Read dhopadhola Matayo 9 Bible Online

Matayo 9 - dhopadhola bible

Matayo 9

¹Yesu odonjo i ye to cewere gik yu loka man ma wakawaka, to bino i tindi ma thugin won.

²Kenyo, jomoro jokelo rigo dhano m'oyido two nyaŋinya ma jotiŋo wi kitanda. Munyo Yesu oneno kiti yeyo pa jono, owaco ri ŋata two nyaŋinya ni, “Ikir'irembi, wodan; reco perin ocwaki rin.”

³Gikenyo jondiko wegi jowaco kendi gin ni, “Ŋati me kole luwo marac kwoŋ Were!”

⁴Yesu oŋeyo gim'oyido joparo to waco ni, “Raŋo ma wiparo gigipiny mareco ameno?

⁵Mene mayot, waco ni, ‘Reco perin ocwaki rin.’ Kosa waco ni, ‘Ay malo iwothi?’

⁶Am'omiyo ere abino nyutho win ni Wod Dhano nigi meni i piny ka ma cwako reco.” Gikenyo go owaco ri dhano m'oyido two nyaŋinya ni, “Ay malo, itiŋ kitanda perin, idok peco.”

⁷Jalo oay malo to dok peco.

⁸Munyo lwak ji m'oyido nikenyo joneno gino, jouro swa, to jopako Were m'omiyo dhano kiti meni ma cal ameno.

⁹Yesu oeye kenyo, aka munyo wotho, oneno jacoki misolo ma nyinge Matayo, obedo piny kama go oyido tiyo iye. Yesu owaco rigo ni, “Luwan.” Matayo oay malo to luwo go.

¹⁰Munyo Yesu oyido cemo m'odieceŋ i ot pa Matayo, jocoki misolo mathoth kodi joreco jobino to jobedo gi Yesu kodi jofonjirok pere dhower.

¹¹Munyo Jofarisayo moro joneno gime, jowaco ri jofonjirok pere ni, “Raŋo ma jafonji mewin cemo gi jocoki misolo kodi joreco?”

¹²Yesu owinjo jo to waco ni, “Jom'olama ama jokiyeny jamilerwa, to joma two ayino ama joyenyo.

¹³ Kidhi win winiaŋ atoŋa m'omiyo ondiki ni, ‘Ayenyo wor ayino, makiweno cowirok ma le.’ Kole akibino lwoŋo ji m'otire, to joreco ayino.”

¹⁴Gikenyo joma luwo Yohana Jakibatisa, jobino bongi Yesu gi penji ni, “Raŋo wan kodi Jofarisayo wariyo kec noknok, to jofonjirok perin jokiriy kada dicel?”

¹⁵Yesu odwoko jo ni, “Cene wendo ma kalima ma nywomirok bende jobedo gi rem mafodi jamweha nitie gi jo? Ki nyalere! To ndir bino tundo m'ibino kwany'iye woko jamweha bongi jo nyaka to joriyo kec.”

¹⁶“Ongoye nyatoro ma kwoyo kot m'oti gi kiremo manyen, rupiri kiremo no laywayo kot to kam'oyec medere bedo madwoŋ ayino.

¹⁷Odoko ongoye nyatoro ma konjo medho vini manyen i migowa piendere macon. K'otimo ameno, piendere lamwoc woko, to vini oy woko, to piendere bende nyekere. Kucel, ripo vini manyen wokonji i migowa piendere manyen, ŋey nyaka gi go ario no je bino kurere maber.”

¹⁸Munyo Yesu oyido fodi waco rijo gime, jadhum madwoŋ ma Jayuda obino bonge, to guro conge piny ro nyime ka waco ni, “Nyaran nyaka owok tho won; to biye kethi cingin kwoŋe, aka go bino kwo.”

¹⁹Gikenyo Yesu oay malo oluwo go, kanyacel gi jofonjirok pere.

²⁰Dhako moro, m'oyido remo madit ocowo oyo kwoŋe oro apar g'ario gipi obino yuŋey Yesu to geyo dhok nanga pere.

²¹Dheno owaco gi i cunye ni, “Bedi ayanja agey kada nyaka nanga pere won, d'abedo maber.”

²²Yesu owire to neno go to waco ni, “Ikir'irembi, nyaran! Yeyo perin otieko bothin.” I hongo no won to dheno bedo maber.

²³Gikenyo Yesu okidho i ot pa jadhum madwoŋ. Aka munyo oneno jokudhi madundo, kodi lwak ji m'oyido jouco, owaco ni,

²⁴“Ngoye win ka wijoje; nyathi manyako no k'otho, go nindo ayino!” To jono jonyero go.

²⁵Aka munyo otiek wodho ji je woko, Yesu odonjo i ot to mako cingi nyathi manyako no to nyalo ay malo.

²⁶Wac no olak iy'adec ma piny no gipi.

²⁷Yesu oeye kenyo, aka munyo kadho, j'ario ma waŋ gin otho jocako luwo go munyo jokoko ni, “Tim riwan wor, Wod pa Daudi!”

²⁸Munyo Yesu odonjo i ot, joma waŋ gin otho no jobino bonge to go penjo jo ni, “Wiyeyo ni anyalo timo gino?” To jodwoko ni, “Ey jadwoŋ.”

²⁹Gikenyo go ogeyo waŋ jo aka owaco ni, “Ere, wobedi ameno cungo kwoŋ yeyo mewin!”

³⁰Waŋ jono ocako neno. To Yesu ciko jo teltel ni, “Wikiri wiwaci ri nyatoro.”

³¹To joeye kenyo munyo jonyayo wac kwoŋ Yesu iy'adec je ma piny no.

³²Munyo ji oyido jokadho, jomoro jokelo ri Yesu obadha ma jwogi oyido ni kwoŋe.

³³Tekin otiek riemo woko jwogi no, ŋato ocako luwo, to dhano je dhier. Jowaco ni, “Fodi wakineno gima cale ama i Isiraili!”

³⁴ To Jofarisayo jowaco ni, “rwoth pa jwogi ama miyo go meni ma riemo woko jo.”

³⁵ Gikenyo Yesu okidho i tindi je kodi loka je. Go ofonjo i kalamo ma Yuda munyo tito Wac Manyen Maber ma Ker, aka obotho ji kwoŋ kiti two kodi ramirok je.

³⁶ Munyo go oneno lwak ji, wor opoŋ i cunye rijo, rupiri oyido jonitie i rembo aka kony ongoye pa rombo ma bu jakwath.

³⁷ Riameno go owaco ri jofonjirok pere ni, “Keco opikere, to jotic ama nok;

³⁸am'omiyo kway win Rwoth ma won keco wodhiri jotic jowokec rigo.”