Read dhopadhola Mariko 11 Bible Online

Mariko 11 - dhopadhola bible

Mariko 11

¹Munyo joriko Yerusalem, i tindi ma Bethfage kodi Bethania, cegin gi got Oliv, Yesu ooro jofonjirok pere ario kadho yuwiye,

²gi wac me ni, “Kidhi win loka ma yuwiy win, aka tekin widonj'iye wibino nwaŋo nyathi punda m'otwey, ma fodi dhano k'obedo i wiye; gony to wikelo ka.

³Ka moro openji win ni, ‘Witimo aŋo?’ Waci win ni, ‘Rwoth ama yenyo punda me aka bino dwoko go ka mayot.’ ”

⁴Jokidho to jonwaŋo nyathi punda moro otwey dhiot i thengi royo, to jogonyo.

⁵To jomoro m'onwaŋo jocungo kenyo jopenjo jo ni, “Witimo aŋo no? Raŋo ma wigonyo nyathi punda no?”

⁶Jodwoko paka Yesu owaco rijo, to jono joweyo jo, to jokadho gi nyathi punda no.

⁷Jokelo nyathi punda no ri Yesu, to jopedho nangin i dieŋeye, to Yesu bedo i wiye.

⁸Ji mathoth jopedho nangin i royo, aka joman jopedho jangi yen ma joturo i dudi.

⁹Aka joma jotelo yuwiye kodi joma joluwo go yucen jowero ni, “Ozana! Jasilwany a ŋata bino i nyingi Rwoth!

¹⁰Silwany wobedi ri Ker ma bino mapa bawan Daudi! Ozana malo i polo!”

¹¹Yesu otundo Yerusalem, to donjo i Ot pa Were; aka munyo otieko ŋiyo korin gi korin oneno gimoro je, owok to kadho Bethania gi jofonjirok apar g'ario, paka piny oyido kidho yutho.

¹²Yawere mere munyo jo ni royo jodwoko wok Bethania, Yesu onwaŋo winjo kec.

¹³Munyo go oneno gi bor bor kiti makuyu moro m'icamo, ma boke otwere kwoŋe, okidho neno ni kono nyalo nwaŋo kwoŋe nyandere, to munyo otundo dho tiende, k'onwaŋo gimoro kwanyo woko boke; rupiri meno oyido ki ndir ma nyandere nyak'iye.

¹⁴Yesu owaco ri makuyu no ni, “Ongoye moro m'odoko ocam nyandere kwoŋin.” To jofonjirok pere jowinjo gima go owaco no.

¹⁵Munyo jotundo Yerusalem, Yesu odonjo i Ot pa Were, to cako riemo woko joma nyewere kodi jomitan i Ot pa Were. Oriewo mezin pa jowili pesa, kodi kombere pa joma onwaŋo jotana akurin;

¹⁶aka k'oyeyo kada moro wotho gi gimoro i Ot pa Were.

¹⁷Ofonjo jo ka waco ni, “K'ondiki i Ndiko Maleŋ ni Ot paran ibino lwoŋo ni Ot ma kwayo mapa nonin je? Ama win wiloko kapondo pa jokwo ayino!”

¹⁸Jotel pa jocway ri Were i wi migam kodi jondiko jowinjo gime to jocako rango royo ma neko Yesu. To jolworo go, rupiri lwak ji gibe oyido odhier kwoŋ fonji pere.

¹⁹Munyo piny oyutho Yesu gi jofonjirok pere joeye i tindi no.

²⁰Yawere mere odikin, munyo jowotho i royo, jonwaŋo makuyu no othwo wok malo kiri i tiende.

²¹Petero opoyo gima nyoro otimere to waco ri Yesu ni, “Jafonji, panen! Makuyu ma nyoro ikwoŋo ca otieko thwo!”

²²Yesu odwoko jo ni, “Bedi win gi yeyo i Were. Adieri awaco riwin,

²³ŋat'owaci ri got me ni, ‘Mukere woko, ikidhi imunyere i wakawaka.’ Ongoye gi kiganagana i cunye, to yeyo ni gima go owaco bino timere, ibino timo rigo gino.

²⁴Am'omiyo awaco riwin, ka wikwayo gimoro, yey win ni witieko limo aka ibino miyo win gimoro je ma wikwayo.

²⁵Aka ka wicungo wikwayo, cwaki win reco je ma nyatoro otimo riwin, aka nyaka Bawin manitie i polo bende bino cwako reco mewin.

²⁶[Ka wikicwaki jowoti win, kada Bawin manitie i polo bende k'ocwaki reco mewin”].

²⁷Odoko jogik Yerusalem, aka munyo Yesu oyido wotho i Ot pa Were to jotel pa jocway ri Were i wi migam kodi jondiko kanyacel kodi jotel pa ji jobino bonge to jopenjo go ni,

²⁸“Inwaŋo meni kune ma timo gigipiny me? Kosa ŋa m'omiyin meni ma timo gigipiny me?”

²⁹Yesu odwoko jo ni, “Alapenjo win gimoro acel kende; dwokan win aka abino waco riwin kam'anwaŋ'iye meni ma timo gigipiny me.

³⁰Meni pa Yohana ma batisimo ji owok kune, bongi Were kosa bongi ji? Dwokan win.”

³¹Wegi jocako piem kendi gin ni, “Wadwoki nedi? Ka wadwoko ni, ‘Owoki i polo.’ Go bino waco ni, ‘To raŋo ma wikwero yeyo go?’

³²Kosa di wadwoki ni, ‘Owoki bongi dhano?’ ” (Ato onwaŋo jolworo ji, rupiri dhano je onwaŋo otero Yohana paka jatuci wac Were.)

³³Gikenyo jodwoko Yesu ni, “Wakuya.” To Yesu waco rijo ni, “Abende ak'owaci riwin kama meni ma atimo gine gime wok'iye.”