Read dhopadhola Mariko 16 Bible Online

Mariko 16 - dhopadhola bible

Mariko 16

¹Munyo ndelo ma Sabato orumo, Maria ma wok Magdala, kodi Maria min Yakobo, kodi Salome jonyewo mo maŋwe kur ma wiro gine delkwoŋ Yesu.

²Odikin worwor i ndelo marapena ma tic, munyo ceŋ nyaka gulo, jokidho i kaliel.

³Munyo fodi jo ni royo, wegi jopenjere kendi gin ni, “Ŋat'oŋil riwan woko kidi ma dhok kaliel?”

⁴Gikenyo joŋiyo yumalo to joneno ni kidi otiek ŋilo woko; kidi no oyido ombo swa.

⁵Gikenyo jodonjo i kaliel, to joneno jayac moro obedo piny yuracuc, oruko nanga matar, to lworo mako jo tektek.

⁶Jayac no owaco ni, “Wikiri wibedi gi lworo. Aŋeyo ni wirango Yesu Janazareth ma ceŋino ogur kwoŋ musalaba. Go ongoye ka; otieko cerino! Ere panen win kama ceŋino oketh'iye go.

⁷Onyo kidhi witer wac me ri jofonjirok pere, kiri ri Petero bende ni kole go otieko telo kidho riwin Galili; yukoro ama wibino nen'iye go paka ndir ca owaco riwin.”

⁸Gikenyo jowok i kaliel gi ŋwec, rupiri lworo gi bwok oyido opoŋ kwoŋ jo. Aka jok'owaco kada ri nyatoro, rupiri oyido jothoth gi lworo.

⁹Munyo Yesu otieko cerino kwoŋ jom'otho, odikin worwor, i ndelo marapena ma tic, omenyere ri Maria ma wok Magdala, ma ndir no oriemo kwoŋe jwogi abirio.

¹⁰Dheno okidho to waco ri joma yado jowotho gi Yesu, m'oyido joywak gi geregere madit.

¹¹To munyo jowinjo wac pere ni Yesu kwo aka ni otieko neno Yesu, jok'oyeyo wac no.

¹²Rumacen, Yesu omenyere ri jofonjirok moro ario munyo oyido jo ni royo jokidho loka moro.

¹³Jome bende jogik to jowaco ri jofonjirok wadi gin, to je jok'onyalo yeyo wac pajo.

¹⁴Macowe, Yesu omenyere ri jofonjirok apar g'acel wegi munyo jocemo. Go opusa jo paka jok'obedo gi yeyo, aka odoko jobedo g'adundo manwaŋ, rupiri jokwero yeyo joma onwaŋo jotieko neno go munyo ocerino.

¹⁵Aka owaco rijo ni, “Kidhi win i piny je, wifonji nono je Wac Manyen Maber.

¹⁶Ŋat'oyey t'ibatisa go bino both; ŋat'okwer yeyo ilathumo banja rigo.

¹⁷Joma joyey jobino bedo gi ranyuth ma meni me: Jobino riemo woko jwogi i nyingan; jobino luwo dhodhok manyen.

¹⁸Jobino mako thwol, aka ka jomadhi kwir moro marac jokibino ramere; jobino ketho cingi gin kwoŋ jotwo to joboth.”

¹⁹Munyo Rwoth Yesu otieko luwo gi jo, oter go i polo to bedo yuracuc pa Were.

²⁰Jofonjirok jokidho to jofonjo Wac Manyen Maber i iye je, munyo Rwoth tiyo gi jo aka ridho adieri ma fonji pajo gi ranyuth ma meni m'othielo wac no. Ameno.