Read dhopadhola Matayo 8 Bible Online

Matayo 8 - dhopadhola bible

Matayo 8

¹Munyo Yesu oloro wi got, lwak ji joluwo go.

²Gikenyo jadhowo moro obino bonge, oriewere piny ruwaŋe, to waco ni, “Jadwoŋ k'iyenyo inyalo bothan.”

³Yesu ocwayo cinge to geyo go munyo waco ni, “Ayenyo, bothi!” Gikenyo dhowo pere ocango i hongo no won.

⁴To Yesu waco rigo ni, “Neni! Ikir'iwaci ri nyatoro, to kidhi tirtir bongi jacway ri Were i wi migam, go wokaŋasa in, aka imiy mic ma cowirok ma nyutho dhano je nike ibothi, paka mitere i Or ma Musa ondiko.”

⁵Munyo Yesu odonjo Kapernaum, jasirikale madwoŋ ma Jaroma oromo gine to kwayo kony ni,

⁶“Jadwoŋ, jatic paran ni peco two nyaŋinya i kanindo, kinyal ay, aka nitie i litho madwoŋ swa.”

⁷Yesu owaco ni, “Abino kidho botho go.”

⁸Jalweny odwoko ni, “Be Jadwoŋ, kiripi ran in donjo i ot paran, waci nyaka wac acel to jatic paran both.

⁹Kole abende anitie gi jodongo ma jotelan, aka nitie jolweny ma bende joluwan; k'awaco ri me ni kadhi, to kadho; ri man ni biye, to bino; aka ka aoro jago paran ni, tim gimanyo, to go timo.”

¹⁰Yesu ouro munyo owinjo gime, omiyo owaco ri ji m'onwaŋo joluwo go ni, “Awaco riwin, fodi akineno kiti yeyo me i nyatoro je i Isiraili.

¹¹Poyi win gime! Jomathoth jobino wok yuwok ceŋ kodi yupodho ceŋ to jobedo dhower i Ker ma polo kodi Abraham, Isaka, kodi Yakobo.

¹²To jom'oyido joripo bedo i Ker ibino bolo jo woko i mudho kama jobino ywak'iye to jomwodo laki gin.”

¹³Aka Yesu owaco ri jasirikale ni, “Dok peco, paka iyeyo, gim'iyenyo wotimere rin.” Aka jatic pa jasirikale obothi sawa no won.

¹⁴Yesu okidho peco pa Petero, aka kenyo or Petero m'obedo min cege oyido ni kanindo kwoŋe oowere.

¹⁵Gikenyo go ogeyo cingi dheno, to two weyo go; aka oay malo to cako rweyo go.

¹⁶Munyo piny oyutho, ji jokelo bongi Yesu ji ma jwogi nikwoŋ gin. Yesu oriemo woko jwogi gi wac pere to botho jotwo je.

¹⁷Go otimo ama ma miyo gima jatuci wac Were Isaya owaco otundi i kare ni, “Go won okwanyo woko nyapo mawan, to tiŋo two mawan.”

¹⁸Munyo Yesu oneno lwak ji jothoko go, owodho or ni jowopor loka man ma wakawaka.

¹⁹Jafonji ma Cik moro obino bonge to waco ni, “Jafonji ayikere kidho kodin kam'inocom'iye je.”

²⁰Yesu odwoko go ni, “Kibwe jonitie gi kero pajo, aka winyin bende jonitie gi od gin, to Wod Dhano ongoye kodi kama go othen'iye wiye.”

²¹Acel kwoŋ jafonjirok pere owaco ni, “Jadwoŋ, weyi kutho akidhi ayiki baba.”

²²Yesu odwoko go ni, “Luwan. Weyi jom'otho wegi jowoyiki jom'otho pajo.”

²³Munyo Yesu odonjo i ye, jofonjirok pere jokadho gi go.

²⁴Piyo piyo no asur madwoŋ obino i wakawaka m'omiyo pi ma tula oyido umo woko ye aka Yesu oyido nindo.

²⁵Jofonjirok jokidho bonge to jocewo go ka jowaco ni, “Bothi wan, Rwoth! Wacegin tho!”

²⁶Yesu odwoko ni, “Wibwok ameno raŋo! Apaka yeyo mewin nok ama!” Gikenyo go oay malo to oro asur kodi wakawaka m'oyido tula kwe; aka gimoro je okwe maber.

²⁷Dhano je odhier. Jowaco ni, “Me kiti dhano ma nedi? Kiri asur kodi kitula pa pi je winjo go!”

²⁸Munyo Yesu obino iy'adec ma Gadara, yu loka man ma wakawaka, j'ario m'oyido jonigi jwogi aka jowok i ŋungu m'iyik'iye ji, joromo gine. Jono oyido joger swa, am'omiyo ji bin jolworo luwo royo no.

²⁹Piyo piyo no jokoko malo ni, “Iyenyo timo aŋo gi wan, Wod Were? Ibino cando wan mafodi ndir m'otire k'otundo?

³⁰Cegin kenyo, oyido nitie sidwol mbiji ma cemo.”

³¹Gikenyo to jwogi jokwayo Yesu ni, “K'imito riemo wan woko, ere dhiri wan i sidwol mbiji no.”

³²Yesu owaco rijo ni, “Kidhi win.” Gikenyo jowok to jodonjo i sidwol mbiji. Sidwol gibe oloro piny wok wi tendere to jomunyere i pi.

³³Ji m'onwaŋo jokwayo mbiji joringo to jokidho i tindi, to jowaco ri ji ma kenyo gimoro je m'otimere ri jom'onwaŋo jwogi nikwoŋ gin.

³⁴Gino omiyo dhano je ma tindi owok kidho romo gi Yesu; aka munyo joneno go, jokwayo go ni woeye iy'adec pajo.