Read dhopadhola Mariko 15 Bible Online

Mariko 15 - dhopadhola bible

Mariko 15

¹Odikin worwor, jotel pa jocway ri Were i wi migam, kodi jotel pa ji, kodi jondiko, kodi jopido gibe, joyiko paro kanyacel. Jotweyo Yesu gi lijegere to jotero go ruwaŋ Pilato.

²Pilato openjo go ni, “Iŋat'ibedo Kere pa Joyuda?” Yesu odwoko go ni, “Eno iwaco.”

³Jotel pa jocway ri Were i wi migam joosa Yesu gi wac mathoth swa.

⁴To Pilato penjo go kendo ni, “Ingoye gi radwok? Winji kweth wac ma ji jokelo kwoŋin.”

⁵Yesu odoko okwero dwoko kada wac acel, aka Pilato ouro tektek.

⁶I ndelo madwoŋ ma kalima ma Kadho je, Pilato yado omaro gonyo jatwec moro je ma ji jokwayo.

⁷I hongo no jal m'ilwoŋo ni Baraba onwaŋo nitie i twec kanyacel gi jom'ogwenyere kwoŋ adhum ma joneko kiri ji i lweny pajo.

⁸Munyo lwak ji jocokere aka jocako kwayo Pilato ni wogonyi rijo jatwec acel paka omaro timo,

⁹Pilato openjo jo ni, “Wimito agony riwin Kere pa Joyuda?”

¹⁰Ato go oyido oŋeyo maber ni jotel pa jocway ri Were i wi migam ama jokelo go bonge ro nyeko pajo.

¹¹To jotel no jocuno ji, kucel jodhiro ji ni jowokway Pilato wogonyi rijo Baraba ayino.

¹²Pilato odoko openjo lwak ji ni, “To wiyenyo atim aŋo gi ŋata wilwoŋo ni Kere pa Joyuda me?”

¹³Jokoko ni, “Gur go kwoŋ musalaba!”

¹⁴Pilato openjo jo ni, “To raco aŋo ma go otimo won?” Jomedo koko ni, “Gur go kwoŋ musalaba ayin!”

¹⁵Pilato omito kisangala lwak ji, am'omiyo ogonyo rijo Baraba. To oro jo cwado Yesu, to yeyo jo guro go kwoŋ musalaba.

¹⁶Jolweny jotero Yesu i diedipo pa Pilato to jolwoŋo wadi gin.

¹⁷Joruko rigo nanga aywoya ma rangi ariŋo, to jodolo thac okudho to jorwako i wiye pa sangaria mar'adhum.

¹⁸Aka jom'otho go ni, “Yoga Kere pa Joyuda!”

¹⁹Jogoyo wiye gi luth, joŋulo kwoŋe law, joguro congi gin, aka joriewere rigo piny pa jomiyo go dwoŋ.

²⁰Munyo jotieko nyero go ameno, jolunyo woko nanga ma rangi ariŋo no to joruko rigo nangin pere won. To jotero go wogur wi musalaba.

²¹Joromo kodi Simon i royo munyo oyido bino i tindi, to jocuko go gi tiŋo musalaba pa Yesu. (Ŋato oyido Simon ma Sireno, ba Alekizanda kodi Rufus).

²²Jokelo Yesu kam'ilwoŋo ni Golgotha, dwoŋ mere ni Kabedo pa Kahanga wic.

²³Jotemo miyo go vini m'oruw gi pigi yath moro maŋwe kur ma kweyo litho, to Yesu k'omadho.

²⁴Joguro go kwoŋ musalaba, aka jopoko nangin pere gi kwir ma ŋeyo adec ma kisi dhano d'otero.

²⁵Sawa oyido obedo odikin kapa sawa adek m'ogur'iye go wi musalaba.

²⁶Me a wac m'ondiki yuwiye: “Kere pa Joyuda.”

²⁷Joguro jokwo ario bende wi musalaba gi Yesu, ŋat'acel yu cinge maracuc ŋatiman yu cinge maracam.

²⁸[Ameno ndiko maleŋ otundo i kare, ma waco ni, “Okwan go kwoŋ joreco”].

²⁹Jom'okadho i royo joyengo wiy gin aka joyeto Yesu ni, “Ha! In am'onwaŋo ikidho kedho Ot pa Were t'igero man i ndelo adek!

³⁰Ere palor ye wi musalaba ibothere wanen!”

³¹Jotel pa jocway ri Were i wi migam kodi jotel pa ji kodi jondiko bende jonyero Yesu munyo joŋalo go ni, “Obotho joman, to won kinyal bothere.

³²Weyi wanen paka Kristo, Kere pa Joisiraili won olori wi musalaba, aka wanoyey go.” Aka kiri jom'ogur wi musalaba gine bende joyeto go.

³³Odieceŋ kapa sawa aucel, piny ocol cowo hongo ma sawa adek gipi.

³⁴I hongo ma sawa abuŋwen, Yesu okoko gi derino madwoŋ ni, “Eloy, Eloy, lama sabac thani!” Meno nyaka ni, “Were paran, Were paran raŋo ijwangan!”

³⁵Ji megi m'oyido jonitie kenyo munyo jowinjo wac me jowaco ni, “Winji win, go dica lwoŋo Elia.”

³⁶Ŋat'acel kwoŋ jo oringo gi cangwe, obilo i vini mawac, to ketho i dhoke gi yath mabor. Oketho i dhok Yesu gino munyo waco ni, “Weyi wanen paka Elia obin ogony go kwoŋ musalaba.”

³⁷Yesu okoko gi derino madwoŋ to tho.

³⁸Aka nanga m'oyido olier i Ot pa Were oyec wok malo kiri piny.

³⁹Jalweny madwoŋ m'oyido ocungo cegin gi musalaba, oneno paka Yesu okoko gi derino aka otho to waco ni, “Adieri, me oyido Wod Were!”

⁴⁰Mon moro oyido jo nikenyo jocungo gi bor bor. I dier jo oyido nitie Salome, Maria ma wok Magdala kodi Maria min Yakobo mathin kodi Yose.

⁴¹Mon me yado joluwo Yesu gi miyo go kony munyo go nitie Galili; aka onwaŋo nitie mon man bende mathoth ma jobino gine kiri i Yerusalem.

⁴²Munyo piny kidho yutho, Yozefu ma wok Arimatheya otundo. Go oyido obedo ŋata nigi dwoŋ swa i kweth pa jopido, aka onwaŋo kuro bino pa Ker pa Were. Ndelo no onwaŋo obedo ndelo ma yikirok (dwoŋ mere ni, ndelo ma telo Sabato).

⁴³Riameno Yozefu otimo miseni to kidho bongi Pilato to kwayo go delkwoŋ Yesu.

⁴⁴Pilato ouro swa ni Yesu otieko tho. Olwoŋo jalweny madwoŋ to penjo go ka Yesu otieko tho adieri.

⁴⁵Munyo otieko winjo bongi jalweny madwoŋ ni apaka obedo, Pilato oyeyo Yozefu kwanyo delkwoŋ Yesu.

⁴⁶Yozefu ogamo delkwoŋ Yesu wi musalaba, otweyo gi suka, to ketho i kaliel m'ogor i tele. Oŋilo kidi madwoŋ to culo gine dhok kaliel.

⁴⁷Maria ma wok Magdala kodi Maria min Yose onwaŋo jonitie kenyo joneno kam'oyik'iye Yesu.