Read dhopadhola Luka 11 Bible Online

Luka 11 - dhopadhola bible

Luka 11

¹Ndelo moro Yesu oyido nitie kamoro kwayo, aka munyo ocowo, acel kwoŋ jofonjirok pere owaco ni, “Rwoth, fonji wan kwayo, paka Yohana ofonjo jofonjirok pere.”

²Yesu owaco rijo ni, “Waci win ama ka wikwayo.” “‘Bawan manitie polo, Nyingin wolwor. Ker perin wobin.

³Miy wan ndelo je cemo mawan ma noknok.

⁴Cwaki riwan reco mawan, paka wabende wacwako dhano je ma timo riwan marac. Aka ikir'iter wan karatem. To bothi wan ayino kwoŋ gimarac.’ ”

⁵Aka Yesu owaco ri jofonjirok pere ni, “Ŋa kwoŋ win man gi mere pere, ma ka okidho bonge dier wor to kwayo go ni, ‘Mere paran, kopa ye an mugat adek, anoculin;

⁶nyawotan moro m'owok bor ee nyaka tundo ran pama won me, aka angoye gi gimoro ma anomiy go!’

⁷Jalo to dwoko gi i ot ni, ‘Ikir'iolan, atieko kiri diyo thigo, aka nyithindho paran gi an won wanitie i kanindo; akinyali ay malo bino miyin.’

⁸Awaco riwin, kada di ŋato koay miyo go gimoro paka mere, to ro amen pere, jalo bino ay malo to miyo go gimoro je ma go yenyo.”

⁹“Am'omiyo awaco riwin, kway win, aka omiy win; rangi win, aka winonwaŋ; gudi win thigo, aka oyaw riwin.

¹⁰Kole ŋata kwayo ndir je limo, ŋata rango, ndir je nwaŋo; aka ŋata gudo thigo, bende ndir je iyawo rigo.

¹¹Ŋa kwoŋ win ma ba nyithindho, ma ka wode okwayo go rec to miyo thwolgwok ayino?

¹²Kosa k'okwayo go tongi gweno to miyo go thwolgwok?

¹³K'inen win ma wireco, wiŋeyo miyo nyithindho mewin gimaber, onyo Bawin ma i polo oloy win marom nedi i miyo joma kwayo go Cuny Maleŋ!”

¹⁴Gikenyo Yesu oyido riemo woko jwogi m'obadha; munyo jwogi no owok, obadha oluwo, aka ji jouro swa.

¹⁵To joman jowaco ni, “Go riemo jwogi gi meni pa Belzebul, jadwoŋ pa jwogi je.”

¹⁶Aka joman, ma temo go, jokwayo go ranen ma wok i polo.

¹⁷To Yesu paka oyido oŋeyo paro pajo, owaco rijo ni, “Ker je ma won tiakere diere bino tur, odoko peco ma won tiakere diere podho.

¹⁸Onyo ka Sitan won owire to tiakere diere, ker pere ocungi nedi? Ato wiwaco ni ariemo jwogi gi meni pa Belzebul.

¹⁹Medo kwoŋ meno, ka kere ariemo jwogi gi meni pa Belzebul, nyithindho mewin joriemo jo gi meni pa ŋa? Meno am'omiyo jobino thumo banja loyo win.

²⁰To k'inen ariemo jwogi gi lwet Were, kole meno Ker pa Were otieko tundo riwin.

²¹Ka dhano ma jameni, manitie gi gilweny, kuro peco pere, meno gigipiny pere otiek gwoko;

²²to ka ŋata loyo go gi meni omonji go to kengila go, bino mayo go gilweny m'onwaŋo go geno to poko jowote gigipiny m'onyaga no.

²³Ŋat'ongoye i thenge paran meno jakwor paran, aka ŋata kikonyan gi coko rombo kanyacel meno kedho woko ayino.”

²⁴“Ka cuny m'ocido owok kwoŋ dhano, kidho i kabedo m'othwo m'ongoy'iye pi munyo rango kaywomirok; to ka k'onwaŋo kamoro waco ni, ‘Abino gik i ot paran kam'awok'iye.’

²⁵Aka k'odwoko to nwaŋo ni ot oywey aka oyiki maber,

²⁶kidho to omo jwogi wadi man abirio mareco loyo go, to jodonjo to jobedo kenyo; aka kiti ŋato lokere marac loyo ma yado con.”

²⁷Munyo Yesu owaco ameno, dhako moro okoko i dier ji ka waco ri Yesu ni, “Jasilwany a dhako m'otiŋin i iye, to miyin dhoth.”

²⁸Yesu odwoko ni, “Kucel josilwany meno a joma jowinjo wac pa Were to joketho i tim!”

²⁹Munyo lwak ji oyido medere, Yesu owaco ni, “Luse ji ma pama obedo luse marac; kwayo ranyuth, to ongoye m'ibino miyo jo kwanyo woko ranyuth pa Yona.

³⁰Kole paka Yona obedo ranyuth ri ji ma Ninivi, apaka Wod Dhano bende bino bedo ranyuth ri luse ji ma pama.

³¹Nyamicala ma wok i thenge ma yupiny bino ay gi luse ji me to kelo kwoŋ jo wac i ndelo ma thumo banja, rupiri go owotho wok i piny mabor bino winjo rieko pa Solomon; aka awaco riwin, kole ŋatadwoŋ maloyo Solomon ee ni ka.

³²I ndelo ma thumo banja, ji ma Ninivi jobino cungo to jokelo kwoŋ win wac, rupiri joŋuto reco pajo munyo jowinjo wac ma Yona otito; aka awaco riwin, kole ŋatadwoŋ maloyo kiri Yona ee ni ka!”

³³ “Ongoye ŋata cwinyo tala pere to pano kosa umo g'agono; kucel go ketho tala no wi meza, aka joma donjo i ot jowonyal neno lero.

³⁴Waŋin meno a tala ma delkwoŋin; ka waŋin olama, delkwoŋin gipi bedo maler; to ka k'olama, delkwoŋin gipi bende bedo i mudho.

³⁵Am'omiyo kure aka ŋey lero ma kwoŋin k'olokere mudho.

³⁶K'inen delkwoŋin nigi lero mathoth aka ongoye kama dimudho, meno bino bedo maler kicutho, paka tala maliel miyo lero.”

³⁷Munyo Yesu fodi luwo, Jafarisayo moro okwayo go ni wokidhi wocem'iye gine; riameno Yesu odonjo i ot pere to bedo dhower.

³⁸Jafarisayo no ouro swa munyo oneno nike Yesu kutho k'ologo paka cik pajo yenyo aka ocemo.

³⁹To Rwoth owaco rigo ni, “Win Jofarisayo wilwoko ŋey kikopo kodi atewe to akaka kodi reco madit am'opoŋ i cuny win.

⁴⁰Ji ma paro pajo cek! Wiparo ni Were ma cango ocweyo ŋey gimoro ama k'ocweyo iye bende?

⁴¹To miy jocandi gima ni iy kikopo kodi atewe aka gigipiny no je bino bedo m'olony riwin.”

⁴² “Kidamba otundi riwin, Jofarisayo! Rupiri wimiyo Were acel kwoŋ apar ma gigipiny ma celirok maŋwe kur paka katungulu, binzar, kodi yen maŋwe kur man, to wijala tiro kodi maro Were; gigipiny me oyido wiripo timo ma wikijala man.”

⁴³“Kidamba otundi riwin, Jofarisayo! Ato wimaro kabedo ma malo i kalamo pa Joyuda, kodi jolo moth i katale.

⁴⁴Kidamba otundi riwin! Wicalo kaliele ma k'okethi kwoŋ jo ranyuth aka ji wotho i wiy jo ma jokiŋey.”

⁴⁵Acel kwoŋ Jondiko owaco rigo ni, “Jafonji, k'iwaco ameno kole onyo iyeto wan bende!”

⁴⁶Yesu odwoko ni, “Kidamba otundi riwin bende, wi Jondiko! Wiketho migugu i dieŋey ji ma kiyot tiŋo, to wiwegi wikigey migugu no kada gi lwet cingi win acel.

⁴⁷Kidamba otundi riwin, kole wigero kaliele pa jotuci wac Were ma cango bacere mewin joneko.

⁴⁸Ameno wiwegi wibedo joridhi wac no aka wifoyo gima bacere mewin jotimo; ato jo joneko jo, aka win wigero kaliele pajo.

⁴⁹Am'omiyo Rieko pa Were waco ni, ‘Abino dhiro rijo jotuci wac Were kodi jomikwenda; aka jobino neko megi, joman to jocando.’

⁵⁰Am'omiyo ji ma pama ibino ketho kwoŋ jo banja ma oyo remo pa jotuci wac Were je wok i cwec ma piny,

⁵¹cako kwoŋ remo pa Abel tundo i remo pa Zekaria ma joneko i dier migam kodi Kabedo Maleŋ. Ey, awaco riwin, ji ma pama ibino ketho rijo banja kwoŋ reco no je!”

⁵²“Kidamba otundi riwin, Jondiko! Wikwanyo rayaw ma thigo ma ot rieko; to wiwegi wikwero donjo i ot no, odoko wigeŋo joman ma joyenyo donj'iye!”

⁵³Munyo Yesu eye kenyo, Jondiko kodi Jofarisayo jocako diyo go tektek, gi temo omo iye gi penji kwoŋ gigipiny mathoth,

⁵⁴kareno jobuto rigo ŋey jowomaki go i wac pere moro.