Read dhopadhola Mariko 14 Bible Online

Mariko 14 - dhopadhola bible

Mariko 14

¹Onwaŋo odoŋ ndelo ario to kalima ma Kadho kodi ma mugat ma buthow wotundi. Jotel pa jocway ri Were i wi migam kodi jondiko jorango royo ma mako Yesu nyaliŋliŋ jowoneki go.

²Jowaco ni, “Gime wokiri wobedi i ndelo ma kalima, rupiri woy pa ji bino asirok.”

³Munyo Yesu onwaŋo nitie Bethania i ot pa Simon jadhowo, munyo go cemo, dhako moro odonjo gi cupa mo wudo maŋwe kur, ma welo mere thoth. Oyawo dhok cupa no to olo mo i wiy Yesu.

⁴Ji megi m'onwaŋo jo nikenyo jomako nge to jowaco wegi kendi gin ni, “Onyeki mo maŋwe kur me raŋo?

⁵Bedi tana d'onyalo kelo pesa kada ma kalo nusu ma feza miya adek, t'imiyo jocandi!” Aka jowaco nyingi dheno swa.

⁶Yesu owaco ni, “Weyi win go! Wikwinyo go raŋo? Go otieko timo tic maber swa kwoŋan?

⁷Kole winitie gi jocandi noknok, aka winyalo konyo jo hongo je. To an ak'obedi gi win ndelo je.

⁸Go otimo gimaber ma go nyalo; ato go onyo wiro delkwoŋ kicutho ri kaliel.

⁹Aka adieri awaco riwin, kamoro je ma ofonj'iye Wac Manyen Maber i piny gipi, gima dheno otimo ibino tuco ma poyo go.”

¹⁰Gikenyo Yuda Iskariot, acel kwoŋ japar g'ario, oay to kidho bongi jotel pa jocway ri Were i wi migam camo sereko ri Yesu.

¹¹Jotel no josangala swa munyo jowinjo gim'okelo go, to jociko miyo go pesa. Gikenyo Yuda ocako rango hongo maber ma miyo jo Yesu.

¹²I ndelo marapena ma Kalima ma mugat ma buthow, ndelo m'inek'iye nyithindhi rombo ma wote ma kalima ma Kadho, jofonjirok pa Yesu jopenjo go ni, “Imito wayiki rin Kalima ma Kadho gi kune?”

¹³Yesu ooro jario kwoŋ jo gi wac me: “Kidhi win i tindi, aka nyatoro m'otiŋo dak pi bino romo gi win. Luw win go

¹⁴kiri i ot ma go odonj'iye; to wiwaco ri won ot no ni, ‘Jafonji penjo ni nikune kisika pa wendo m'anocam'iye Kalima ma Kadho gi jofonjirok paran?’

¹⁵Go bino nyutho win kisika ma malo, m'oyik maber, kama winoyik'iye gimoro je mawan.”

¹⁶Jofonjirok no joay, jokidho i tindi, to jonwaŋo gimoro je paka Yesu owaco rijo; to joyiko Kalima ma Kadho kenyo.

¹⁷Munyo piny otundo othieno, Yesu okidho kenyo gi japar g'ario.

¹⁸Munyo jonitie dhower, Yesu owaco ni, “Awaco riwin, ŋat'acel kwoŋ win kidho camo ran sereko; aka manago ŋata cemo kodan.”

¹⁹Jofonjirok jobwok swa to jocako penjo go, ŋat'acel acele ni, “Iwacan?”

²⁰Yesu odwoko ni, “Manago acel kwoŋ win, ma pilo kodan acero acel.

²¹Wod Dhano bino tho paka Ndiko Maleŋ waco, to moro je m'ocami sereko ri Wod Dhano bino neno candirok! D'ober ri ŋato, bedi cango weyi ma k'onywol go!”

²²Aka munyo jocemo, Yesu okwanyo mugat, omiyo silwany, to turo, to miyo jofonjirok pere. Owaco ni,

²³“Cami win, me delkwoŋ.” To kwanyo kikopo, aka munyo otieko foyo Were, omiyo jo, to joje jomadho. Owaco rijo ni,

²⁴“Me remo paran ma cikirok manyen, m'ibino oyo ri ji mathoth.

²⁵Awaco riwin ni, odoko ak'omadhi vini me cuka ndelo m'anomadh'iye vini manyen i Ker pa Were.”

²⁶Munyo jotieko wero wer ma pako Were, jokidho wi got Oliv.

²⁷Yesu owaco ri jofonjirok pere ni, “Wijoje wibino kedhere gi ŋwec wiweyan, rupiri ondiki ni, ‘Abino neko jakwath to rombo kedhere.’

²⁸To k'atieko cerino, abino telo kidho riwin Galili.”

²⁹Petero odwoko ni, “Akibino weyin, kada jowotan je joweyin.”

³⁰Yesu owaco ri Petero ni, “Adieri awaco rin, kafodi wod gweno k'okoko dirio wor ma konon, ibino kwedere kwoŋan didek.”

³¹Petero omedo waco gi meni ni, “Akibino kwedere kwoŋin, kada bedi ni atho kodin.” To jofonjirok je bende jowaco ameno.

³²Yesu gi jofonjirok jotundo kam'ilwoŋo ni Gethsemane, to Yesu waco rijo ni, “Bedi win ka wikway.”

³³Gikenyo okwanyo Petero gi Yakobo, gi Yohana, to rembo madwoŋ gi geregere cako poŋ i cunye,

³⁴to waco rijo ni, “Rembo opoŋ i cunyan swa ma mito nekan. Bedi win ka wikway.”

³⁵Gikenyo omedere mathin yumalo, oriewere piny aka okwayo ni ka nyalere go wokiri wodonji i hongo ma candirok.

³⁶Owaco ni, “Aba, Baba, inyalo gimoro je, kwany woko agwata gimakec me kwoŋan. To ki paka amito, kwanyo woko paka iŋat'imito.”

³⁷Gikenyo go ogik to nwaŋo jofonjirok adek no jonindo,

³⁸to waco ri Petero ni, “Simon, inindo? Ikinyal bedo waŋin kada nyaka sawa acel won?” Aka owaco rijo ni, “Bedi win waŋ win aka wikway ŋey wik'odonji i karatem. Cuny win yenyo to del nyap.”

³⁹Go odoko ogik kwayo ka waco wac acel no won.

⁴⁰Gikenyo odoko odwoko bongi jofonjirok to nwaŋo jonindo; jok'onyalo bedo waŋ gin. To jok'oŋeyo gima di jowaco rigo.

⁴¹Munyo odwoko mar'adek owaco rijo ni, “fodi winindo, wiywomere? Meno oromo; hongo otundo; Wod Dhano onyo pama ikidho ketho i cingi joreco.

⁴²Ay win wakadhi; neni, kole ŋat'ocamo ran sereko ee otieko tundo.”

⁴³Munyo fodi Yesu luwo, Yuda, acel kwoŋ japar g'ario otundo. Lwak ji ma jotiŋo abor gi ludhe onwaŋo jonigi go kareno jotel pa jocway ri Were i wi migam kodi jondiko kodi jotel pa ji ama jooro jo.

⁴⁴Jacami ri Yesu sereko oyido otieko miyo jo ranyuth ni, “Ŋat'anocwiy lembe meno a ŋata wirango. Maki win go matek witer go ma wikaro diere.”

⁴⁵Tekin Yuda tundo bongi Yesu to waco ni, “Jafonji.” To cwiyo lembe.

⁴⁶Gikenyo jomako Yesu to jokoda go matek.

⁴⁷To ŋat'acel kwoŋ jom'ocungo kenyo yuyo abor pere to toŋo ŋeca pa jadwoŋ pa jocway ri Were i wi migam to codo woko ithe.

⁴⁸Gikenyo Yesu owaco rijo ni, “Wibino kodi abor gi ludhe makan pa jakwo nedi?

⁴⁹Ndelo je yado abedo gi win i Ot pa Were afonjo, wikimakan. To Ndiko Maleŋ ripo wokethi i tim.”

⁵⁰Gikenyo jofonjirok pere jokedhere gi ŋwec to joweyo go.

⁵¹Jayac moro m'oboyere gi suka oyido luwo Yesu.

⁵²Jotemo mako go to weyo rijo suka, to ringo yombo jo kinyoro.

⁵³Gikenyo jotero Yesu i ot pa jadwoŋ pa jocway ri Were i wi migam, kama jotel pa jocway ri Were i wi migam kodi jotel pa ji kodi jondiko oyido jocoker'iye.

⁵⁴Petero oluwo Yesu gi bor bor aka odonjo i diedipo pa jadwoŋ no to bedo kenyo gi jolweny kareno bende oyo mac.

⁵⁵Jotel pa jocway ri Were i wi migam kodi ji ma jo ni ot gibe jotemo rango wac ma mako Yesu, ŋey jowoneki go to jok'onwaŋo gimoro.

⁵⁶Jokony mathoth jokelo wac ma twodo kwoŋ Yesu, to wac ma jokelo bed'iye piem kendekende.

⁵⁷Jomoro jocungo to jokelo twodo kwoŋ Yesu ni,

⁵⁸“Wawinjo go waco ni, ‘Abino kedho woko Ot pa Were me ma cingi dhano am'ogero, to agero man ma k'oger gi cingi jo.’ ”

⁵⁹Kad'ameno je fodi wegi jopiemo i wac me.

⁶⁰Jadwoŋ pa jocway ri Were i wi migam oay malo ruwaŋ ji je to penjo Yesu ni, “Ingoye gi dwoki kwoŋ kweth wac ma ji jokelo kwoŋin me?”

⁶¹To Yesu oliŋaliŋa ma k'odwoko gimoro. Jadwoŋ no odoko openjo go ni, “Iŋat'ibedo Kristo, Wod Were ma Jasilwany?”

⁶²Yesu odwoko ni, “A an won, aka wibino neno Wod Dhano munyo nitie yuracuc pa Jameni je, kareno dwoko i pondeponde ma polo!”

⁶³Gikenyo jadwoŋ pa jocway ri Were i wi migam no oyeco nangin pere ka waco ni, “Wac aŋo man ma fodi wadwaro kendo?

⁶⁴Kole watieko winjo gima k'otire m'owaco kwoŋ Were. Withumo nedi?” Aka joje jothumo rigo banja ni go ripo aneka.

⁶⁵Jomegi jocako ŋulo law kwoŋ Yesu, to joboyo waŋe, aka jopatho go g'adhoŋ, to jokoko malo ni, “Patuci ŋat'ogoyin!” Jolweny jotero go gicen to jogoyo go adonde.

⁶⁶Petero onwaŋo fodi nitie i diedipo, to acel kwoŋ nyir ma tiyo ri jadwoŋ pa jocway ri Were i wi migam bino.

⁶⁷Munyo nyako no oneno Petero oyo mac, okaŋasa go swa to waco ni, “In bende onwaŋo initie gi Yesu Janazareth.”

⁶⁸To go kwero ni, “Akuya gim'iluwo kwoŋe.” To kidho dho waŋkac. I hongo no to wod gweno koko marapena.

⁶⁹Jatic manyako no odoko oneno Petero kenyo to cako kowo ri jom'oyido jocungo kenyo ni, jame obedo acel kwoŋ jonago.

⁷⁰To Petero odoko kwedere. I hongo macek, jom'oyido jocungo jokaro Petero gi wac ni, “Adieri, in acel kwoŋ jo, rupiri ibende ibedo anywola ma Galili.”

⁷¹Gikenyo Petero ocako kwoŋirok ni, “Akuya ran ŋata wiluwo kwoŋe me.”

⁷²I hongo no won to wod gweno koko madirio, aka munyo Petero opoyo gima ndir ca Yesu owaco rigo ni, “Kafodi wod gweno k'okoko dirio ibino kwedere kwoŋan didek.” Gikenyo kwoŋe okwe to ywak malith.