi ruk mabeyo paka nyaka acel kwoŋ thiw dudi me.

³⁰To k'inen meno apaka Were ruko lum, ma konon nitie to yawere mere thwo t'iwaŋo i kendo, go k'oruki win maloyo kenyo, a ji ma yeyo pajo nok me!

³¹Am'omiyo wikiri wicaki rembo, ka wiwaco ni, “Wanocam aŋo?” Kosa ni, “Wanomadhi aŋo?” Kosa ni, “Wanoruki aŋo?”

³²Kole me a gigipiny ma jokafir joyenyo hongo je; aka Bawin manitie i polo oŋeyo nike wiyenyo gi go je.

³³To kutho rangi win Ker pa Were kodi tiro ma go yenyo, aka go bino miyo win gigipiny me je.

³⁴Am'omiyo wikiri wirembi ri gima dikin; kole kisi ndelo won yawere gi wac mere. Ki yenyere medo teko man wi teko ma piny m'oyawere kelo.