Read dhopadhola Mariko 12 Bible Online

Mariko 12 - dhopadhola bible

Mariko 12

¹Gikenyo Yesu ocako luwo rijo g'agecin ni: “Dhano moro opidho yen vini i ndelo, othoko ndelo no gi cel, okunyo bur ma biyo vini to gero ot acurcur ma kur. Go oketho ndelo vini i cingi jofur moro to kadho wiloka.

²Munyo ndir otundo ma fono vini, go ooro ŋeca pere bongi jofur pere no ni jowolimi rigo gim'onyak moro wok i vini.

³Jofur no jomako ŋeca no jogoyo, to joriemo go ma bu gimoro.

⁴Gikenyo won ndelo ooro ŋeca man; ma bende jofur jogoyo lero to jofuta go swa.

⁵Won ndelo ooro ŋeca man, to joneko meno; jotimo ŋecin man mathoth ameno, munyo jogoyo jomegi aka joneko joman.

⁶Ŋat'onwaŋo odoŋ aora bongi jofur oyido obedo wode won ma migos. Am'omiyo rumacen ooro wode won gipi bongi jofur ka waco ni, ‘Adieri jobino woro wodan.’

⁷To jofur no jowaco wegi kendi gin ni, ‘Me won a musika pa won ndelo, weyi waneki go aka waŋati walunji lim pere!’

⁸Gikenyo jomako go to joneko, to jobolo delkwoŋe woko ma ndelo.”

⁹Yesu openjo ni, onyo won ndelo no otim aŋo? Kole go bino neko woko jofur mareco no to ketho ndelo i cingi jofur man.

¹⁰Fodi wikisoma i ndiko ma waco ni, “Kole tele ma jogeto jocayo ni bukony am'olokere tele ma thielo kindi ot;

¹¹me obedo tic pa Rwoth aka neno maber swa riwan!”

¹²Jotel pa Joyuda jotemo mako Yesu, rupiri joŋeyo ni go oyido obolo ageca me kwoŋ jo. To jolworo lwak ji, am'omiyo joweyo go to jokadho.

¹³Jooro Jofarisayo moro kodi jopa Herode bongi Yesu ciko go i luwo pere.

¹⁴Jobino bonge to jowaco ni, “Jafonji, waŋeyo ni ibedo ŋat'otire, aka ikilwori nyatoro; ikidew kwoŋ dwoŋ pa nyatoro, to ifonjo gir'adieri kwoŋ gima Were yenyo ri dhano ayino. Ere waci riwan; yere i Cik mawan goyo misolo ri Kayisar, kosa be?”

¹⁵Yesu oneno apondi pajo to dwoko ni, “Raŋo ma witemo ciko an? Keli win pesa moro anen.”

¹⁶Jokelo rigo pesa m'othedhi acel to penjo jo ni, “Me cal pa ŋa kodi nyingi ŋa man kwoŋe me?” Jodwoko go ni, “Apa Kayisar.”

¹⁷Gikenyo Yesu owaco ni, “am'omiyo miy win Kayisar gipa Kayisar, aka wimiy Were bende gipa Were.” Aka joje jouro go.

¹⁸Josadukayo moro ma jowaco ni cerino pa jom'otho ongoye jobino bongi Yesu.

¹⁹Jowaco ni, “Jafonji, Musa cango ondiko riwan cik me ni, ‘Ka dhano otho oweyo cege, to k'olimo nyithindho, omin ŋato ripo lunjo citho no, to limo nyithindho ri jatho.’

²⁰Ndelo moro obedo wutmere abirio. Kayo pajo onywomo, to tho ma k'olimo nyithindho.

²¹Mar'ario olunjo dheno to bende tho to weyo go ma bu nyathi. Mar'adek bende ameno,

²²jom'odoŋ bende ameno. Wutmere abirio je jobedo gi dhako no aka jotho ma jok'olimo nyithindho. Rumacen to dhako no bende tho.

²³Onyo ceŋ ka jom'otho je jocerino, dhako no obedi apa ŋa? Ato cwo abirio no je jobedo gi dhako no!”

²⁴Yesu odwoko jo ni, “Me k'agima miyo wikomi, ma wikuya Ndiko Maleŋ kosa meni pa Were?

²⁵Kole ka jom'otho jocerino jobino cale gi jomalaika man polo, aka cwo gi mon jokibino nywomere.

²⁶Aka ma mako kwoŋ cerino pa jom'otho, fodi wikisoma i kitawo pa Musa, bol ma luwo kwoŋ kasugu ma waŋ? Ondiki kenyo paka Were owaco ri Musa ni, ‘Abedo Were pa Abraham, Were pa Isaka, kodi Were pa Yakobo.’

²⁷Dwoŋ mere ni go obedo Were pa jomakwo, makiweno apa jom'otho. Wipodho swa!”

²⁸Jandiko moro onwaŋo nikenyo winjo luwo no. Go oneno ni Yesu oyido dwoko Josadukayo maber am'omiyo obino bonge gi penji me ni, “Or mene maloyo Or je gi dwoŋ?”

²⁹Yesu odwoko go ni, “Me a marapena: ‘Joisiraili winji win! Rwoth Were mawan a Were;

³⁰aka iripo maro Rwoth Were perin g'adundo perin je, gi cunyin je, gi paro perin je, gi meni perin je.’

³¹Mar'ario ma luwo meno gi dwoŋ a me: ‘Mari nyawotin paka iwon imare.’ Ongoye Or man maloyo ario me.”

³²Jandiki Cik owaco ri Yesu ni, “Itire, Jafonji; Itire i waco ni Rwoth a Were kende, aka ongoye Were man kwanyo woko go;

³³aka dhano ripo maro go g'adundo pere je, gi paro pere je, gi meni pere je, gi maro nyawote paka won omare. Winjo Or ario me loyo tero ri Were cowirok awaŋa ma le kodi giman je.”

³⁴Yesu oneno ni dwoki pere nyutho rieko to waco rigo ni, “Onyo ikibor gi Ker pa Were.” Rumacen moro k'odoko otemo penjo Yesu wac moro je.

³⁵Munyo Yesu fonjo i Ot pa Were openjo ni, “Jondiko jonyalo nedi waco ni Kristo obedo wod pa Daudi?”

³⁶Kole munyo Cuny Maleŋ oloro ri Daudi won owaco ni, “Rwoth owaco ri Rwoth paran ni, Bedi yu cingan maracuc, cuka anoloki jokwor perin paka kor kasik, m'inyono gi tiendin.”

³⁷Daudi won lwoŋo go ni Rwoth, to Kristo nyalo nedi bedo wode? Lwak ji jowinjo Yesu gi kisangala.

³⁸Aka munyo go fonjo ji owaco ni, “Kure win kwoŋ jondiko, ma jomaro nyumo gi nangin mabeyo nike womothi jo gi dwoŋ i katale;

³⁹joyero kombere mabeyo loyo i kitipa pa jom'oyeyo pa Joyuda kodi kabedo pa wendo awora i kalima,

⁴⁰jomayo mon tho udi pajo aka joyumere gi kwayo maboyo. Gir'acula pajo bino raco tektek!”

⁴¹Yesu obedo piny cegin gi sanduku ma kano pesa, aka oneno paka ji mathoth jobol'iye pesa pajo. Jom'oŋaŋ mathoth jobolo pesa kweth;

⁴²gikenyo citho moro ma jacandi bende obino to bol'iye nusu pesa nyaka ario won mathindho thindho marom gi dome acel.

⁴³Gikenyo Yesu olwoŋo jofonjirok pere bonge to waco rijo ni, “Adieri awaco riwin, citho ma jacandi me obolo i sanduku mic mathoth loyo apa joman je.

⁴⁴Rupiri dhano je omiyo pesa wok kwoŋ lim m'onwaŋo go nitie gine, to theno gi candi pere omiyo gimoro je m'onwaŋo d'okwo gine.”