Read dhopadhola Mariko 4 Bible Online

Mariko 4 - dhopadhola bible

Mariko 4

¹Yesu odoko ocako fonjo ji i thengi wakawaka ma Galili. Lwak ji m'oasere jocokere bonge, am'omiyo go odonjo i wakawaka to bedo i ye. Aka ji je jobedo dho thengi wakawaka.

²Yesu ofonjo gigipiny madit munyo luwo i agecin, aka i fonji pere owaco ni,

³“Winji win! Dhano moro okidho cwoyo.

⁴Aka munyo bayo kodhi, megi opodho i thengi royo, to winyin jobino jodimo woko.

⁵Kodhi megi opodho wi tele kama lowo rep'iye; jokwako twi, rupiri lowo oyido rep.

⁶To munyo ceŋ oliel, orewo jo, to paka tiendi gin oyido orewere, joner to jothwo woko.

⁷Kodhi megi opodho kama dikudhin, aka kudhin odongo gi jo to mwonyo jo woko ma jok'onyalo nyak gimoro.

⁸Aka kodhi megi opodho i lowo maber ma diwa, to jonyak withi gin, ma megi nyingi gin piero adek, megi piero aucel, megi miya acel.”

⁹Aka Yesu owaco ni, “Ŋata nigi ithe ma winjo wowinji.”

¹⁰Gikenyo munyo Yesu oyido nikende, joma onwaŋo joni bonge, kanyacel gi jofonjirok pere apar g'ario, jopenjo go tiendi ageca me.

¹¹Yesu owaco rijo ni, “Otiek miyo win ŋeyo nyaliŋliŋ ma Ker pa Were, to jonica ma joniwoko iwaco rijo gigipiny g'agecin.”

¹² “Ŋey adieri, Jowoŋiy to jok'onyal neno, jowowinji to jok'onyal niaŋ, Ipoyo di jonyalo gik bongi Were, to cwako jo.”

¹³Gikenyo Yesu openjo jo ni, “Kere wikuya dwoŋ ageca me? Onyo winoŋey nedi dwoŋ agecin man?

¹⁴Jacwoyo cwoyo wac pa Were.

¹⁵Diceŋ wac megi podho thengi royo; meno ji ma jowinjo wac no, to tekin jotieko winjo, to Sitan bino to kwalo woko wac m'onwaŋo ocwoy i cuny gin.

¹⁶Ji man jocale kodi kodhi m'opodho wi tele ma lowo rep'iye. Me a joma tekin jowinjo wac to jojolo gi kisangala.

¹⁷To wac no kimoki i cuny jo, aka bedo ye i cuny jo nyaka hongo macek. To ka teko kosa acanda moro obino, ro wac no, jono jopodho mayot.

¹⁸Ji man jocale kodhi m'ocwoy kama dikudhin. Me a joma jowinjo wac,

¹⁹to rembo ri kwo ma piny me, kodi awanya ma ŋaŋo ma piny kodi giman mathoth jomwonyo wac to kinyak gimoro.

²⁰To ji megi jocale kodhi m'ocwoy i lowo maber ma diwa. Jowinjo wac, jojolo, aka wac nyak: Megi piero adek, megi piero aucel, megi miya acel.”

²¹Gikenyo Yesu omedo waco ni, “Tala bende odoko iriewo iy'agono nedi? Kosa iketho nedi i tiendi kitanda, ma k'olier malo wi akare mere?

²²Kole gim'opan je ibino wodho kamaler, aka gim'oum ibino yawo kamaler.

²³Ŋata nigi ithe ma winjo gim'afonjo wowinji.”

²⁴To waco rijo ni, “Kethi win i tim gima wiwinjo; paka ipima gim'imiyo ji, apaka bende ibino kipima rin gim'ibino miyin, aka ibino medin kiri man.

²⁵Aka ŋata nitie gi gigipiny mathoth ibino medo go man, ŋat'ongoye gine ibino mayo go kada nyaka mathin m'onwaŋo go nitie gine.”

²⁶Yesu owaco ni, “Ker pa Were cale dhano m'ocwoyo kodhi i ndelo pere.

²⁷Go nindo wor, to cew odikin to yindin odieceŋ gipi, kareno kodhi twi to dongo. Go kiŋey kada paka gino dongo.

²⁸Lowo won miyo gim'opidhi dongo to nyak.

²⁹Gino kutho turo thiaŋ to ŋok, rumacen withe gi nyinge tegino. Ka kal ociek i ndelo, won ndelo kwanyo athero, rupiri keco otundo.”

³⁰Yesu odoko owaco ama: “Di wawaci ni Ker pa Were cale aŋo? Kosa ageca aŋo ma wanoori ma tito?

³¹Gime cale nyaka kodhi m'ondhilo ma i ndir ma pidho thin swa loyo kodhi man je ma piny.

³²To ka otiek pidho, twi to dongo madwoŋ loyo yen wadi je; rieyo jange madongo, aka winyin jonyalo geto od gin i jange.”

³³Yesu bin fonjo ji munyo bolo agecin mathoth thoth paka meno.

³⁴Oluwo gi jo i royo m'amiyo jowoniaŋ wac. Go k'oluwo gi jo m'ongoye agecin; to ka nitie gi jofonjirok pere wegi kakendi gin, tito rijo gimoro je gi thenethene mere.

³⁵Munyo piny oyutho, Yesu owaco ri jofonjirok pere ni, “Wapor win loka ma koca ma wakawaka.”

³⁶Joweyo lwak ji, to jodonjo i ye gi Yesu wegi kendi gin, to jocako cewirok. Ye megi oyido bende nitie kenyo.

³⁷Gikenyo koyo madwoŋ obino gi meni to yengo wakawaka, to miyo pi sira to cako donjo i ye pa kidho poŋo.

³⁸Yesu oyido nitie cen i ye, otheno wiye nindo. Jocewo go to jowaco rigo ni, “Jafonji, ikidew ni wacegin tho?”

³⁹Yesu ocew, obwoko koyo no, to waco ri wakawaka ni, “Kudere! Kwe!” Aka koyo okwe to wakawaka je pie.

⁴⁰Gikenyo Yesu owaco ri jofonjirok pere ni, “Wibwok aŋo? Wingoye gi yeyo kada masisiri?”

⁴¹Jodhier swa to wegi jowaco kendi gin ni, “Me ŋa me ma kiri koyo gi wakawaka je winjo wac pere!”