Read dhopadhola Matayo 7 Bible Online

Matayo 7 - dhopadhola bible

Matayo 7

¹Wikiri withum banja ri jowoti win, aka bende Were k'othumi riwin banja.

²Kwoŋbedo ibino thumo riwin banja i yo acel ma withumo gine banja ri jowoti win, aka ibino tiyo kwoŋ win gi cik ma witiyo gine kwoŋ jowoti win.

³Am'omiyo, raŋo m'iŋiyo nyaka yath m'ondhilo man manitie i waŋ omerin, t'ikidew kwoŋ thwon kasik manitie i waŋin won?

⁴Iere nedi waco ri omin ni, mondo, weyi akwany woko nyaka yath m'ondhilo no i waŋin, ma to in won bende initie gi kongolo kasik i waŋin?

⁵In, jarendirok! Kutho kwany woko kongolo kasik i waŋin, aka nyaka ibino neno maber ŋey inokwany woko yath m'ondhilo i waŋ omerin.

⁶Ikir'imiy gwokere gigipiny maleŋ, jobino wire rin to jokayin ayino; kendo ikir'ibol ge ma welo ri mbiji, jobino nyonanyona ayino.

⁷Kway, aka inolimi; rangi, aka inonwaŋ; gudi thigo aka ibino yawo rin.

⁸Kole dhano je ma kwayo, limo; aka ŋata rango, nwaŋo, aka ŋata gudo thigo, iyawo rigo.

⁹Ŋa kwoŋ win bacere ji ka ma di miy wode tele, k'okwayo mugat?

¹⁰Kosa di miy go thwol, k'okwayo rec?

¹¹Kole kada wireco ameno, wiŋeyo miyo nyithindho mewin gigipiny mabeyo. Aka Bawin manitie i polo oloy win didi i miyo joma kwayo go, gigipiny mabeyo!

¹²Tim win ri jowoti win gima wimito jowotimi riwin: Me a dwoŋ Cik pa Musa kodi fonji pa jotuci wac Were.

¹³Donji gi i waŋkac madiny, rupiri waŋkac malac nigi royo mayot luwo, to tero jo i rerok, aka jomathoth joluwo royo no.

¹⁴Waŋkac madiny nigi royo matek luwo, to tero jo i kwo, aka ji manok ama jonwaŋo royo no.

¹⁵Gwokere win kwoŋ jotuci wac Were ma twodo, ma jobino bongi win i cal pa rombo gi woko, to iy'adieri mere jobedo arara i cuny gin.

¹⁶Riameno wibino ŋeyo jo kwoŋ gima nyak wok i tim pajo. Kudho oriaŋ bende cene nyak vini? Odoko kudho alwi bende cene nyak nyandere?

¹⁷Kole yath maber nyak gimaber, aka yath marac bende nyak gimarac.

¹⁸Yath maber kinyal nyak gimarac, aka yath marac kinyal nyak gimaber.

¹⁹Yath je ma kinyak gimaber itoŋo woko t'ibolo i mac.

²⁰Am'omiyo wibino ŋeyo jotuci wac Were ma twodo cungo kwoŋ gima nyak ma nenere i tim pajo.

²¹Ki dhano je ma lwoŋan ni, Rwoth, Rwoth, ma bino donjo i Ker ma polo, kende ŋata timo gima Baba man polo yenyo.

²²I ndelo no, jomathoth jobino waco ni, “Rwoth, Rwoth, kole watuco mikwenda pa Were i nyingin, wariemo woko jwogi i nyingin aka watimo gir'aura madongo m'omore i nyingin!”

²³Gikenyo abino waco rijo ni, “Akuya win, kendo eye win bongan win wijotimi reco me.”

²⁴Am'omiyo dhano je ma winjo wac paran me aka tiyo gine bino cale gi dhano mariek m'ogeto ot pere i wi tele.

²⁵Koth ocwe, mikula omol, aka asur okudho to ot no k'opodho, kwoŋbedo oger i wi tele.

²⁶To ŋata winjo wac paran me aka kitiy gine, cale dhano mamiŋ m'ogero ot pere i kwoyo.

²⁷Koth ocwe, mikula omol, asur okudho ot no matek, to podho. Podho no oasere marom kune!

²⁸Munyo Yesu ocowo waco gime, lwak ji jouro swa kite ma go ofonjo gine.

²⁹Go onwaŋo kicale kodi jondiko, rupiri go ofonjo pa ŋat'oyido nigi meni.